قصيدة : أنا كُنت عيل .... بقلم الشاعر كريم عبدالرسول

أنا كُنت عيل حيلتي ست سنين
ودعيت يا رب
أنا عايز أشوف
ستي اللي جات لك من شهور

وسألت ابويا وقلت له
فين ستي يابا ؟
وابويا قال طِلعت لفوق
فا طلعت فوق السطح يمكن يبقي صح
ومشُفتهاش
ونزلت أعاتبه
بكلمة محبوسة ف قُليبي
مقُلتهاش
وسألت تاني
فين ستي يابا ؟
وابويا قال طلعت لفوق
بصيت له تاني وقلت له
السطح فاضي مفيش عليه ارواح بشر
- أنا قصدي طلعت للسما فوق السحاب
فَ فضلت أقول
يا ربنا ؟
ممكن أشوف ستي لساعات ؟
او ممكن اخد منها بس اتنين جنيه ؟
يا رب أنا عيل وحيد
سابت ايديه
ملقيتش رد نزلت أقول
فين ستي يابا ؟
في القبر زي ما صاحبي قال ؟
طيب خلاص
الموت حلال ؟
ماتت خلاص ودفنتها تحت التراب ؟
مش كنت بس تسيبها فوق السطح حتي لوحدها
يمكن تجوع
يمكن تعوز مني العلاج
تنده عليا تقول لي هات الأدوية علشان اخف
وأسمع كلامها وأروح لها
زي' الألف '
يرضيكوا أعدي اليم وأنا سايب ايديها ؟
يرضيكوا أكون مكسور من بعد ما تسيبني
لو كل ده مبيرضيكوش
طب يرضي مين ؟
من يوم ما ماتت جدتي
أصبحت أنا
محسوب في كشف الميتين !

قصيدة : صاحبى الجدع .... بقلم الشاعرة أمل رماح

صاحبي القلم لما رسم روحي البريئه المذنبه
مكنش ناوي يكون طرف
وتطلعه بالنظره داعي من دواعي قد تكون فعلا ترف
محتاج يكون جسر التزام
وصباع جرئ للاتهام
طالب يوثق ف الحدث
صاحبي الجدع لما وصف
لما جرح نبض الورق لما سرق حبة قلق
وكشف حجابها وسترتها غض الطرف
ونده علي حد السطور وطلب يغطي اللي انكشف
العوره مش جسم البنات
ولاصوت مثير ولا مغريات
العوره يمكن ف الحروف
لما الكلام بيعري خوف
لما ينوح الطير على كتف الوجع
وانا صاحبي دايما كان جدع

قصيدة : نقول تانى ... بقلم الشاعر محمد أشرف

نقول تاني 👇
الكل لمّا يتوجع
يعمل بدع :
فيه اللي يبكي / واللي يشكي
و اللي يسكت / و اللي يحكي
واللي يصبر / واللي يهجر
و اللي يضعف ثمّ يقسى
واللي يقدر بكره ينسى
واللي يقدر يخفي ألمه
يقتل الأوجاع بقلمه
فيه اللي عاش بعد الوجع ظالم
و فيه اللي راضي لو يبات مظلوم
وانا لسّه بهرب مالوجع بالنّوم

قصيدة : شدى الرحال .... بقلم الشاعرة هاجر بدر

شدي الرحال فـ الحال وغني
صوتك حبيبتي الليله أهدي من النسيم
شديني ليكي حبيبتي فيا
مكسور فـ حضنك ببقي ميت مليون سليم
شدي الرحال يا حبيبتي لينا
وإعزفيني بـ نور عيونك
غردي فـ عيوني إني
لو بدونك مُـش هعيش
قلبي إلي شافك لما شاف
دُنيا تانيه بتفتح
قلبي إلي عمره فـ يوم ما خاف
خاف لما حسك مُفتتح
كل القصايد والأغاني والكلام
قلبي إلي عمره فـ يوم ما لام غير عـ الزمن
لامني عليكي الليله دي
وأديني اهو .. بدفع فـ بُعدك التمن
شدي الخطاوي الـ باقيه بينا
وأرميني فيكي لـرُبما
أخطو فـ عيونك سنه سنه
ألقاني بخطو فيـا أنـا
إنتي الهوا
إنتي الحياه
إنتي إلي بعدك مـُش بگون
الكون فـ كونك ألف كون
وأنـا البشر
إنتي إلي دايما مختصر
كل الحاجات الرايحه واليِ هتيجي يوم
إنتي أنا فـ شگل الغيوم
برد الشتا لـو دق بــابـُه
أهون كتير برده و عذابه
إلا بردك فـ الغياب
شدي الرحال يا حبيبتي لينا
مش مهم الليله دي
مين فينا سـاب 😌💙

قصيدة : على فكرة ... بقلم الشاعر عمرو البطل

على فكرة انا مش شيخ سجّادة
و لا لابس طربوش فوق راسي
و لا عندي التزامات و لا عادة
تقاليدكم دي تحت مداسي
أنا نفسي و بعشق اكون نفسي
و بشكّل عالم فـ. ضلوعي
إحساسكم خلّوه ينفعكم
أنا دايماً ماشي بإحساسي
.
أنا دايماً اعدّي على عيونكم
و شايفكم شايفينّي نشاذ
و شايفكم _قال_ مش عاوزينّي
أنا أصلاً مش عاوز اتعاز
أنا راضي بنفسي و مرضية
مش هعمل قلبي معدّيّة
ياللي بتحدفوا طوبكم فيّا
خدوا بالكم في قلوبكو إزاز

قصيدة : للاسف مابتتعلموش ... بقلم الشاعر أسلام الاسير

الرغى لاخواتنا البنات 🙋
"باختصار"
ما بتتعلموش!!
ولا خدتوا بالكم يابنات
إن الهوى فى بلادنا كدب
والحب كدب
العشق كدب
كل القصص راح تنتهى
وتكون كمان
خبراً لكان...
علشان عقولنا اتعودت
الحب شئ🙋
أما الجواز فده شئ كمان
متصدقوش!!
ان الرجال فى ارضنا
هيكونوا يوماً مخلصين
غربى الهوى
يعشق براحته وينبسط
هيدلعك
ويسمعك
فى الحب اجمل سيمفونيه
راح يبهرك بكلام جميل
إنك حلالى
وانك بتاعتى
وان انتى ليا
انتى حاجه من حاجاتى
تحت سقف المسؤليه
هيزيد فضولك
علشان يطولك
وهو عاقد الف نيه
للجواز من بنت عم
او وحده ملمسهاش فى يوم
مابتتعلموش!!
تتخانوا بدل المره الف
تنجرحوا الف
تتهانوا الف
والغريب لما بتتادووا الجراح
بتكونوا شايفين العلاج فى لسان جبان
او ندل بيطبطب بخبث
لئيم والفرص جتلوا لحده عنده
بتشوفوا فى ايديه الدوا
جاتكم اوا
ما ببتتعلموش!!
العمر يجرى وينتهى
وانتى مستنيه فارس
ييجى ياخدك عالحصان
فتقضى طول الليل الووو
واحشنى يوه
مشتاقه يووه
مش عارفه اوصفلك شعور
يا اختى اتلهى
اللى تاخده القرعه منه
تبقى تاخده ام الشعور
لو ترنى مره وحده بالغلط
فى وقت مش معتاد عليه
راح تلاقيه انتظار
مشغول فى ايه ؟
لا ياقلبى ده كان حسام
او كان سعيد
والله كداب البعيد
كان على الخط انتصار
او ريهام...
او كان بيجنى ثمار شقاه
لما ردت ابتسام
متصدقيش
ان صورك كان حاذفها
وان كل الشات ديليت
متصدقيش
انك وحيده مهما قال
وان الجمال
مخلوق فى روحك انتى بس
وانه كان مشتاق للمس
وانه لما مشى ايده
فوق ايديكى صابه مس
وانه اول مره يلمس جسم بنت
كداب يا بنت
والله كل كلامه كدب
واسطوانه اتدشدشت
ماهيش مشروخه بس
انتى زيك زى غيرك
حبتيه
او حسيتيه
لو لسه فاكره ان سرك
راح يخلل جوا بيرك
هو بيره للصحاب
راح يوردوه..حتى لو مش عطشانين
هما دايما كدابين
ودى الحقيقه باختصار
بس انتو ما بتتعلموش