الجواب الكامل .... بقلم أحمد مطر

- حبيبتى الجميله
بعد التحيه والسلام ..
كل الكلام ناقص كلام
كل الطرق متقفلّه ..
كل الاغانى مُوجعه
لسه عيونك مُشبعه
بتكّفى روحى وحدها
ومهمنيش كان مين ظلَم
لسه الكتابه مُهلكه ..
لسه القلم بيجيب ألم
وهدوئى أصبح نرفزه
عايش بدونك معجزه
مبقتش بحسب للى جىّ
نُص ميّت .. نُص حىّ
من يوم ما غيبتى وروحى دايمًا .. فـ البعاد متشتته
من يوم ما غيبتى وعندى فوبيا .. من يناير والشتا ..
من يوم ما غيبى عيونى تسأل .. ليه باعده روحك عنّها
من يوم ما غيبتى وكل حاجه .. فيه حته ماتت مِنّها
من يوم ما غيبتى وكٌلى ضغوط
وبموت مرات فـ اليوم وبموت
غريبه بعيد ، وسكنانى ..
فـ غيبى عنى أرجوكى .. يا وحشانى !
- مين اللى حَب الحُزن كارِه لأفراحنا
مين السبب إن احنا مطرَحنا ..
مين اللى سلم عزرائيل رُوحنا
ما تقولى مين ؟ ..
- فاكره المطر ؟
أخر مطر .. كُنا سوّا
غنينا فيه وسط الطريق
كان لحن يشبه ضحكتك
وعنيكى كانت مُبهره
تشهد علينا القاهِره
إنى بدونك مش بخير
وسط البلد والفضفضه
جُوّا الزحام موجود فضا
بيساع من العشاق كتير
كان كل شئ كان مختلف
أو كنتى غِير ..
كنتى البسيطه الطيبه
الماسكه فـ كتافى بجنون
كانت الشوارع وقتها تشبه لجنة ربنا
أو ضحكتك وقت الصفا
يا حتة الفرح اللى هاجرت أنا قلبى م الحزن اكتفى
والدنيا تافهه مزيفه
بتشبه علبة الميكياج
بتدارى فـ التجاعيد
وتدارى فـ الأوجاع
لكنى وجعى عظيم
وفـ قلبى حزن كظيم
والروح مبقتش تشبهنى
بكتبلك ..
برغم إن معدش بينّا شئ يُذكر
بكتبلك ..
والدوله شومه وحُكمها عسكر
بيقطعوا الجوابات
ويكمموا الأفواه
وبيهبونا الموت
وبيسلبونا حياة
بكتبلك يا حبيبتى بالعند فـ الحكّام
بكتبلك ومش عارف ..
هذا الجواب الكام ؟!

بيت كبير ... بقلم عمرو يحى

إنت يالى خدت قلبي م الزمان ومن اللى فيه ،
خدت قلبي لدنيا تانية أحلى م اللى حلمت بيه،
أحلى عُمر أنا عيشته جنبك والحنان عندك كتـــــير ،
هو فيه كده زيي قلبك لسه فيه فى الدنيا خـــــــير ...
عُمرى ما أنسى أنا قبلك كنت ف إيه ومعاك بقيت أنا إيه
أنا باقى ليك ولحد ما عُمرى ..
ينتهى هفضل ياحبيبي معاك وهعيش وأموت بَهواك
أنا ليا مين غيرك حبيب عُمرى ..
🎷🎸🎻
ياما عيشت أتمنى أقابلك ياللى زيك مش كتير،
مش مجاملة عشان بحبك ده أنت ليا حاجات كتير،
هى كان مرة هقابل حد بيحب بضميــــر،
حد عاش عُمره عشانى وقلبه ليا بيت كبيــــــــر..
عُمرى ما أنسى أنا قبلك كنت ف إيه ومعاك بقيت أنا إيه
أنا باقى ليك ولحد ما عُمرى ..
ينتهى هفضل ياحبيبي معاك وهعيش وأموت بَهواك
أنا ليا مين غيرك حبيب عُمرى ..

عدالة أجتماعية ... بقلم الكاتب الساخر محمد راضى

- اعقل يا شحّات، وماتعملش في نفسك حاجة لو انتحرت دلوقتي هتموت كافر، وتبقى خسرتك دنيتك واخرتك كمان

= ..........؟
- ومش لوحدك اللي قرفان، محدش مرتاح في حياته اصلا، يعني ما يغركش عربيتي المرسيدس اللي انت سواق عليها دي، ولا شاليهي اللي في مارينا، او شقتي اللي عالنيل، وانت مش لاقي اوضة عالسطوح حتى تتجوز فيها
= .........؟
- ما يغركش اني بقضي الصيف كله بين بورتو شرم وبورتو مارينا وبورتو سخنة بَبلبط في البيسين، وانت بتقضيه في الجراش تغسل في العربية وتبلبط تحت خرطوم المية
= ..........؟
- رغم العز دا كله، برضه عندي مشاكل كتير، بس راضي بنصيبي وانت مش عاوز ترضى
القناعة كنز لا يفنى، وارضى بما قسم الله لك تكن اغنى الناس
= ...........؟
- تبقى غلطان لو فاكر اني مافكرتش في الانتحار قبل كدة.. لا دانا مع كل مشكلة كانت بتواجهني كنت بفكر انتحر
= وانت عندك مشاكل ايه اصلا!
- عشان انت اخيرا نطقت، هاقولك..
تخيل افتح فيس الاقي ابويا عامل اكونت لنفسه اسمه "كوكو الرايق" تخيل بقى ابوك يبقى كوكو.. ابوك يبقى رايق، ولا يبقى زي ابوك انت، الحج كرم اللي الناس كلها بتحترمه؟!
وابص عـ الصوره الشخصية للاكونت، الاقى ابويا بالشورت وامي بالبكيني.. يعنى مش كفاية اني بقيت ابن كوكو الرايق، لا دا كمان هبقى شحط ٢٥ سنة وصورة امي بالبكيني عالفيس قدام كل الناس!
الله يمسيكى بالخير يا حجة فوزية... مش امك اسمها فوزيه برضه؟
= اه!
- انا بقى امي اسمها فتيحة، وبتفشخ اللي يقولها كدة، فبنقولها يا فيفي! تخيل ابوك كوكو وامك فيفي!
= تخيلت
- تعرف فيفي بتصرف كام عالكوافير والساونا والـ Spa؟
= كام؟
- نص مليون جنيه شهريا، يعني في السنة ٦ مليون
تعرف ان الـ ٦ مليون دول، ممكن يحلوا ازمة فلسطين، او يوفروا اكل يحل مجاعة الصومال.. او نديهم للسيسي يحوشهم لمصر!
= او يجوّزوا ٦٠ شاب زي حالاتي بمعدل كل شاب ١٠٠ الف
- جواز!! لسة تفكيرك ضيّق برضه.. انت عاوز تتجوز ليه؟
= عشان اكمل نص ديني
- وايه يضمنلك ان اللي هتتجوزها دي هتكمل نص دينك، مش هتطلع النص اللي معاك؟
= .........؟
- عاوز تتجوز عشان مراتك تسحب من رصيدك البنكى ١٠٠ الف جنيه تشترى بيهم كلب، وتسحب كل شهر زيهم اكل للكلب.. وعلاج للكلب.. ولبس للكلب.. وبامبرز للكلب!
دا غير طبعا انها مش هتقل عن فيفى في الـ ٦ مليون سنويا بتوع الكوافير والساونا والـ Spa
= انت لو فاكر انك كدة بتصبرنى عالحياة تبقى غلطان يا عز بيه.. انت كلامك دا بيشجعني اكتر اني انتحر
- وتنتحر ليه؟
انت عالاقل ضمنت انك لما تعيش فقير هتدخل الجنة، من منطلق مبدأ ان الفقراء يدخلون الجنة.. فـ هتتعب كام سنة في سبيل الراحة الابدية.. لكن انا غني ومش مرتاح في عيشتي ولما اموت هدخل النار كمان
= دا بدل ما ترمى عليا مليون من الـ ٦ مليون بتوع الهانم الكبيرة امك، ولا الـ ٦ مليون بتوع الهانم الصغيرة مراتك.. او ترمي عليا ١٠٠ الف حتى من بتوع الكلب
- شوفت بقى كلامي اللي فات دا كله مافرقش معاك ازاي؟
فين "القناعة" اللي كلمتك عنها؟
فين "الفقراء يدخلون الجنة" اللي قولتلك عليها؟
= عندك حق، انا اقتنعت بكلامك ومش هنتحر
_ شاطر.. انزل من على سور الكوبري بقى
*بيسوق شحّات العربية، وعزّ بيه في الكنبة الخلفيه، بيشغل الكاسيت علر موسيقى موزارت، وبيرفع القزاز ويشغل التكييف، وبعدين يدوس بنزين لغاية ما توصل السرعة ١٨٠ كم/ساعة*
- بتعمل ايه يا مجنون؟
= بقتل نفسي عشان ارتاح، وبقتلك عشان ترتاح، وابقى قول لربنا انك ميّت مقتول واطلب منه ياخد حسنات من بتاعة "القناعة والفقراء يدخلون الجنة" بتاعتي ويدخلك بيهم الجنة.. ابسط ياعم
- طيب بلاش تموتني موتة بتوجع.. يعني بلاش تدخل في تريلّة، او تنقلب بالعربية او اي حاجة فيها دم
= انت بتعرف تعوم طيب؟
_ لأ.. بلاش النيل والنبي.. الجو البرد وتلاقى المية ساقعااااااااااااااه
*طاااااش*