أقسمت بالمعوذَتيـن ..بَحبِك ... بقلم عمرو يوسف

أقسمت بالمعوذَتيـن ..بَحبِك
بَرقيكي من نار الحنين
وعيون بتصحي تبُصِلَك
قلبي الأمين لِساه بنبضُه بيوصَلِك
إحساس بناس مابطَمنشِ فـ غيابي الليالي
دفتر حضوري صليب بيعشق ضَمتِي
همضي وهبصم ضحكتك ،فوق كل كلمة قولتهالي
سعر اللي أدمن ضحكتك هروين بكام ؟
علشان أسَطّر طلتِك وانسي أوام !!
اللحن جوايا إنكسر والبُعد سام
والقلب كانتو حزين أصيل فـ القبضة والنبضة
ضميني حضني عنيد رافض بعيد يِهدَي !

تخاريف الثُلاثاء ... بقلم مصطفى منير

- سأكتبُ عنك غدًا في جريدتِنا..
- سيرفض رئيسُكِ المقال وقد تخسرين وظيفتَكِ..
- "الفوضى والمُتمرد الذي أحببته" ويرفضه!
- جنون الفوضى عدو الرؤساءِ وأصحابِ رابطات العنق، لكِ القرار ولي تحمل عواقبه..
- لِمَ؟
- لأنني من رسمتُ شعاراتً بطلاء أظافرِكِ على جدران مقرِ الصحيفة ك" الفوضى ترقص على جثث روتينكم"، ولوحةً تُعبِّر عن قلمٍ تنحني له الضباع والذئاب، أنا من جعلكِ تضربين زميلَكِ الذي حاول أن يتغزل بجمالكِ، أنا من وقف يُشاهد لكماتَكِ لتلك الفتاة التي نعتتْكِ بالرقيقة، لن يغيب عني هذا اليوم وقتما حضرنا حفلَ زفاف صديقتِكِ بملابسنا الرياضية!
- لقد أغفلتُ تلك الواقعة! سأكتبُها حالًا ولا تهمني النتائج..
- فليكن، والآن ماذا سنفعل؟
- سنقرأ قصائدَ أحمد مطر وأمل دُنقل كلها...

لو عاوز تريّح دماغك .. عليك بإتّباع الآتي : ... بقلم الشاعر مصطفى ناصر

لو عاوز تريّح دماغك .. عليك بإتّباع الآتي :
----
- فَضفَض لـِ الحيط ..
بيع الّلي يبيعَك و البَادِي
هوَّ اللي حَوِيط ..
إسأل عَ الناَسْ انتَ الأوَّل
بس ماتنساش ..
من بَعد ازّيك هَتفاجئه ..
بـِ ليه مابتسألش ؟!!!
- إهرَب مـِ الواقَع احسَنلَك
خلّيك فـِ القَلش ..
- اقفل تليفونك و إن سألوك
فـَ العيب فـِ الغالب " في الشبكات "
- البِس وِشّين بدّل فِيهُم
و الوشّ التالِت لـِ الأزمات
- هزّر اوقات الضحك " بسيط "
- هزّر أكتر اوقات الجَدّ ..
قرّب من الناس جدّا و اعمل
بينك و مابين اقرَبهُم سَدّ
- إعمِل بتحِب " مُنير " جدّاً ..
و بتفتح عينك على " فيروز "
- شوف أي مكان فاضي فـ قلبك
علّق يافطة .. و اكتِب مَحجُوز
- ايّاك عَقلَك مرّّة يهفَّك
و تخُش جِدَال مَع حَدّ كبير
- اسرارك تِرميها فـ وَرقك
كُل الاصحاب سادّين " البير "
- سيبَك من اي حوار جادّي
و اهتم بـ أي كلام فاضي
- كشّر لكن ورا باب اوضتك ..
و اضحك قُدام الناس .. عادي
- ابعد عن اي شعور ساذج ..
بيقولوا عليه فـ بلدنا الـ " حُب "
90 في الميّه من الاشخاص
اللي احنا بنعشقهم .. " فوتوشوب " !

محل بقالة

" محل بقالة "
- لو سمحت مفيش فاكة 200 ..؟
= لا والله باباشا مفيش ..!!
" محل جزارة "
- لو سمحت مفيش فاكة 200 .. ؟
= لا والله يا ريس مفيش ..!!
" سنترال "
- لو سمحت مفيش فاكة 200 ..؟
= لا والله يا حاج مفيش ..!!
" مطعم "
- لو سمحت مفيش فاكة 200 ..!
= لا والله ياصاحبي مفيش ..!!
" محل البقالة الأولاني "
- لو سمحت عايز واحد مرقة دجاج بربع جنيه ..!
= عايزها ماجي ولا الترميلة يا أستاذ ..؟؟محل بقالة

قصيدة : اوعاك تنسى ... بقلم الشاعر عبدالرحمن محمد

اوعاك تنسى ..
ان الفرحة مهما تزورها
و تحلف لها تفضل وياك
بعد ما فعلا تاخد دورها
الحزن يدوس يقفلها معاك
علشان كدة دنيتنا غبية ..
تديك ال 1 % ..
و ال 99 يفضلو جواك
و تفضل داير جوا دواير
و تقف و تطير
ما الدنيا تلاهي و ملاهي
و كلنا طراطير
الحق لك يوم ولا اتنين منها
قبل اما تقابلك باَخرها
و ساعتها ان قمت و تعدلها
هتبيعك فعلا و هتنساك !

قصيدة : بغض المظهر ... بقلم الشاعر احمد جمال

بغض المظهر الجذاب
ولون القلب من جوَّا
وغض ان البكا أسباب
وسببه هو أو هي
وغض السن وتجاربه
وغض البُعد وتقاربه
جوَّا عيونها حنّية
تساوي من القلوب غيّة
حمام محبوس ونفسه يطير
مابين أرض وسما وكام قلب
بغض الهيبة والطيبة
وغض إن الغزل عيبة
لكن فيها كتير يتحب ..

قصيدة : ما تصلى بينا ... بقلم الشاعر محمد جاد

ما تصلى بينا
عاللى هيشفع فيك ..
صلى كمان مره كمان أكتر ..
سقف وناول سبحةّ الدرويش ..
أكسي همومك بالعبايه الخضرا والعِمه ..
نادى الفرج يفتح لك الئمه ..
أنا كُل ليله بسمّع الأندال تواشيح وذِكر الشيخ
فحضرةّ الزمه ..
ما بتسلانيش الأهه
ولا التوهه ولا الكُربه ..
لكن بخزن دمعي فجيوب القميص
واوزع ضحكى عالصحاب جهراً ..
عايش بسرب همى بين الشيش ..
ميت بطولى إن سِيبت ما تفوتنيش ..
أنا كل حُزنى مغطى بيه النيش
دبدوب قلم وهدايا ملفوفه بوجع معجون تُراب ..
اتنين صحاب متجمعين على جوف طبق ميلامين
مشقوق بعرض الرف ..
وإشاره سودا فوق جدار عازل
صوره لملامح طيبه
مدفونه من تشرين ..
فيها ابتسامه لأبويا قبل الروح
م تسلم ايديها لورقةّ الصحه ..
الصحه فالنازل
وانا طالع أشيل فيها
ترميني عالسلم ..
ماسورةّ مايه مكسوره
فأول درجه تلحقنى ..
احط اديا تحتيها
وأشيل فضفضتى لعنيها ..
تفلتر دمعى عالجنبين
ترسب فيا ما بيا وتسأل مين ..
أتارى البيت معريها بفيض فضفضته طول الليل ..
هموم الحيطه لو تنطق تقول خفف عليك الهم ..
تهون البلوه على نفسي
ويصعب حال جدار إتشق ..
نهايتُه القول
بلاش الخبط عالمسمامير فنص الشق ..
دى أضعف خبطه م اللى قريب تضيع ألف مليون حق ..
وهون غُربتك بحكايه او باتنين
سمعت هموم كتير م الناس
فـعز الخنقه قلبك رق ..
ده عِزم الخبطه
مش بالدق ..

قصيدة : قَلبني ما حيلتى ... بقلم الشاعر العامى محمد الشيخ

قَلبني ما حيلتى
غير همى وجفايا
خَدوا مني ما إدوني
غير كرُهَ جوايا
بلدى تساع الكون بجلالته
إلايا
علشان بقول الحق
وأصحح الأوضاع
شقولى فيك 100 شق
ينتج مابينا صراع
إدينى حضن يساع
قلبى الملان أوجاع
مش بحكى عن حالى
ده انا الف شاب وضاع
اول ماحب اتباع
قرر يخون روحه
ويحبك انتى فصاع
و إن كان لحبك تمن
ف أنا أغنى واحد جاع ..
انا شاب شاااب بدرى
شب اتملى بالشيب
كل اللى ليك حقك
كل اللى حقى أنا عيب
يرضيك ياعم شبيب
شعرة شبابي تشيب
ويقولوا كله نصيب ..
أرجوك ياعم شبيب
وظفني في الدولة
إخضعني للتدريب
أنا إبنها وأولى .....

قصيدة : هى .... بقلم الشاعر المبدع حسن محمد

الدنيا مش غيه
ولا قلبي سرب حمام
علشان اطير فوق فالسما
والف علي كل البنات
اغزل جدائل شعرهم
فلنفترض ان اللي فات ده لو يكن
فلابد حتماً ان اكن .. مخلصلها
واعقد ضفاير شعرها .. جوه الوريد
فلنفترض ان انا شاعر كبير
والمعجبات كترم كتير
بقي عندي حفنه من البنات
بين هااااح وهيييح :-D
ده لو صحيح .. ولا يفرقوا عندي بشي
راح اقولهم
ان انتي ست الدنيا دي
وست قلبي / وستهم
والغيره تقتل قلبهم
هيموتوا شهداء نظرتي
ويخشوا طبعاً جنتك
وهتفضلي وحدك هنا
دي النظرة منك كلهم
يا مجمعه كل البنات فوق ضحكتك <3
فلنفترض ان انا هبقي الرئيس
مستغربه ايوه الرئيس
هجمع جميع الافئده
وهقولهم علي فكرة "مايصحش كده" :-\
بتغيروا ليه مش ذنبها
اكمنها اجمل كتير من وردكم
طب م النهارده قرار رئيسي
تفرض ضرائب ع اللي غاوي يبصلك
اعدام لكل العشامنين في محبتك
سجن انفردي للي يقطف وردتك
نلغي النشيد ونجيب مكانه ضحكتك
اه لو بايدي اسرق الليل والنجوم
واحطهم بين حجرها
اكمنها غاويه السهر
واحط صورتك ع القمر
اسرق من الناس ضيها
علشان محدش يلمحك غيري انا
هي الهنا .. ريحة الحواري
والبيوت الضيقه والامكنه
الغيه و النيه و العمر و البرهان
في الاوبر لحن كمان / يعزف فاغنيلها
كل البنات لو "مصر" / فالبنات دي نيلها

قصيدة : امتى نصحى يا عرب ... بقلم الشاعر كرم محمد

امتى ح نصحى يا عرب
امتى امتى امتى
امتى حيبقى لينا صوت
امتى الخوف فينا يموت
امتى امتى امتى
امتى حنصحى يا عرب
امتى امتى امتى
ضيعتوا امجاد حطين
و خدوا منا فلسطين
ردوا و قولوا باقى ايه
من العز نبكى عليه
ردوا و قولوا يا عرب
امتى امتى امتى
عايشين جوا الذكريات
و العز فينا مااات
حتى عرض البنات
داسته الدبابات
اصحوا و فوقوا يا عرب
اصحوا اصحوا اصحوا
كل يوم بتضييع بلد
و نفضل نبكى على الولد
اصحوا و فوقوا يا عرب
ضيعنا زمان بغداد
و سبنا عقولنا للموساد
عمالة تلعب بينا
و في الوحل تودينا
اصحوا وفوقوا يا عرب
اصحوا اصحوا اصحوا
اخر نصحية حقولها لكم
قبل ما الفرقه تضيعكم
أنسوا كل خلافاتكم
و إلحقوا يمنكم
و أوعوا تنسوا سوريا
رمز العزة القوية
حرروها من الطغيان
و من الفرس الرومان
اصحوا و فوقوا يا عرب
اصحوا اصحوا اصحوا

قصيدة : تلات فساتين ... بقلم الشاعر أحمد ابو العنين

طربوش متعلق فـ الفتارين
و تلات فساتين
بتحاول تغري عيون بدلة
ببيون مقموص من روج متساب
على خد الياقه المنتوشه من ايد واحدة
بتحب فـ واحد عاشق واحدة تحب فـ واحد مش فارق بيحب فـ مين.
و تلات فساتين
بتحاول ترقص لـ الدنيا
هاخد من وقتك كام ثانية....
اول فستان ..
كان يشبه فساتين السهرة
سواريه من فوق
عقد و حلقين / مش فاكر كانوا ألماظ أو فالصو
يمكن عيني مكنتش مركزه غير دلوقت
لكن اللي شاددني فـ هذا الوقت
انها مع مين ؟!
ليه حاضنه فـ ناس / كات حضنه أساساً ناس تانيين
الكل بيرقص مش فاهمين كلمات التون
روحها معايا بتبهت فـ اللون
و انا قلبي عجيب / فـ العشق النبض يكون هايج
- نزلت الطلبات فـ هدوء ساذج و تركت النيل حاضن عينها -
ايه يعجب اصلاً بنت الليل
غير واحد بـ فلوسه فَتنها
فـ المشهد ده / كنت الجرسون
و مكنتش أملك في تمنها ..
فستان اتنين :
كان يشبه فساتين الكارتون فـ حكاوى الجد الأزليه
مجنون بيثور ع الدخلية
علشان ملقاش أوضتين بمنافع تكفيهم و تدفيهم من شط النيل
من غير تفاصيل / سارح فـ ميدان التحرير
بنشارك ليلنا ف كام مانديل علشان بيدمع على شهداء طلعت قنديل
- بحبك
* مش قولتلك روح
خرطوش و قنابل / سيل ف جروح
الليل بيعيط ناي مبحوح
- بحبك " كان فارقها الروح "
الدمع بينزف ع الفستان.
- مشهد لـ كلاب الدخلية بتخش ميدان و بيضربوا نار على خلق الله -
و ايديا فـ ايدها و بنغني - الليل و سماه / و نجومه و قمره -
و فضلت انا بعشق بوح سهره
كان فاضل يعني يدوب سنتين
و نخلف بنت و يجي ولدين
لكن الدخلية محبتناش_
تركت فـ رصاصها بيحضن نبض عيون الحور
ملحقتش اقول :
لو كنتي فضلتي يدوب سنتين
يمكن هنغير ف الفساتين و انا هلبس بدلة عم امين
علشان معيش تمن التأجير
لو كنتي بخير / كنت ابدا اضحك لـ الدنيا
لكن الدخلية محبتنيش..
كسرت بزعيقها ازاز النيش و رمتني فـ أوضة بمنافعها
فـ فضلت انا حاضن في التلفون
مستني مكالمة روح كارتون
فستان مجنون / اتمنى يكون لـ ملاك غيرها
قبل اما يجس فـ مفاتنها
النبض بيهتف للأحرار
انا كنت ساعتها من الثوار
بهتف فـ كلاب الدخلية ..
- ليه رصاصكم مش راضي يفوت فيا
تالت فستان مبهج بجنان :
عمدان الصالة بترقص على احزان أنغام
زغاريط و هياص / على رقصة سلو
- عينِك حلوة
* دقنك احلي
" بيوطوا عليه اتنين م العيلة و عينهم بتعيط سهوه "
- جدك تعبان
الكادر فـ لحظة يكون بهتان
بيسيب المسرح للحكام
بتطمن ايده بـ كله تمام
ف بيجرى اوام علشان ما يفوتش فـ روح جده اخر جولة
و محاولة بتقتل ف محاولة.
- اوعاك تمشي
* انا قاعد على قلبك يا عبيط
- مين تاني هيحكي فـ قصص العيد
و انك جرسون و الثورة يموت فيها كام مليون
فساتين كارتون / عيل مجنون
بيحب فـ واحدة بتعشق واحد حاضن واحدة بتحضن اصلاً ناس تانيين
- هتسيبني لـ مين
-..............؛
انا واقف ع الناصية التانية وسط المجانين
و عيوني بتحضن فـ الفتارين و تطمن ايدي فـ فساتينها
ببيون بيدمع روج مشنوق
و صراخ مخنوق خارج من بدلة عم امين
بضحك و بعيط بني آدمين.
و الخلق بتصرخ مش فاهمين
ان الفساتين كات خلق أساساً مش عايشين ..
ان الفساتين كات خلق أساساً مش عاشقين.