قصيدة : الضِحكة سيف بَتَّار .... بقلم بركان الشعر محمد عبدالرازق

الضِحكة سيف بَتَّار
و الرِمش جَنَّة و نار
و العين لَيالى شرود
بتلاقى ألف نهار
و الصوت
مَلايكى حَرير
ناعِم
بشَكل مُثير
ما احلى الطَبيعة يا ناس
من غير شِوال بودرة
و لا روج و لا مونيكير

قصيدة : عازف المطر ...... بقلم الشاعر العامى حسن توفيق

أنا قلبى زى المطر

عاشق البستان

الخطوة فى ضى القمر

تساوى زمان

الخضرة حافْظة عنوانى

والشجر هيمان

الكلمة أصلها حروف

والحرف نبع حنان

أنا قلبى زى السحاب

بيطير ف الهوا

والنبض كما ضى النهار

السر ف الهوى

النخل عالى ..الفرع جميل

والأصل ف النوى

أحضن النسمة ..

أغنى ..

ولحنى كان دوا

أنا قلبى غنوة أمل

تتقال ع الكمان

لونك أخضر يا زرعنا

والصحبة ريحان

ساكن جوة الذكريات

والنسيم حيران

تضحك لى نجمة شقيّة

والصوت كان جنان

أنا أجرى فى مكانى

وقاعد ف امتحان

تدور الريح حواليا

والشراع إنسان

تعالى نسبق الزمن

ونشوف الأمان

تعالى نحضن المطر

ونرجّع إل كان