قصيدة : يا سيادة الريس ... بقلم الشاعر محمود مجاهد

ي سيادة "الريس "
اسمعنى كويس ..٠
انا وآحد من الشعب الغلبان
انا وآآحد اانتخبك علشان ..
كان فاكر نفسه هيعيش ف أمان
انا واحد عشت آآتمنا ..
إن مصر تبقى ع ايدك جنه
وأتريك بتعيشنا فى نااار ..
وبنيت حولينا من الغلا آسوار
وهدمت كل « احلامنا »..!!
ي سيادة الرئيس ...
انا واحد من شعب "رخيص "
...عايش بره الفلم
وبيفضل دايما ف الكوليس ..
علشان مش عارف يحقق حلم ٠
وبيصحا دايما ع كوبيس.. !
الاول/كام واحد مات ف "رشيد "..!؟
التانى/ كام واحد مات ضحية دبح ع ايد
واحد متحكمش عليه ...!!؟
دا عشان سعاته يبقى أبن بيه
وماسك حكومتنا ف ايديه ..٠
ي سيادة "الريس "..
اسمعنى كويس ___..
وبعيد عن الوجع اللى ملينا
انا جااى اشكيلك واحكيلك
واقلك:بكفياك تدمير فينا
وكفيا زياده ف الدولار ..!!
شعبك ي ريس محتار ..
شعبك ي ريس هيس ..
من كتر غلو «الاسعاار »..
والامراض اللى انتشرت ف بلدنا
ومبقناش لقيين نئكل "أولادنا "..
ودمنا الاحمر .. مبقاش احمر وعكر
طب وحيات النبى ي ريس ؛؛ ..
لتهدى شويه ف سعر «السكر »

قصيدة : وبدعيلك ... بقلم الشاعرة بوسى محمد

وبدعيلك...👐
بخالق روحي والتجاعيد
دعاء متوضي بالنية
لا يوم تفارقني تبقي بعيد
ولا غيرك يكون ليا
دعاء مبعوت...
لرب الميتة والحية
صراط الروح
وريد شبعته حنية
دعيت الله
يا أدم ليك...
اكونلك حوا أبدية
وأكونلك ورد ف ايامك
وأكونلك ورث ووصية
واخر دعوة كات بتقول...
يا رب ارحم حبيبي ان ذل
وسدد عنه خطواته
الي محنيه
وبحه صوته يوم ان مل
تفتح سكته بايه
و دعوة سبقها يوم بيا

قصيدة : عكس الاتجاه ... بقلم الشاعر مصطفى النجار

غوص
متخافش م الضلمة اللى تحت
غمض للحظة جوه منك هتلاقيك فتحت
واغلط وقول آسف
والبس حزام ناسف .. فجر دماغك بيه
واكفر بكل الكفر
هتلاقى فيك إنسان .. عارف بيكتب ليه
خليك كما العملاق
شايف جبال الدنيا .. كومة تراب ف عنيه
والشمس كورة ف إيدك
واللمز .. مدح .. يفيدك .. والنقد enjoy فيه
بص ف مراية وقول
إنك the only one
وانك عمر مختار
خلى ف جهادك فن
واياك تخاف من حاجة .. ان شالله حتى الموت
دا الخوف تملى يموت .. والموت ؟ تملى يفوت
فنقول ب جهل يشلك
'' مكتوبله عمر جديد ''
خلى الرتابة تملك
خلى الملل تجديد
كسر تابوت العادة
أو هيكل التقليد
واتعلم الأوزان .. واكتب ومن غير وزن
والقافية لو هتبان .. لبسها شال م الحزن
عيش فى البلد أو هج
بس اوعى تستشيخ
شوف الكفن توب حج
روح بيه على البرزخ
اخطف كلام وتعالى .. وارفع فى راسك فوق
إياك تطاطى وتسأل .. ليه الفشل مخلوق ؟؟؟
واعرف بإن الحكمة
شىء مبنى للمجهول
فالناس ماهياش فاهمة
إن الحكيم معزول
عن شهوة الدنيا .. فالدنيا بتميل له
والعاشق الهيمان .. ب تسيبه وتمله
فملخص اللوك لوك :
ماتعيشى زى البغل !
تاكل تنام .. أو تحزن .. وبتشتكى فى العقل
الحكمة هى إنك ...
***
'' مصطفى .. مصطفى .. إصحى عشان الشغل ''
***
حاضر .

قصيدة : محصلش خير ... بقلم الشاعر محمد الشيخ

محصلش خير
علشان مكانش مابينا غير
حبة حاجات متلخبطة
محصلش خير
ولا كان مابينا يادوب كلام
مكانتش غلطة والسلام
مكانتش جزمة فى وسط زحمة
بدون ماتقصد دوستها
ولا خبطة واردة لحاجة راقدة
في نيش صالتكوا لمستها
محصلش خير ...
وسط الردود
كان فى وعود
مابينا أقوى من العقود
ومكانش فيها بنود تقول
ان انت ناوي ف يوم تبيع
هتبيع لمين؟ وتبيع بكام؟
ذاك الحمل مابقاش وديع
فبلاش تصيع قبل السلام
قُصر الكلام .... محصلش خير
علشان ماعادش ماببنا خير
ولا عودت ضمن الترتيبات
ولا حتى فى السطر الأخير
فبلاش تعود زي الوتر
مشدود ف عود
دار الزمان على أصعته
قام انكسر
كان إيه صدر ؟؟
من صوته بعد اما انكسر؟
غير خرخشة ريشة فى أوتار مبهمة
كات روح وطلعت للسما ..
كان عود حياتي اللي إنكسر
مين إنكسر غيري أنا
محصلش خير
ف بلاش تعود تاني هنا ...
محصلش خير علشان مكانش مابينا خير ...

قصيدة : النخل ... بقلم الشاعر خلف جابر

النخل..
بيبص دايمًا ع البيوت من فوق
إكمنّه أقرب للسما منهم
هو اللي عارف سرّهم
الجوع رسول بيردّهم لله
علّمهم ..
يشق صدر الريح
ويكون مسيح
بيحب أعداءه
لا ينكسر لكن..
ينحني لله تواضع
النخل لسه بيضربوه بالطوب
رغم انه حافر مكان في جلده للي طالع

قصيدة : بصيت مرة ... بقلم الشاعر أحمد رضا

بصيت مرة ف المراية بكيت
انا شفت وحش بينده العفاريت
وحيطان بتترقص وتقلب نار
شبابيك بتتفتح قديم وجديد
وعنيا غنولي وملامحي سكوت
وايديا بتطبل علي الملكوت
فسرلي ياربي دة ايه المكتوب
واوضع لجرحي دة مكان له حدود
بصيت لقلبي ف المرايا ضحكت
الفرحه راحت لما راح للست
والدمعه نزلت لما مات واتسبت
وانا لسه بجري له بعزم الشوط
بصيت مرة ف المرايا بكيت
علي عمر واتبعتر ف لحظه وراح
علي قلب اتمرجح علي الاوجاع
وضلوع بتتكسر عشان حبيت
يلعن ابو دة الوجع يا شيخ
كل المشاعر كوم
كل المدامع كيت
اما الوجع دة كيت
شاب المرايا رغم اني بشيخ
وشي بيضحك .. رغم اني بكيت
رموشي بتداري ف نزيف الروح
وعنيا بتفضفض كلام مكسور
وايديا بترسم نار كتير وجروح
والدم بيطرطش م القليب منثور
يادي الوجع .. ليه الدموع بتزيد
ليه المشاعر ناقصه فيا حاجات
رغم اني بصيت للمرايا بكيت
ولمحت وحش بينده العفاريت

قصيدة : النص ... بقلم الشاعر عزيز محمد

النص ده
مكتوب عشان نفسى فقط
على غير ما عودت الحروف
النص ده
بيشوبه بعض من الأنا
والإيجو عالى انانى جدا والذاتيه المفرطه
حتى القناع منى سقط
وسط اكتتاب النص بالصدق المزوق بالنفاق
وسط اكتئاب مبنى على لعن الظروف
وسط التسلى باللى فاضل من حزين
وسط التخلى عن بواقى حد كان جنبى فسابنى م الرفاق
وانا بحلى دنيتى
بصورته وانا بحضن ضلوعه بقوتى
فاللقطه تيجى ووشه بيشوفنى تملى يشبهه
لما المصور كان حقيقى مش هناك
دمر هياكل كسرتى
علّق ف رقابيها المعاول جنب فاسه وثم قال:
النص ده
مكتوب عشان نفسى فقط
بيشوبه بعض من الفجور
والبعد عن حد التبرك بالقبور
والبعد عن مد التمسك بال(يوتوبيا) الافلاطونيه الزائفه
والبعد عن شد الحبال الخائفه
من خيط ضعيف رابط ما بينى وبين (حراء)
وبشر كتير واقف مقلّق وسط أجناس الطابور
وانا بدّعى
انى خلاص
قربت من لمس العرق
لما ينقّط من جبين سيدنا النبى
فالقى الحروف طرحت –جزافا-مذهبى
عيل غبى
ازاى اكون عيل مثالى وانا مفيش ابدا معى
غير حضن اخلاق استلفته من أبى
وقت أما كان معنى السلف
اصلا حرام
وان التلف
ف الحضن بيؤدى لعلل
بعض الخلل
مطلوب ساعات علشان تحس الانبساط
والعزله احيانا بتيجى م الاختلاط
والضحك مفرخة العياط
واللى بيزعل من ثبات الأرض يتعكز على نوم البساط
واللى يخاف عقدة (أوديب)
يقتل شكسبير السبب
او يقلع البدله البذيئه ويفترش
أرض التواضع ويا أحلام البُساط
النص ده
مكتوب عشان نفسى فقط
على غير ما عودت الحروف
النص ده
بيشوبه بعض من الأنا
والانحطاط
والاشتطاط
والحَب ف السبحه سقط
قصدى انفرط
الحَب بيجيد الوقوع والانفراط
زى الدقايق وقت نومك ع السرير
وقت اما يبقى الحزن باهت او ساعات يظهر غميق
لما تجيد شن الحروب على مروحة استاند استخبت م الزعيق
من والدتك
من بطئها
نفسك تكون اسرع عشان تعرف تنام
والبطء اصلا مصدره
مش م الرِيَشْ.......دى مخدتك
البطء كان اصلا قماشها المعتبر
والقطن فيه جواه صبر
على زرع اخضر كان ماليك
واتبدّلت
فجأه -بغباوه -فطرته
لما انتويت تعمل كبير
وتنام على طول السرير
من دون ما تاخد حيطه من كدب الساعات
ع الحيطه وف طول المسير
والاحتياط
م الادعاء
انك بقيت الفيلسوف
يعنى التنقل من مراحل حد كان يشبه صبى
يبقى بلوغ يافع حدود شاعر غبى
فاكر بأنه (مُسيلمه)
وانه مَلَك طُهر الحروف
النص ده
اكبر دليل ع الاحتفاء
بالذات وقتل الانسانيه ف خصرها
والطعن من خلف القصايد او نميمه ف ضهرها
يمكن يكون اكبر دليل ع الانطواء
رغم انى واخد ع الزحام
والالتحام
بالناس ف اوقات الصلا
والناس صفوف
والله دايما كنت بسمع للإمام
لما يقول
"سُدوا الفُرج"
كنت افضل الساجد وراه
وقت الهرج
وقت المرج
واتارينى
فارقت الحياه
النص ده
حارج حدود السرب وهديل الحمام
وف عز ما كل البشر
تبقى تمام
ببقى انا
(حجَاج )جديد
(ابو جهل) متدارى ف قصيدة(البُحترى)
وأبو تمام
(عُمر) الفاروق
قبل اعتناقه للهدوء
بعد اختناقه م الفسوق
بعد اهتداؤه انه مفيش
عابد بدقن
ولا يعيش ساجد بتمتمة الكلام
والقلب جاحد بالإله
النص ده
مكتوب عشان نفسى وفقط
علشان افوق
من وهم اسطورة كيان
كبّرته من لحم الحرام
وانا حفظت من البيان
ان اللى من لحم الحرام مره نشأ
لازم تكون النار مصيره بالالتهام
النص ده
مكتوب عشان كل اللى شاف روحه بتشبهنى انا
يلحق يعود تانى لطين بدء النشوء
يلحق يسيب (سيلفى )مناسب لاحترام المرحله
يلحق يسيب وش المصور بالتزام المرجله
يلحق يسيب حبل ادعاء المشيخه
يلحق يسيب وهم انتساب المفرخه
يلحق يسيب
عيل مثالى لا هوه عاش دور (الفاروق )
ولا استمر ف دور براءة المعيله