ربنا له قدرة ف كل حاجه

بغض النظر عن أي حاجه بتحصل للواحد
حلوة أو وحشه .. صعبه او سهلة ..
بس كل حاجه بتحصل لربنا قدرة ف الحاجه دي...
دايما بيعوض كل واحد بالحاجات اللي ممكن ميتوقعهاش أصلا
لما ربنا بيديقها ع الشخص دة مش معناه انه مبيحبوش.. لا ع فكرة
دة كدة ربنا بيحبه جداا كمان .. عارفين لي ! عشان هو عطاه فرصه في ناس كتيير مش حاسه بيها ..
ودة عشان ربنا لما بيديقها عليك .. ف تفتكرة .. ف تدعيه.. ف يبقي دايما ذكر ربنا علي لسانك . ولما تقول الحمد لله وتآمن بقضائه بيفرجها عليك .. عشان عديت الإختبار بنجاح..
ربنا بيحبنا ع فكرة .. بس احنا مقصرين معاه اووي .. علي الرغم من بعدنا عنه هو كل يوم بيعطينا فرصه جديدة ف الحياه ..
مجرد م بتنام وتصحي تترد فيك الروح تاني   دة خير وفرصه تانيه وتالته كمان من ربنا ليك
الوقت جايز بيعدي مبنحسش بيه وكل ثانيه بنستهتر بيها .. بس الأكيد اننا لازم نقرب أكتر واكتر
من يومين تقريبا شوفت فيديو لواحدة نزلت القبر عشان تجرب ازاي هتقعد تحت لوحدها من غير حد ! متخيلين أصلا!
الموقف أصعب مما تتخيلوا اقسم بالله ..
سألت نفسي يومها
طب انا عملت اي عشان أكون مستعديه لليوم دة! هل بعمل كل حاجه أمرني ربنا بيها .. هل انا صح أصلا ؟
مفيش إنسان كامل وانا معاكوا ف دة .. بس في إنسان بيحاول ... في إنسان عايز يكون أحسن
انا بعترف إني فيا العبر بس عارفين .. في وصله بيني وبين ربنا غريبه فعلا
اللي هو مهما بعدت ومهما وقعت بيسندني ..
طب اقسم بالله حاجه غريبه فعلا ...
ع الرغم اني كتييير مببقاش مسامحه نفسي .. بس بحس انه مسامحني
مجرد م بركع او بدعي .. بيبقي عندي ثقه ف ربنا رهيبه.. انه قادر يخليني أحسن واحدة واقرب واحدة ليه.. مع مجهود مني وشويه حب ليه ولديننا هبقي أحسن ..
خطتي الجايه اني ألبس زي إسلامي 😍
لو جرالي حاجه أكيد ربنا عارف نيتي ايه .. وللي هيقرأ كلامي .. العمر مش كتيير ولا أحنا ضامنينه    أبدا من الوقت .. متضيعش وقتك أبدااا عشان اناضيعت وقت كبيير اووي
ربنا يتقبل أدعولي كتيير وافتكروني

احمد الراوي...سبتلها إيه!

-
💔
سيبتلها ايه قبل الفراق
طب خدت ايه ؟
سيبتلها كتف فـ حزنها تسند عليه ؟
طب خدت حضن يطمنك ؟
سيبتلها حد يقول لها : ما تعيطيش !
طب سيبت حبة أكسجين علشان تعيش !
سيبتلها ايه ؟
غير كلمة واحدة تقولها للي بيسألوا عن حزنها ..
فـ بتبتسم و تقول : مفيش
سيبتلها ايه غير ذكريات
تشبه اوي مسمار جحا
و القلب خام -
مش حمل أصلاً دقدقة
طب خدت ايه غير حبل واحد للحياه
و اديتها ايه غير بس حبل المشنقه
مشهد ما أجبرش الفراق ع الإرتجال
مكتوب بــ حبكة
كل اللي كان باقي في عيونها نظرتين
و نزيف وجع و دموع و ربكة
شديت من تحت خطاويها الضعيفة خط سيرها
و اديتلها كل الخرايط للحياه
تفرق في ايه كل الخرايط
مع واحدة فاقدة الإتجاه .!
خبّت أوجاعها بضحكتها - ضحكت مرة
كل ده كان مرسوم من برا
مضطر تسيبها و مضطرة - تضحك للناس
ملعون معدومي الإحساس ...
سيبتها من جواها يتيمة
بتبص لكام صورة قديمة - و تدمّع بس
سيبتها بتبص على الدنيا من تحت الأرض
و فراق الناس أصلاً سُنّة - و وجعهم فرض !
لكن مش فرض إن وجعها يبقى علي إيديك
سيبتها و أهي لسه بتدعيلك
مع إن المنطق بصراحة إنها تدعي عليك ..

#أحمد_الراوي