عشان عارف .. بقلم مصطفى محمود

هكون كداب يا خلق الله
ده لو أفتيَت
بإنّي حقيقي كنت اعرف
لماذا العِشرة بين روحنا مبدُّمشي ؟
وليه طعم "الفراق" أسهل على لسانّا
مَنيش أعقل عباد اللهِ يا اخوانّا
عشان بزعل ..
وببقى ساعات كما العيل وبتلكك
وباخد جمب من اقرب حبيب ليا
لكنِّ بسيب صِمام القلب متوارب
عشان عارف ..
بإن الدنيا مش باقية
ومش مستاهلة تعقيدنا
وإن خصامنا مش لزماً
يسوقُه العند بمراكبه
لموج الفرقة وغريقها
فليه نمسح "انا اسف" من المُعجم ونعزلها
ونفضل فيها بنأوّل
بإني الكلمة معناها بيوحي "بضعف" مش أكتر
وليه "الصفع ع الأوجُه" بقى مبدأ بيستكتر
نلم الشمل من تاني
ويبقى القُرب منهجنا
ياريت نرخي العناد حبّة
بلاش نقفلها بالضبة
عشان كلمة "ياريت" قدام
هتفضل فينا بتأنِّب
يا أهل الله كفاكوا بعاد
بيوجع فينا ويعذِّب

بشاشة وشي لو تنطق .... بقلم محمد عبدالقادر

راوي الحديث قلبه خراب بين
وعارف بإن الكلام فـ الماضي مش هين
وأحداث القصه مش صدفه
البنت كانت غاويه تسمعني
رغم ان حبي صابها من غير ما توزنها
ازاي بتتحمل تمسح دموعي وهي مش منها
البنت عارفه بإني قلبي انتهي
من واحده باعت ومصممه تشتري
ازاي بتقدر تحبس وجعها فـ صمت
وازاي يجيلي قلب اكون مفتري
احكيلها عن بنت الـ... اللي سبقتها
وهي كإنها واخده حقنة بنج
بتبان قصادي بشوشه لا تُقهر
مع ان قلبها هش زي سفنج
مش زي سابقه قلبها جبروت
طب ليه بتبقي فـ وشي حجر صوان
ومن ورايا بتتمني قُرب الموت
بصي
انا كنت قبلك شيء ملوش لازمه
مخنوق ساعات وتكشيرتي عـ السحنه
وانتي اللي جيتي غيرتي هذا العبث
ووقوف سواعدك جنبي فـ المحنه
كانت جميله عقلي شالهالك
هطْلق لساني بكام جمله اقولهالك
قربت منك مش عشان محتاج
علشان كملت بيكي عـ العموم نقصي
فـ حبيت احبك طلع الوجع عكسي
بغض النظر عن الماضي ولعبكته
فإن لكل شيء وقته
وانتي صبرتي وشديتي ترحالك
ورميتي من حالك بدعوه علي مصَلْيه
ومازلتي مصممه برضه
واخده قرار الاعتكاف ليا
واخده فـ ايديكي كل قصايدي فـ ايد
وفـ التانيه شايله همومي فوق كتفك
وكإني طفل فـ مرحلة تسنين
لفيت أراضي الدنيا ست سنين
ملقتش شخص بيشبهك غيرك
بشاشة وشي لو تنطق
هتدين بفضلك والضحكه من خيرك
ديرك ياراهبه برغم ضيقه مريح
وصريح يعاتب قلبي لو غلطان
براكي ببقي فـ عز سيطي غريب
ومعاكي ببقي برغم الوجع سلطان
فـ القلب تلقي خُطايا عـ الشريان
وفـ عنيكي سكني لو تزيد مُتسع
حضنك براحي فـ عز ضيق الهوا
ضاق البراح وفضلتي وحدك وسع
القُرب مني زاد فـ قلبك ضعف
فـ امشي بغصب وجبر لو ناويه
انا عارف ان القُرب دبح لشخص لسه غريق
والبعد آخر حل لشخص عـ الهاويه
الحب موت لو من طرف واحد
وبيبقي حلو لو الكفه متساويه

لو كنت اقدر ابقى .... بقلم على دياب

كل طيف لو كان اوانه ف الانسجام
ويا الشعاع المنعكس ع رمش عينك كان هيكره
كونه طيف من سراب او من كلام
وانا مش امام
رافع ايديه لحظة صلاه وانتوا تلبوا تكبروا
ممكن اكون
انتيكه مركونه ف تراب التلبيه وسط الركام
لو كنت طيف
كان ممكن انسج م السما ..لحظة شروق شمس الغرام
كام سحابه تضللك... او عقد ابيض يحرسك قبل المنام
لو كنت طيف
كان ممكن اتلبس ايديكي وحسها
وهو برضو ابقى ملكتهم.... حركتهم...كام محاوله ف الحرام
لو كنت اقدر ابقى
حاجه تقربيها ...وتحضنيها.... تكلميها....
ولو هعيش من بعدهم شادد حزام
ع فقري بيكي...... مش مهم..
اهو عيشه تشبه رمله حاضنه كام وتد بين الخيام
انا حبي يشبه حب مبهم
فاقد الطعم وحلاوته ولذته لما يكونلك بهجته
و. فـ نفس وقته أما يلمح خطوتك..... لما يحس برقتك
يفرح اوام

سبحان من بالإشراق حيااااها ... بقلم خالد العطار

كأني بين الحروف أُمَازجها .
أعانق خباياها
أضم الورد ..فلا شوك
يعكر صفو محياها
وذا العطر ان فاح شذاه
فمن أعماق وجد .. تغشَّاها
وذا النور ان طلت من سُرادقها
سبحان من بالإشراق حيااااها
أيا حرف نبض تملكني
فأسر الفؤاد بِمُقلاها
أنا الشريد ان جُنَّ ليل
وليلي شريد سواها
وأنا الوليد ان طل فجر
وفجري أنا عيد ...برؤياها

معاش مرحوم .... بقلم مروة كامل

يدوب قرشين وكام مليم
وفاتهوملي بإسم معاش
وكام سبحه علي قنديل
بنور بيهم الماضي اللي راح ولا جاش
وبنتين سرقت الدنيا معاد نومهم
وام بتغسل الوحده مع هدومهم
ووحله وتوهه ف متاهه / وحبة حزن
وكام حيطه بيتحسدوا عشان حاضنانا جواها
وفيه كام دين وحق علاج وكام دمعه ساعة ما احتاج افضفض م الوجع والهم
وناس تتلم وناس تمشي وناس بتموت متنطقشي
وصوت مكبوت وضربة سوط علي ضلوع البكا لو حن
وكام ذكري بدون بكره تعاقب ف القليب لو أن
وانا والخوف وامراضنا وكيس مليان بأوجاعي
بجمع تمنه م الاحباب وواشمه الاسم ف دراعي
وانا وبنتين بتفاصيلهم وكدب وزيف بدون داعي
وام بتقسم اللقمه مابينها وبين امل ف الشوق
يامرسال الفراق ماتفوق
وهاتلي حببيبي م الجنه املّي عنيا بملامحه
واقوله ان البنات سامحوه واني كمان انا مسامحه
وان الدنيا ليه طارحه ف قلبي بنات فيهم منه
واني دبلت مع انه
موصيني اكون فرحه لكل الدنيا بعد ماراح
وحيده ف دنيا معيوبه
بتبني فيا كام طوبه وتهدمهم
وتاخد مني كل عزيز / مفيش دخان بيبقي لذيذ
مفيش ظالم ف ظلمه وجيز
ولا قضبان يكون اوجاع يدوس عالعمر اللي اتباع
ولا احلام تسلفني سعاده تساع وجع قلبي
صبيه بهمي عشت احبي
واطبطب ع الجراح فيا
يابنت الهم ياغبيه مفيش دنيا بدون غيامات
مفيش اخره بدون علامات
مراكب سايره بدموعي تقوي الناس علي الوقعات
ونار تتمشي ف ضلوعي بتعمل للحياه مقامات
وناس تغدر وناس تصدق وناس عايشه الحياه بالزق
وكام مليم يدوب قرشين وكيس محتاج لحق علاج وكام دمعه بنزلها ساعة ما احتاج افضفض م الوجع والهم ..
" ياخلق النص جرحه اصم "..

مستشفى الهم 6نجوم ... بقلم على دياب

مستشفى والمرض والحكما
والبنج شئ لازم
لفقد الحس بالبهجه
وبالجرعه
يزيد الداء ويتفحش
وبالسرعه
يلم الفرحه ويكوش
ويوأد روحك الطاهره
وتتجمع بقايا الدم ع الحقنه
ويرفض قلبك الهدنه
لفض بكارة الطيبه
ويتمدى لخلق الروح
ويتهجى حروف اسمه
ويتعدى حدود جسمه
ومستشفى تضيف اسمه
لكشف اللاحقين بالموت
وتعلل
رفض الجسم للترياق
وانه اشتاااق
لشجرة تووووت /ف جنة ربه والملكوت
وجثه تنادي بالثوره
لهتك العرض ف كيانها
وتعذيبهاوضوء الشمس لما يميل
ع ضفيرة بنت ف الشارع
والشرود ف الراحه بيسارع
ف انفاسها
سيناريو الهم متألف ومتعمم ع راسها
بيخدش كل احساسها
ويجي المخرج الملعون
يدبسها
ف دور الهم يحبسها
ويلبسها من ساسها الى راسها
مستشفى الهم 6نجوم
ف قتل الروح وتأبينها

الحب مش بالكام .... بقلم محمد عشرة

- بحبك .
= شاري ؟
- جدًا
= طب شاري إيه فيّا ؟
شاري جمال الروح
يا صبية قبل الجسد
يكفيكِ شر الحسد وشر عين الناس
- شر الـ أنا بسمعه ..
مشيتي كام خطوة فالشعرا اتجمعوا
فـ بدأوا بالتدوين من بس نظرة عين
أو يمكن الماشية
زي السفينة الراسية عـ شط بحر أصيل
أنا كنت شاعر مبتدأ
أو لسه فـ الأوصاف عويل
بدأت أدّون فيكِ كل ساعة كتاب
- رغم إن كان قُربنا فاصله يجوز أبواب
وكان مـ الـ صعب يوم وصَلك
قُليبي كان مرضان مارتحش إلا يجوز
من قُربك ومن مَصلك
فـ بدأت أحبك !
فـ ماتسأليش شاري إيه فيّا !
الحُب يا صبيّة مش بيعة أو شروة
الحُب ده ثروة للي يستاهلوه
فيه ناس كتير جاهلوه
عاشوا كما الأيتام
الحب مش بالكام
ولا حاجة مادية
الحُب من ربك حاجة كده هدية
الحُب إدرنالين يفرز أوام شوقه
من هوّ أو هيّ
الحُب ده هدية من رب سابع سما
نازل بخلق الأرض ليكِ وليا أنا
سبحان من خلي حبك ليا فرض
أحبك أكتر ألقيٰ أكتر بيكِ هنا
فـ ماتسأليش ازاي أنا مـ الأساس شاري
لقيتك ليا كل النور وأنا فـ الظلام ساري
،،
فـ الحب مش شروة أو بيعة جوه السوق
الحُب حاجة لفوق شاذة عن الدنيا
الحُب هو الدنيا لكان بناس تانية
ناس فاهمة مشاعرها بتخاف عـ غيرها
تموت عشان الغير
الحب هو الخير والخير بشوفه فـ بنتي
الحُب هو الدنيا والدنيا هي إنتِ
فـ ماتسأليش ازاي أنا هشتري بنتي
وماتسأليش ازاي أنا هبقي أخ وأب
ما الـ طلب من عبد هيسوي إيه جنب
إنسان طلب من الرب !
فـ ماتسأليش ازاي وليه يا حلوة بحبك
لإني والله ما أعرف بحبك ليه
أنا شوفتك فـ قولت هكونلك
وهكونلك فـ شرع الحب بتبقي جايز وعد
ووعد أي إنسان بيبقي فرض عليه
فـ أرجوكِ لا تقلقي أنا عُمري ما هسيبك
لو ساعة حتي فـ يوم
أصل الـ جنبه حبيبه مش زي الـ كان منه
سنين يا ناس محروم !

الدنيا عيون ... بقلم عبدالوهاب عوض

في عيون بتطبطب و تدادي
و عيون بتخطط و تعادي ..
و عيون هتشوفها المرادي ..
ويا عالم على فين هتروح .
.
وعيون ذكراهم بتعمَّـر ..
. . و عيون بالعمر ما تتغير ..
و عيون لو طالت . تتأمر .
و عيون مجدع ؛ و عيون دون
.
وعيون ترتاح لما تشوفها ..
و عيون بتبوح لك بحروفها ..
و عيون راح تسحر بكسوفها ..
وعيون بالباء مش بالنون .
الدنيا عيون عايشه تبحلق ..
في عيون بتبحلق ف عيون .
فيقيسوا في بعض بمظاهرهم .
والظاهر مش زي المكنون ..
.
و ميزان العين دايما ظالم
لو يقضي ف مره بيتغاشم
سلمها لربك . مين عالم ..؟
أسبابنا في إن عيونا تخون

تخاريف الثلاثاء ... بقلم مصطفى منير

- حان وقتُ حصيلة اليوم؛ قتلتُ عشرين جنديًا من أوغاد المُحتل وأنتِ؟
- جنديًا واحدًا بكل فخر..
- منذ الفجر وحتى العاشرة مساءً وقتلتِ جنديًا فقط! أين الفخر في ذلك؟!
- كيف قتلتَهم؟
- برصاص بندقيتي...
- وأنا برصاص كلماتي، وقفتُ أمامه وقبل أن يقتلني هو أخبرته بأنني أحارب وداخل أحشائي مناضلٌ صغير قارب على الخروج، وأمي ماتتْ وهي تدافع عن الأرض بعصى المقشة، حاول أن تهوِّن على الجندي زميلك وقُل له لا تبك مثل النساء فأنا أقف أمام إمرأةٍ تقاتل بسلاحٍ ذخيرته حب الوطن وابتسامة الشُهداء، رحل ولم يتفوه بكلمةٍ واحدة، قتلتُ رجولته فقل لي؛ لمن الفخر الآن؟

الشعر كَان ومازال .... بقلم سعيد سلامة

الشِعر مِش حِمل الضَجيج
الشعر كَان ومازال بَهيج وِسط الكَثير
بَطل تِكون زَي الضَرير
وأسمع وِشوف لَا تَنجرف
أقلام كِتير فَاحت قَرف بإسم الدِيوان
طَبل هِنا وطَبل هِناك وِسط الحَريم
حِبرك سَخيف شِعرك عَديم
عِينك مَريضه بِكام لايك والعِله بِنت
لَا جَدوي لَو كُنت ومازلت بِتفتكس شِعر الهَراء
صَمت وِسخاء للي أنكتب مِن خَطنا
إياك تِكون بِتحسنا زَي العَاهات
ممُكن سُكات يَا ذَا البَهيم
الِشعر مِش طِفل ويَتيم
الِشعر مأوي لـِ كُل طِفل بِيرتجف
لَا ترتشف سِم اللى حَب يِكبرك
بُكره الِسطور هَتقدرك فـِ التَسعيرات
أياك تحوم وِسط البنات عَ كام لَايك
وِتكون مُشابه أي قَطر
أقرأ لـِ صَقر وعَظمه بـِ التَكبيرات
دُوق مُعجزات صَمت العنين
لا تَندهش ويِبانلي نَمشك عَ الجبين
الِشِعر دِين عَايشين تَملى نِسدده
وانت اللى جَاي هَتهدده بـِ زيف القَلم
الشِعر مِش جَاي مِن عَدم
يَادي الصَنم أبعد بِعيد عَن شِعرنا
وأفرح يَا عبد معَا البَنات
قَبل أما تَمشي أبوس أيديك
أياك تِقول الشِعر مَات ...

تقسيمة ... بقلم أحمد الشمسى

تحيا مص .
مص شهد الحلم مِنّا
لف حبل الجوع رقابنا
ذل نور الفَجر عمداً
تحيا مص .. تحيا جداً
تحيا صر ..
تحيا صرصار الغيطان
قام ومسك الميكرفون
لجل ينطق كل باطل
تحيا كل قلم بيكسر
كل اقلام الشجاعة
تحيا روّاد النطاعة
تحيا طبلة بس دورها
تشجي ودن الناس تسلطن
تحيا صر.. تحيا جداً
تحيا مر ...
تحيا مر العيشة تاني
قلت ليه افضل اعاني
شفت ف باسبوري حلاً
تحيا مر .. تحيا جداً
تحيا رص ...
تحيا رصك للعساكر...
والحِصِنّة والطوابي
مش تقول ان انت خفت
يولد التحرير عرابي
او يفتح تاني ورداً
تحيا رص .. رص جداً
تحيا صم
تحيا صمك يا ابن امك
عن هتاف الحق واعمى
عن ايديك والدم فيها
عادة ولا هتشتريها
شكلي انا اللي ف مالطا بدَّن
تحيا صم .. تحيا جداً
تحيا رم .
تحيا رمرمة العبيد
من تراب ابن القيادة
تحيا اصلا كلمة عادة
بيقولوها لكل سيد
ابن سلطة وابن قرشاً
تحيا رم .. تحيا جداً

بلغوها إعتذارى .... بقلم أحمد النجار

بلغوها إعتذارى
وإن انا
ميجيش ف بالى
إنى ممكن
اسيئ اليها
وانى رغم
بعادها عنى
ورغم انى
مش لاقيها
لسه عايشه
جوه منى
لسه برضو
بخاف عليها
بلغوها انى فاكرها
وانى محلمتش
بغيرها
وانى مهما
سنينى طالت
عمرى يوم
ما هاكون ناسيها

بنت بـ مقام مليون ... بقلم محمد الكافورى

نورتي ليل اليوم
أول ما طليتي
طيرتي مني النوم
فـ عنيا و بقيتي
عشة فـ سطوح قلبي
مرمى فـ نجيل روحي
موجب لـ بال سلبي
مرهم شفا جروحي
بنت بـ مقام مليون
فكت حصون فرعون
من كل حدب و لون
دفت نيران دمي
دقت فَـ زال همي
حنت بقت أمي
حبت بقيت ملكها
سبحانه رب الناس
أبدع فَـ كان خَلقها

كان نفسى .... بقلم عمرو البطل

كان نفسى اكتبلك جوابات
و ارميها ف بلكونتك و اجرى
و اتكعبل _قال صدفة _ ف عينك
و انا ناوى اتكعبل من بدرى
و أوصّى صحابى و صاحباتك
يتزرعوا عساكر فى حياتك
و اظهرلك حتى ف مراياتك
و افتحلك زنزانة ف صدرى
أنا أصلا عيل من جوة
لو سبتى هيتشعبط هو
و يغرق أرضية قلبك
بدموع و يشدك بالقوة
و يقولك مش هبعد ، لا
و يحلف قلبك بالله
ما يسيبني و يتعبني معاه
في حياه ازاي مانتيش هي !
انا هقبل أي حاجات تحصل
غير إنك ماتآمنيش بيا

أنا فاكر ..... بقلم محمد شكرى

أنا فاكر ..
كان كل مرة يقول بلاش
و انا كل مرة اقول مفيش
في الدنيا حد مايتنساش
كان عارف ..
اني هعيش بعده في جراح
و انا برضه عادي بخسره
و مافوقتش الا لما راح
و #بعد_ما_راح
مابطقش حد يقولي
بكرة تنسى و تلقى راحتك
هنسى ايه !!
و مش هرتاح
بعده .. و هو انا يعني
لو مكتوبلي راحة
هخسر اللي انا روحي فيه ؟!

كل اللى جاى غياب .... بقلم زاهر سلام

تربس قوافى الشعر
و أمنلى ع الأبواب
كل اللى جاى غياب
وانت متستحملش
وطلسم لى ف المشهد
العلة مش فٌرجة
خطاوينا مش عِرجة
هما اللى جابوا الغش
تربس قوافى الشعر
وضح لى ف الصورة
مشاعرنا مكسورة
ولا انتوا مش حاسين
أحكم لى قفل الوزن
العيرة مش ف الحزن
العيرة عمى القلب
مكانتش عمى العين "مشهد داخلى خارجى"
قطايف ضحكتك وردى
يا مخبطة على باب السما بدعوتين
منيش أيوب عشان أتحمل جواب الدعوة ف بعدتى
بيشبه حضنها لستى <3
كتبتنى قصيدة ..ف كتبتها رواية
حبيتها فعلياً ..حبيتنى كهواية
العيبة مش عندى
الفرقة لية زادت
مشاهدنا ليه اتعادت
الأمر خاص يا سيادنا
ولا انتوا مش شايفين
طلسم قوافى الشعر
سلملى ع الباقيين
مش باقى غير خلخال
و فيش لروج على ورق منديل خيالى
ونص باهت للعبيد
ناصب ميدان زحمة مابين قلبى و ما بينك
و شوفت ف عنيكى وداع
شفته ف ملامح طفل ف اعدادى
رمى كل أحلامه ف قصيدة
ف خالفة الوزن وعيونها
الشئ بالشئ يذكر - ولا شئ يذكر بدونها
كل حاجة لسه باقية
نفس الكتب " تكوين لوعى لحد تايه ف الحياة "
نفس الكئابة ف القصيدة
نفس الضحكة لناس حاوليا مش فاهمين
نفس الروتين !
نفس المسافة مابين الأمن و الكوفة
و انا عينى تضحك بس مطروفة
بعفار جيوش حسنها القمحى
و أنا كل ما اجى اعدلها تتقندل
يلف جيشها يحاوطنى كشبر ف #يهوزة
و أنا صورتى مهزوزة عشمانة تتعدل
أقفل كالون الضيق
الحرف أصلة غريق
هتشده راح تسرد
و أنا وجعى مش مشهد !
مش بانى المسرح للسادة
بتضحكوا ليه ؟!
على مشهد يبخ ف تحت عينى أزرق
قصيدتى دايرة تفرق وانت أتجمعتوا على ضحكى !
"تنزل موسيقى التتر - يتلاقوا جناحين لستار "
أقفل محبس الأشعار
أقفل ! مش شرط إننا ننهى
"أنتهى"

بقيت مُختل ... بقلم أحمد عبدالستار

ماعدش فاضلي شيء ليا
لاقيت العُزله هي الحل ومن كُتر اللي مات فيّا
بقيت مُختل
بقيت بضحك ف وش الناس وشايف كرهي ف عيونهم
وناس تانيه مابعرفهاش لكني بحب مضمونهم
وبضايق وبتخانق انا ونفسي
عشان رافض اكون هوّا و هوّا شايفني من جوا
ب يقتل روحي بالقوه / يخليني أشوفهم صح
ف يلعب تاني في دماغي / ويفضل بردو بيلاغي
حاجات ياما بشوفها كتير لكن عامل مابعرفهاش
ف أمّن علي الحوار أعلاه عشان مايرحش عمري بلاش
و يضحكلي عليه واحد تملي بشوفه ف مرايه
جميل جدا / بسيط ساذج
لكنه حقيقي مابيعرفش / قلوب الناس كما نماذج
وحد بفطرة الأطفال طبيعي يكون ك دالّايه
تمرجح فيه قلوب الناس ودمعه معاه ماهوش فارق
وكل مشاكله ف الدنيا بتتلخص ف ضحكايه
ل بنت كمان مابتحبوش / عبيط واتحط في حكايه
ورغم انه تملي يموت لكنّه شايفها ف نهايه
هاتجمعهم عشان يمكن بيدعيلها بكام آيه
ف تتكسر مراية الخوف ويخرج منها حد عجوز
يهز الدمعة والضحكه / يقول فعلا كمان ويجوز
تكون الدنيا بتهدّك / لأنك شخص مش عارف
سنين عمرك مطر خايف وقلبك لسه مش شايف
وسايب ليه شيطان وعبيط يجولك بس لما تعوز
ف قولت يا عم رييحنا ومش ناقصه كلام الغاز
انا الحد اللي وقت ما اعوز بعيش قادر واكون من فاز
ووقت ماكون عبيط ساذج / تكون عيني الغريبه ازاز
وبسكت لاجل ماشوفهم و وقت النار ب احط الجاز
انا كام حبل في حكايتي وماسك كل اطرافهم
انا كام حد في مرايتي بروّدهم و ارقمهم
انا كام ماعرفهمش / لكني بلاقي دايماً حل
انا طيب وانا قادر / انا فعلاً بقيت مُختل !!!!

أنى بشوف ... بقلم أفنان الفقى

شرب مرار.. دوق الوجع
واسرح ف ليل.. وشوش ودع
واياك تتوه بين السطور
ركز عشان.. تفهم ماتغرق ف البحور
اضحك قصاد كل اللي باعوا وشافوا فيك عيب ماتستر
لاجل القدر.. انه اتخلق جواك ردار
تفهم تشوف.. ايه اللي صار..!!
وايه اللي دار ..!! من نظرة منهم.. او نفس
لاجل الحظوظ .. صدقني هتشوف الحدث
واياك ياقلب تموت عجوز .. وهمة لسة ضاحكين
اضحك ف وش المدعيين
ان الانين كان جوة منهم ك الوبا
ناهش سنينهم مندبة
واياك تصدق دمعهم.. تسمعلهم
اضحك بعلو الصوت قصادهم.. قولهم #اني_بشوف..
لكن بعافر.. مش هشيب

بتفهم ف البشر يابنى ؟ .... بقلم عزيز محمد

بتفهم ف البشر يابنى ؟
قريت عنهم
ف طول البحث عن حلين
وحل الحل ف اللوغاريتم
وعن مزيكا من غير رتم
وعن اخبار ظلاميه
وعن احبار هلاميه
بسوء الختم
مانيش فاهم ....
قريت عنهم
ف كل مصارع الأخلاق
ورغبة قتل ممحونه
ف روح اوزوريس
وجمع النبض م الأشلاء
قصيدة عشق موزونه
ولكن شبه معجونه
بغلطه كبيره ف الإملاء
مانيش فاهم.......
قريت عنهم
ف ربط الحرفه بالحريف
وزبط الخُرفه بالتخريف
وخبط الفرصه بالتخطيف
وسبى الحلم بالتكتيف
وجبى ضريبه للتشريف
وقتل الصيف
وفتل الكيف
وشتل الطيف
وخلط معارف العارفين
بلبس العمه والقفطان
وذم السكه بالواقفين
مانيش فاهم
قريت عنهم
وما فهمتش
وما عرفتش
بأن( العنقا) و(الخلّان)
وضُم معاهم (الغوله)
تلات مغاليق
ورابعهم :
بلاش تسأل
عشان م الصعب دلوقتى
تفسّر حد م المخاليق

وهاخُص مين بالذكر ؟ .... بقلم محمد أبونعمه

وهاخُص مين بالذكر ؟
غيرك يا بنت الناس ..
العِفه مُش فى البكر ..
العِفه فى الاحساس ...
كُل البنات أموات ..
وانتى اللى كَائن حي ..
كل اللى فات لو مات ..
يكفينى فيكي الجي ..
كل العيون .. كربون ..
حتى الوشوش ماسكات ..
كل الخدود .. مكياج ..
كل الشعور .. باروكات ..
انتى اللى لسه بيور ..
واقفه كده بطولك ..
أرض البنات لو بور ..
يستنوا محصولك ..
ميم ولا جيم أو دال ..
كل الحروف أندال ..
ده الشِعر لو يتقال ..
يكفى ان انا أقولِك ...!!

مش هضعف اكتر من كده .... بقلم حنان محفوظ

مهما كنتي صعبه ومؤلمه
هفضل عايشه وهرميكي ورى ضهرى
انا كمسلمه ومؤمنه
برضي اللي يقسمه ليا ربي
مش هضعف اكتر من كده
هقوي علشان معايا ربنا
هقوي علشان اهلي جنبي
هقوي علشان نفسي تستاهل تتحب اكتر من كده
خلاص ايام وعديتي
ومن حياتي انتهيتي
ولسه قدامي سنين جايه
ولو حتي باقي يوم ف عمري
هعيشه وضحكتي ف عنيا
وهكسر اي حد يكسرني
ومش هكسب اللي بيرضي يخسرني
هاعود اكسب نفسي وبس
ولازم بيها هي احس
هي اللي بقيالي
هي اللي هتقف جنبي وقت الشده
هي اللي تستاهل اخد بااديها وبشده

ازيك يا وحيد ! ... بقلم احمد رضا

ازيك يا وحيد !
وحشت صاحب عمرك ياض
هو انت عندك كام غيري !
او حتي فيه حبك يوم ادي !
بقالك فترة تملي بعيد
مش سايب ابداً تفكيري
لو حتي المحنه دي هتعدي
انا هفضل ألعن تأخيري

ازيك ياض
طمني عليك
احلامك مالها المرادي
بهتانه بتحلم ع الفاضي
اندهلي اجيك !
صبرك بيطول من فترة
مش مستعجل ليه ع الليل
جايلي ف وقت ما سيبتك يابني
وقلت انام
قام جالي جوثام
جايلك بليل .. استناني

حتى لو ... بقلم محمد البستانى

حتى لو في حين الهدوء والانسجام عصف الريح وتغير الجو
فأنت بأعماقي بالخلايا بالعظام ولا يطيح بأعضائي اعتي نـو

فلا أنتي مجرد موديل للهيام ......ولا أنا رجلا انتهازيا وسو
ولو طلبتِ قلبي للتشريح والإستبيان .......قدمته إليك ِفي التو
فأنا ألمح في عيونك نظرات استفهام ........تبحث داخلي عن مكان
ألمح هذا الشعور ينمو مع الأيام .......وترمى إلى بالطعم كل أوان
كعصفورا يشدو على الأغصان والمحب لا يكفيه من الطعم أطنان
وهل يمل أو هناك من يشبع ويكل من التهام .....حلو المذاق إنسان
فزيدي الكيل والطعم وأعطيني لا قبلة ولا خمسون أصبحت تكفيني
كلما وصل معدل العسل بالحنان والغزل ...ما يسد الرمق ويرويني
سوف أخبرك عن تساؤلك الدفين وصـرخات الاستفهام التي تعنيني
لكن يا سيدة القلب في الحقيقة أحتاج من عيونك ولو دقيقة بها تقرئيني
فإن وجدت ِ غير هالتك بِقلبى وفى تفاصيلى ..فانسلخي منى وقطعيني
كيف وكل البناء الذى فيه تريني محقون بصورتك وعليها قائم تكوينى

حانة أبليس .... بقلم سعيد سلامة

.......
فـِ نُص الليل
مَعا ضِحكه غِموض إفيه
كَانت كُوبليه
لـِ مقطع سُونج فـِ الأوبرا
كَات يُومها رُوحي شَاربه ويسكى فـِ مَدحها
كَانت صَابره
ومِتشافه فـِ عِين النِجم كَا زُمرد
كُل العروق كَانت بِتجرُد
بَردها فِيا ..
زَقتني لـِ أرض مَلاذ
وِبدأت أتلكع فـِ خطاوي
سَكير هَاوي يِبل فـِ ريقه مِن روحها
تِضحكي ؟
ضِحكت ولفت شَعرها بِيا
دِبلت كُل الورود فيا
كَان قَلبها أعواد بِخور
بِيفوح لـِ قلبي بـِ المُختنق بالـِ أكسُجين
اللِيل حَزين
بِيزق عِروقه لـِ صدرها
فِنجان مَطر فـِ خدي نَازل يِبل فـِ قلبها
فُستان يَتيم بِيبص عَ المانيكان
شَاهد عيان بَص وبَكى
تُرقص ؟
خَطيت عَ رمشها بـِ نُص حياه
مِسكت أيدها وَلفيت بِيها فـِ أسطنبول
كُنت أما أقول " وَحشتيني "
تِبوس جِبيني بـِ شَعرها
رُوحها الإزاز إتكَسٌرت لـِ قطع سُكر
غِيرت طَعم رِيقي الـِ مَقتول
شيزوفرينيا الخوف فـِ عيل بَتول
مِشمر قَلبه تِحت الدِمع فـِ عيونها
بِيعرق تِراك لـِ فيروز
ومَاسك كُوز مِن الفاخر لـِ بُن فـِ كنكه مَكسوره
مَغروره بِتُحضن مَجروح جُوه الصُوره
مَدت قَلبها لـ قلبي بِشويش
وفِضل يُدق "
جُرعة حِشيش جُوه الرئه جَرجرتنى لـِ أحتوائها فـِ صَمتها
بِتحبها ؟
طَبعا بَتوه مِن سِحرها ..
وفِجأه جِريت فـِ شَارع تِحت بَصات للنِجوم
رُوحها الازاز كَانت تِحوم وِسط الكاسات
كُل البَنات أتوترت
حَسيت بروحي إتخدرت ومِشينا حَد المِينا
كَان رِمشها يِشبه سَفينه
رِكبنا ووصلنا لـِ شَط الفرات
زَقتنى يومها عَ الصراط ..
وسَابتنى عند الـِ جنه بَترعش مِن السَقعه
أبُص فـِ جسمى عَ البُقعه مَش لاقي شئ
أرجع أموت
بالبطئ
أموت
أموت
بالبطئ ..

وَصمتٌ يُخيم .... بقلم مصطفى شاهين

خالفِة جَنابِي تَعَدي الحِدود
وِنظرَه بِلهفه لِجنابهَا بِبرود
بُوليسٌ مِعدي فَعلَّق سِيادتِي
وِمحضَر جَريمتِي
قَد اِستوفَى جِدا لِكُل الشُروط
فتاً أحمقاً يُغازِل فَتَاه
وَيركِن مُخالِف بِقولِ الشهود
فَأمرٌ بِحبسِي ليَالِي اِنفرَادِىاِنفرَادِي
جَريمَه تُشَقلِب كَيان القَواضِي
وَصمتٌ يُخيم
وَخِصمٌ فَقاضِي
حُضورٌ قَليلٌ وَصوتٌ يُنادِي
قَضية تَعَدى لمُجرم عَتيد
نُطالِب بِحبسٍ وَموتٍ أَكيد
لِهذا الفَتى المُستفِذ العَنيِد
فَلمَّا تَعدِي
فَهو يِهدِى
وَيَركِن مُخالِف ..

تنطع .... بقلم حسين صالح

 تنطع
عندما لاتفتح القصيدة قلبها لشاعر
وتبقيه في المنطقة الرمادية
لاطعم له
ولالون
القلة ينسحبون بلاضجة
محتفظين بماء وجوههم
والكثرة يواصلون التنطع
والادعاء !
من السهل جدا
أن تغتصب امرأة
أو تدعي اغتصابها
لكنك أبدا
لن تستطيع اغتصاب قصيدة
فلماذا تواصل التنطع
وما من أثر لقبلة لها
على خدك
وما من شعرة فوق كتفك
تشي بالعناق؟!