قصيدة : اشتاق اليها ... بقلم الشاعر سيد البدرى

اشتاق اليها!!!!!!!
نعم اشتاق اليهاااا
وهى تسكن اعماقى
هى وطنى وهى سكنى
تسبح فى اوردتى عابثة
تتراقص بين النجمات
تشبهنى كثيرا فى لونى
تقتحم سياجى فى
لحظة صمتى
حينا وحين تعزف اهاتى
تنتزع وقارى تزلزلنى
تقذفنى فى
اعمق هفواتى
اركض خلف جنون تسكرنى
حين اراقصها واراها تمسح عبراتى
هى انتى سيدتى فيروزة
تسكن اجمل صدفاتى
اراها فى عنيكى وفى
كل عيونا الستات
ابحث عنها منذ ولدت
ترتسم على سطح النهر
وتطير كفراش ساحرة
ترتشف رحيق الزهرات
او تبدو كسراب شاردة
الاحقها خلف الربوات
فاذا ما اجهدنى الوهم
ادركت انها تقبع فى ذاتى

قصيدة : بعد الفاصل ... بقلم الشاعر الغنائى محمد الزغبى

ولكن بعد الفاصل
هنرجع تاني ونواصل
ونتكلم ونجرح
في اقرب الناس

ونتعلم ونفرح
في جرح كل الناس
نقول على طول
ازاي اتكلمنا
ازاي اتعلمنا
نكمل تاني فقراتنا
نجيب في سيرة الناس
نسيب ضمايرنا والاحساس
من بره وشوشنا
مين يقدر ما خلاص
مفيش بجد اخلاص
مين يقدر يحوشنا

قصيدة : تمانية الصبح .... بقلم الشاعر شادى محمد

الساعه تمانيه الصبح
في البنك بحط فلوس
فـ لقيتلك مين قاعد !
عم أحمد أبو محروس
ع الكرسي فـ اخر الصاله
و يمين ع الحَرف ..
و الأغرب كان بيعيط
و يبُص لظَرف ..
سَلِمت عليه - بصيت فـ عنيه
شوفت الحُرقَه ..
فـ مقولتش - مالك -
- أزيك ؟
- عامل إيه ؟
- أحوالك ؟
إبنك محروس الواطي
تقريبا ماسألش عليا
من اخر مره انا شوفته
فـ إمتحانات الثانويه
عم أحمد باصص فـ الأرض
و بصوت بيتهته مِتقَطّع ..
- محروس كان زي الورد
وصلاته الفرض بفرض
كان ضَهر و كان عُكّاز
في يناير قاللي أنا نازل
ورجوعي يابويا مجاز
دي العيشه بقت فـ النازل
والواحد جايب جاز
ماكدبش عليك ..
ساعتها مكنتش خوفت
علشان إمبارح شوفت
المشهد ميِّه الميِّه
و مذيع بيقول سِلميه
محروس طوّل فـ الغيبه
وقلقت أنا و إتخضيت
أيام بتجيب فـ سنين
محروس مارجعش البيت
و أهالي كتير زيي إتسابت
دوّرنا فـ كل مكان
و كعوبنا إتنحتت دابت
يوماتي أروح القسم
كالعاده - أدينا بنحقق
جدران البيت تتشقق
و انا عايش جوا زمان
و بشوفوا فـ كل مكان
و البيت بيضيق بيّا
لحد إمبارح - رنّوا عليا
إبنك محروس فـ البنك
بصيت مِستَغرَب للتليفون
صحيت ماغسلتش وشي
و جريت زي المجنون
محروس باعتينوا فـ ظرف
عليه كام جُملِة تَعزيه
و حاطين جواه كام ألف
- عَم أحمد حَسّ الفُرقَه
و عيونه بتبكي بُحرقَه
و أتكَلِم مهما أتكلم
عم أحمد سرحان مش سامع
أول ليله ينام فيها
و عارف محروس مش راجع
أخر مرّه يصلي الفجر
و الصبح يصلّوا عليه فـ الجامع

يا كل من له شهيد
وسط العبيد حَسّ
مكتوبله عُمر جديد
و الموت ورق بَسّ
خُدلَك كاسين صبر
حق العيال جايلك
و إحفر كمان قبر
لو قَبرُه مش شايلك
يا كل من له شهيد
مستني ليه ديَّه ..
أصبح شهيدك فانِ
و الموته مَنسيِّه ..

من مذاكرت حمئه .... بقلم الكاتب الساخر محمد راضى

-- حراااااااااامي
- حرامي مين يخربيتك؟ انا بابا نويل
-- قريب احمد نويل؟
- احمد نويل مين؟
-- احمد نويل.. اللي واخد جايزة موبيل
- تقصد احمد زويل اللي واخد نوبل؟
-- ايوة هو دا
- لا مش قريبه
-- انا قولت كدة برضه.. هتكون قريبه ازاي بطربوشك الاحمر دا.. ومال دقنك طويلة كدة ليه؟
استنى كدة.. انا عرفتك.. انت قريب ابو بكر البغدادي، بتاع داعش.. يا بتوع داعش يا ولاد الكلب، خربتوا البلد
- داعش مين يا عم هتودينى فى داهية؟.. انا بابا نويل بتاع امريكا
-- كمان بتاع امريكا؟.. يا امريكان يا ولاد الكلب خربتوا البلد
- يابني افهم.. انا بابا نويل بتاع العيال الصغيرة
-- بتاع العيال الصغيرة؟.. لوطي!.. ياشواذ يا ولاد الكلب خربتوا البلد
- شِتّ.. يابني انا اللي بجيب هدايا الكريسماس للعيال الصغيرة.. انا بابا نويل اللى بنزل من مدخنة البيت احط البتاع واخرج تانى
-- تحط البتاع وتخرج تانى؟.. وبتقولها كدة عادى؟.. يابجاحة امك
- اقصد احط الهدية يا عم.. بقولك ايه.. انسى كل اللى فات دا، وانسى انك شوفتني.. انا هخرج دلوقتي وهنط من الشباك تاني -عشان مفيش مداخن فى بيتك- واول ما تشوفني إندهش.. بص، انا جاي احقق طلباتك، فـ اتعامل معايا على اني عفريت
-- بس انت مش عفريت؟
- لا يا عم عفريت
-- عفريت؟.. يا شياطين يا ولاد الكلب خربتوا البلد
- شَتّ.. يابنى انجز بقى شوف هتطلب ايه؟
-- لا انت اللي تطلب لانك ضيفي واحنا فلاحين لا مؤاخذة وبنفهم فى الاصول
- يا بني ادم افهم.. انا بابا نويل، وانا اللي معايا شوال الهدايا، وانا اللي بحقق الامنيات مش انت
-- ايوة بس انت فى بيتي ولازم تطلب حاجة.. انت عاوز تزورنى الفجر وتمشى من غير ما تاخد واجب الضيافة ولما ترجع امريكا تقول عالمصريين بخلا؟ عاوزين تشوهوا سمعة مصر يا ولاد الكلب خربتوا البلد
- ديكك على ديك البلد على ديك الشغل.. بص.. ادي شكارة العدة *بيفضي اللي فيها عالارض* وادي الدقن اهي وادي الطربوش *بيقلع الدقن يحطها جوة الزعبوط ويرميهم فوق الهدايا* وادي الجاكيت الاحمر اللي مزعلك *بيرميه هو كمان*
-- ........؟
- شايف الكوم دا؟.. ادي كبريت *بيولع فى كوم الهدايا*
-- بتولعوا فى مصر؟ يا ولاد الكلب خربتوا البلد

قصيدة : عدت سنين ... بقلم الشاعر أحمد المغربى

عدت سنين من عمرنا
عدينا منتصف الطريق
٣٠ خريف و مكملّين
الباقي ضيق
ثورة شبابنا من الهلام
و أهل الكلام ليهم بريق
و عشان برئ
قالولنا لسة مكملين
و اصواتنا هترُج الميدان
و قالولي أوعى تكون جبان
خليك جدع
صدقت وشوشة الودع
و الدم سال على وش اخويا و غرّقه
و حلفت عمري ما عُدت تاني مصدّقه
يامّا السنين
بتعدي فينا تسيب جراح
على كل ناصية ف قلبنا
و مفيش براح
سُكّرنا داب
و دواب بتسرح أكل ف غيطان البلد
ياما الولد مبقاش ولد
و الشيشة سرحت ف البنات
"ست البنات "
خنقت عيالها ع الفطار
سلكت مسار القتل و التهجير
يامّا الغفير عملوه وزير
و ممسّكين القط مفتاح القرار
٣٠ خريف
مفيهومش نسمة ترد روح كل اللي مات
وأنا جيت خفيف
الدنيا و هغادر خفيف
و اختم حياتي بالسكات

قصيدة : عام جديد ... بقلم الشاعر محمد كحيله

قطر السنين غاب حبتين
وتركنى وحدي على الصراط
دمع الحنين دول دمعتين
واهو كله فى الآخر عياط
عدي الحزين رايح لفين
مشوار نهايته اكيد سكات
اولها جاي الدنيا تبكى
وأخرها يبكوا لما مات
فامشي فطريقك صدقه
حب اللى منك واعشقه
مبقاش فى وقت تّدققوا
الدنيا ماشية وشاده خيط
اياك فى مرة تلعبكه
دوس ع الوجع خليك حويط
مين اللى قالك تشبكه
وان مرة مال ميل اليه
خليك سحابه وكوم مطر
عدي فى طريقك للقلوب
من غير ما حتى تسيب أثر
الحب تكفير للذنوب
والفرقة وعد ومنتظر
قطر السنين خد منى كام
سنوات كتيرة وكل عام
بنغنى للعام الجديد
العام ده جاي اكيد سعيد
قطر السنين بيفوت عنيد
جربت احساسك اكيد
طب ايه جديد ؟!!
نفس المشاكل والمتاعب والفرص
نفس الألم نفس المتاهة والقصص
اهوه كل عام بنقول جديد
نلقاه مُعاد والحزن زاد
والجرح غول ممنوع تقول
بنت البتول باعت شرفها وعرضها
الشعر نار والليل مرار
كان مين ساعتها ف حضنها
واهو كل عام بنعلى صوتنا نقولها
مين اللى دنس أرضها
رغم الوجع هنقول كمان يا رب حرر أرضها

سَـنواتُ بُـؤْس

هَـلْ قـادِمٌ ألقَـى الأمانِيَ واعِـداً
يمحـو ظلامـاً أو يُعينُ كئيبــا
تَاقَ الزَّمانُ بُـزوغَ فَجـرِِ بدايـةٍ
تـرقى لِـتُنجبَ للجراح طبيبــا
فَـلِترحلي ..
و خُـذي وَ ليــدَكِ و ابـعِدي
فالضَّنكَ أنشَـأَ موقِـداً و لهيبــا
ما أنتِ و العامُ الجَديدُ بمَأمَلٍ
حتى الأمـانُ تراوداه سليبــا
ها فاقرأي ما آل حال ديارنا
يعلو النحيبُ - صداهُ صدَّ مُجَيبا
حَلَّ الدَّمارُ بكل شبـرٍ طاهـرٍ
فالقدسُ تُـقتَـلُ و العِـراق غريبا
و الشامُ تصرَخُ حين عزَّ أمانُهـا
أيـن العُـروبةُ و الزّمــامُ رَكيبــا
و بأرضِ مَأرِبِ حالفوا شيطانهمْ
حِفـظـاً لأمــنٍ واهِــمٍ - تكـذيبــا
و النيـلُ يرقُـدُ بيـنَ فَـكِّيْ هـائـمٍ
طُعمَـاً يُبـالغُ ناهِشـاً ترحيبــا
فتصَدَّعتْ أرضي و قامَ سفيهُها
يجتَثُّ رأيــاً لا يراه صَويبا
فلـتَغرُبي
فالعُـمرُ فيـك مواجــعٌ
و العينُ جَـفَّتْ
و الملا تَغريبــــا ..

حكايةُ الزاروبْ .... بقلم د/عماد الكيلانى

حقاً لهذا العمرِ عنوانُ !
وفي مشوارهِ مضى إنسانُ
كثيرةٌ لفّاتهُ يقودها التوهانُ
عرجاءُ دربهِ وكذا الاركانُ
أول الدربِ حكمةٌ وزمانُ
وأوسطهُ تعبٌ و حرمانُ!
وعلى أعتابهِ قهرٌ ومهانُ
وعند آخرهِ جوعٌ وعطشانُ
حقاً إن لهذا العمرِ سُكّانُ
تعاسةٌ تقودهمْ و وجعانُ!
وعلى جنباته الطريقُ هوانُ
وفي امتدادِ الدربِ صوّانُ
هناك في الناسِ صنوانُ
كثيرهم عطشى وجوعانُ
فمعظم الأيامِ التيهُ سيّانُ
إما لصوصٌ تقودُ وأوانُ
وإما غلابا عندهم خجلانُ
والحاكمُ المسلوبُ ظنّانُ
وقاضي القضاةِ حيرانُ
الحكمُ جورٌ يقودهُ غِلمانُ
وسُدّةُ الحكمِ ظلمةٌ توهانُ
والمالُ سائبٌ ما صانوا
والبؤسُ قائمٌ عليهِ خوّانُ
والظلمُ وقسوةِ الحكمِ جانُ
أترى يتغيّرُ يوماً الزمانُ!

قصيدة : فى مثل هذا الوقت

فى مثل هذا الوقت من كل أخر عام
أحلام كتير بتموت وبفوق على الاوهام
والحلم كان ريشه بحلم بها كعصفور
نفسه فى يوم يكبر لكن جناحه مكسور
ألوان كتير فى السما لكن الغيمه موجوده
أحلام كتير أنما النفس مسدوده
ومنين بتيجى السده طول ما الحياه شده
سنين تجر سنين وعالعمر محسوبه
شاف لوحه لفنان مشهور مرسوم فيها جوزين جناحات
قال هحلم وهسيب الماضى واللى فات أهوه فات
أخد الامل زرعه فى نفسه وأتردت لحياته الروح
فجأه لقى خنجر بخيانه لقى ضهره بقه كله جروح
بص وشاف وطنه اللى بيدبح ولقى نفسه هو المدبوح
ورجع تانى فى أخر العام عمال بيعد الاحلام
لقى نفسه خسران بزياده وصحى كالعاده على الاوهام
ملعون ابوك يا وطن مبقتش عايز أنام
فى مثل هذا الوقت من كل أخر عام