و اتهَز مِن دَمعى الخَريف
يُرقُص على لَحن الوَداع
رَقصِة جياع
اتمَنُّوا حُضنِك قَبل أحضان الرِغيف
اتمَنُّوا يامْا اتمَنُّوا رؤيكِ
اتمَنُّوا بَس الظُلم مِستَكتَر
نُدخُل و نِلمَح سِحر لُقياكِ
ندخُل و هى موتة و لا اكتَر
ندخُل و هى موتة و لا اكتَر
و هى موتة و لا اكتَر ؟!
مدينتِك حَرب مَكتوبة
و لَزماُ حتماً ادخُلها
و اشوفِك أرض مَسلوبة
غيطانها ماشية فى عروقى
بتِعطَش لاجل ما تدوقى
حَنانى السَلسبيل جايلِك
بيجرى بسُرعة و يحايلِك
تِحِنى لقَلبى و تفوقى
على صوت الهَوى المُشتاق
و رافِض شَكل أى فُراق
فُراق قَمَر الونَس لِليل
فُراق الصُبح
لشموس الأمَل و الميل
فُراق الضَى لِلقَنديل
فُراقنا انا و انتى يا حَبيبتى
يا واخدة الجاى مِن شيبتى
لأحلى سبيل
سَبيل مَرسوم بلون روزى
غُناه تَغريدة فَيروزى
بتعمِل نَشوة مـِ الآخر
تِحَلّى المُر فى حظوظى
ساعِتها بس باتمنى
أعيش العُمر للآخر
و باعشَق كِلمِة الأيام
واحِب الجاى مَهما يكون
ما دام جَنبِك
مَلَكت الكون
و بيكِ كِملِت الأحلام
______________
