وترجعي نفسي لاسمي
ما انا بعد منك
اسم بس ، واتهد رسمي
وعقلي كان يوزن بلد
كرباج غيابك جه جلد
خلى اللي كان زينة البلد
ماشي ف البلد.. مجنون ورسمي
يللي باعوكي بالرخيص
ودفعت انا أكبر تمن
زفوكي انتي للعريس
وسابوني مني للزمن
خدني وعملني ملطشة
م الفجر دمعي للعشا
ولما يوم خدني التعب
سلمني للنوم م العشا
شفت الكابوس
شفتك ف حضن سي العريس
شفته بملكي منفرد
وانا الملك .. محروم تعيس
حرمت انام لو حتى اموت
ما النوم دا راحة للبشر
وانا مش بشر
انا صخرة فتتها المطر
أنا ورقة وقعت م الشجر
أنا رقبة طايرة من جسد
أنا جتة موتها الحسد
أنا أي حاجة حياتها ظلم
أنا كلمة ثابتة ف كل فيلم
أنا شكلي حتى هنسى اسمي
لو رجعتي هتلاقيني
وساعتها يمكن تعرفيني
لو حتى شكلي هيتنسف
أنا سهل جدا أتكشف
هتلاقي اسمك ع اللسان
هتلاقي دمعة جوه عيني
دا ياحبيبتي يبقى انا
طب ضحكتي وديتها فين؟
طب دا سؤال؟
من إمتى ضحكة بتتخلق من ناي حزين؟
حبي بنيته جوه قلبك بالتعب
ويا السهر ويا الدموع
لو كل حب ف الحياة ضاع واتغلب
حبي مصيره للرجوع
ولو هيحصل غير كده
يبقى الثبات اصبح شذوذ
يبقى النفاق ويا الفسوق
أصبح حلال اصبح يجوز
يبقى اصدق لو قالولي
إن انت من ٣٠ سنة مولود عجوز
فاكرة اللي كان؟
فاكرة اما كنت دنيتك؟
فاكرة كلامنا والوعود؟
فاكرة الحنان؟
اللي سقيته لدمعتك
خلاها ضحكة مفتحة زي الورود
طب فاكرة صوتي ونبرته؟
كان يسحرك ويطمنك
طب مين هيقدر؟
بعد مني .. بس ياغالية يتمنك
يللي انتي حالفة لترجعي
يلا ارجعي
دي الشمس طلعت الف مرة
وانتي غايبة ما شفتها
يللي انتي حالفة لترجعي
يلا ارجعي
لو راجعة عبدة ولا حرة
راضي بالنتيجة .. قبلتها
بس ارجعي
بس ارجعي
