قصيدة : وحيد وعايش وسط ناس .... بقلم الشاعر أحمد الحارونى

وحيد وعايش وسط ناس
ولا حد حاسس بالانين
مجروح واشكى لمين ياناس
معرفش ابكى وانوح لمين

الوحده بتقتلنى
ومحدش يؤاسينى
وحبايبى محاوطنى
وفراقهم على عينى
جنبى لكن فايتنى
ابكى بدمعه عينى
ولاحد يطمنى
ليه الكل ناسينى
انده مش سامعنى
والهجر بيأذينى
والبعد مجننى
ولا حاجه تقوينى
نفسى يقربوا منى
او حد يكلمنى
ليه دايما هاملنى
مبقاش حد يجينى
الوحده بتقتلنى
بدعى يارب يعينى
ياحبايب واحشنى
ولقاكم يداوينى

قصيدة : كل سنة وحبك طيب ... بقلم الشاعر أيمن بلال

تغيب وتغيب معاك الحياه
تفضل يادوب كام غنوة وأه
وحبة ذكريات منك هنا
تقول اليوم ف بعدك سنة
ونظرة عينيك لسه ف خيالي
تقوللي حبيبي صحي الليالي
وسيبها تعيش موالك وموالي
وشمعة حب عدت عليها سنة
ياقلبين اتجمعوا هنا عالعهد
حكاية ما عشهاش غيرنا حد
كان الزمن ربيع واحنا كنا الورد
ونسمة هوي تجمعنا وتضمنا
حبيبي ياللي من ضحكتك عمري
ياأحلي هدية كانت ليا من قدري
كنت خايف لا يوم تبعد وتمشي
واللي يفضل شمعة نقيدها لحبنا
ونبقي ذكري كانت وعايشة جوانا
تحكي اللي كان زمان من هوانا
بدمعة شوق للي عشناه سنة
كل سنة حتي وانت بعيد حبيب
كل سنة وحبك لسة مني قريب
كل سنة وهواك صعب عني يغيب
مكانك جوا قلبي من سنة لسنة
ياذكريات سنة عدت وسنة جاية
ياحب عشته وكان أجمل هدية
حبيبي لا لوم عليك ولا لوم عليا
كفاية اني عشت حبك سنة

قصيدة : شريط الذكريات ... بقلم الشاعرة شيماء الدالى

وشميت ريحه برفانه
وشريط الذكريات اتعرض
الذاكره رجعتنى لزمانه
واحساس مر اتفرض
بالحقيقه اتواجهت
وللعله اتوجهت
وطلعت مصابه بمرض
مريضه بحبه الباقى
اتاريه ساكن اجزائى
ساكن فكرى
وف دمى بيجرى
وف قلبى ليه اشواقى
وارجع افتكر لحظه جمعتنا
وكل التفاصيل ف سكتنا
افتكر البسمه ونظره العتاب
ولحظه اللقا بعد الغياب
ورساله حب جوا جواب
وليالى السهر
واحساس انبهر
بضمه لهفه وشوق غلاب
افتكر الزعل والتكشيره
اللى كان يسبقهم حنينى
نظره عنيه كانت تأشيره
تقدر للسعاده تودينى
وكلها ذكريات
وانتها ومات
القلب اللى كان بيحمينى

قصيدة : كل الحكاية .... بقلم الشاعر كامل ابراهيم

كل الحكايه انك غريب مش من هنا
مواليد بلاد الكل بيقولوا الجميع
وميعرفوش قولة أنا
ف المستحيل تلاقي حلمك وسطنا
لم اللي باقي ..
من روحك المستهلكه واهرب بعيد
ومش بعيد .. تلاقيني بجري وبلحقك
وبحلفك .. ترجعني تاني من جديد
لأني بعدك يا أنا ..
لأني بعدك يا انا عايش وحيد

قصيدة : عن 2016 ... بقلم الشاعر شادى مصطفى

عن 2016 ..
ياللى سيبتى ف روحى ذِكرى
من فرح محضون كآبه ..
من بشر زى الديايه ..
من كلام معجون بدم ..
وأنى فاكر أنى ندمان م الندم !!
وانى بفرح م العدم ..
وأنى أبسط م البسيط
وأنى عاقل مش عبيط !!
وأن نُص الشِعر باطل ..
وأنى عايش بس أناضل .. أو أكافح ف الحياه
وأن هذا الوقت عدى .. وأنت حالاً مش معاه !!
عن 2016 ..
لما شوفت الناس شوارع
واللى شافها يقولى بارع
ياللى وِقعت يوم ف حُبى
وأنت بردو مشوفتهاش ..
وأنها كانت مجرد .. صوره بهتت ف الفلاش
وأن هذا الحُب باش ..
وأنها غِرقت ف بحرى
وأنت صياد الغلابه ..
أيه اللى يمنع لو هقولك
أنت واحد م الديابه !!
عن 2016 ..
ف المدرج والمحاضره ..
كنت شايف بنت حاضره
عينها خضرا ..
وأنى قاعد بنش سابع
وأنتِ قاعده ف وسط شله
بس معرفتش أشوفك ..
لما جت قدام " فِشله "
زى حيط مرصوص قصادى
والمحاضره بسرعه عدت
صُدفه عادى ..
عن 2016 ..
زى ناس بيسيبوا فينا
كوم حاجات مصدر سعاده
زى توأم عاشوا فيا ..
زى عِشق إسكندريه
والسهر للصبح جايز
وأنى دايما ف النهايه
ببقى فايز ..
حتى لو خسران وناسى
وأنى بكسب بس " ناسى "
وأن جمبى أتنين صحابى
هما عندى الكون بحاله
وأن لو هخسر عشانهم .. طب ومالو ؟!
عن 2016 ..
من نوفمبر ف الدراسه
وأمتحان أول يناير ..
وأنى " لا أفقه ف ماده "
وأن هذا الترم عدى ...
وأنى بردو كسبت صُحبه
وأنى ناوى أبدأ مذاكره
وأنى نُص الليل يوماتى ،،
يبقى صاحبى وكُل حاله
لو ف يوم ف فكرت أسيبه
بردو بنطق " ده أستحاله " ؟!
عن 2016 ..
اللى عدت فيا تاتا
وأنها كانت بدايتى ..
والطريق لجل الشهاده
وأن فيها القهوة ساده
وأن فيها الحُزن عاده ..
وأنها أسوأ سنينى ..
وأنى لما أقعد لوحدى
همى فوراً كان يجينى !!
عن 2016 ..
لما كانت زى غيرها
وأنى بردو عرفت خيرها
وأنى حبيت أختصرها ..
من يناير أو ديسمبر
والحاجات الوحشه فيها
واللى شخبط ف الحكايه
وأنى لازم بردو أفكر ..
أنى أبدأ م البداية !!
النهايه ...

قصيدة : كل سنة ... بقلم الشاعر محمد عماد

كـــل سنــة و ضحكتــك دايمــــه ‎:-)‎
‏.
واللمعه فـــــ عنيكــي باينـــة ‏O.o
‏.
و قايمــــه !
جـــــوه قلبـــــي <3
‏.
و عايشــــــه !
ع حســـي و نبضـــي
‏.
كــل عيــد وانـت قريـب ---------> لقلبي
‏.
كــــــــل عيـــــــــــد : ‎:-)‎
و اـنت بعيــد عــن حضنــي
‏.
كـــل عيـــد : ‏‎:-(‎
و نــار الشــوق جوايــا تقيـــد
‏.
كــــل عيـــــــــــد :: ‎:-/‎
والبعـــد مـــا بينـــا بـــ يزيـــد ^_^