ساقط اعماركوا مخوفنى ... بقلم أحمد صبرى

ساقط اعماركوا مخوفنى
وكلامكوا الزايد ع الاحلام
انا ساقط قيد بس عارفنى
والنبى ما تاخدلى على كلام
انا زى الليل اما يضلم .
ويشد خيوطه الكل ينام
وانا زى حمام راح يتعلم
قام صابه رصاص الصياد
بقى حلمه مشابه للاوهام
انا عمر عقيم مين يبتاعه
مين ياخد قلب على دراعه
مين ياخد عقل سليم جدا
مين يقدر بس على طباعه
مين ياخد عقل سليم جدا
مين ياخد غُلب على طيابه

بتسالى ليه ... بقلم أحمد الاسوانى

بتسالى ليه ع اللى بيوقع
خلينا نتكلم ع الواقع
العمر حسابه يكون مظبوط
وقت ما هنامن وهندافع
بان الايام طبعها دواليك
يوم ليا ويوم راح يجيى عليكى
قوليلى كام مرة الدنيا
بتبكى عنيكى

ازاى راح تحسب ايامك .... بقلم عبدالرحمن فارس

ازاى راح تحسب ايامك
ونتا ناسيها..
وتوقع ف السكه سنين
واقع من عمرك بنادمين
جرحوك وسابوك..وسعات يخونك
واقع من عمرك احلى كلام
ازاى بهداوه بتسالنى
وتقولى فاضلى ف عمرك كام
واقع من عمرى الايام

واقع من عمرك كام عام ؟... بقلم أحمد فخرى الاسوانى

واقع من عمرك كام عام ؟
رديت عليه وقولته
_ واقع من عمرك كام عام ؟؟
* واقع من عمري كتير ياما
_ جربت تعيش الاحلام ؟؟
* جربت اعيش زي الآله
وامشي واتهته ف كلامي
مبقتش بعد ف ايامي
من كتر م بَسكر وانام
خليني احكيلك تفاصيلي .....
يمكن تحسبلي !!! واقع من عمري كام عام ؟

عشان ببات محروم .... بقلم محمد فاروق

عشان ببات محروم
بحلم بلحظة لقا
الهم صار مهموم
والدنيا كات ضيقة
قلبي باديكي اتسقى
الحسني بالسيئة
مبخافش فيكي اللوم
لو حتي ميت مشنقة
بقا لما اغربلك
الاقيكي ليه مشرقة
وتطفي ناري ازاي
وانتي العذاب غية
عندك وواخداني
للغدر تسلية
تبا لقلب هوى
صدق لك النية
ويل لمن يعشق
فردا و تثنية

غريب في بلاد بتعشقني .... بقلم محمد صابر الخولى

غريب في بلاد بتعشقني ما بعشقاش
حيطاني اتشققت حواديت
بقيت كما بيت
بيكره لمة السكان علي السيرة
غريب والشعر تأشيرة ما بتعديش لأي حدود
غريب غربة تذاكر قطر في المترو
تذاكر مترو في الارياف
عينيه بتطق ليل وأصحاب
تدمع دمع مش شفاف
وعكس الناس
بيتحامي
من الاشجار في حضن الريح
مع إن الشجر خواف ..
بقيت ضل لرفيق ميت
ولو عايش ماهوش موجود ..
انا المفروض
حبيبتي تخط لي خطين علي كفوفي وتمشيهم
ما خطتشي ولا خطّت
وانا مرّرت ما ( حلّت )
ربطت وبرضة ما (حلّت)
ولا (حلت) علي بالي
بقول الشعر موالي وما بتسمعش
مشيت في الغربة سكة حرام
لقيت إن الحلال ما ارجعش
وطار طيري
لمين الارض غير للناس ؟
وأرضي لمين سوا غيري ؟
لمين ارجع وانا المقتول علي باب الحنين ساجد ؟
مفيش فيا سطوح تنفع مراسي لأي طير وارد ..
بقيت عيل بيستغرب يشوف النور
مبرق حبة للشارع
مبرق حبة للراجع بلاده وشايل المكاتيب
غريب في جيوبه ميت ذكري
وذكري في شكل حد غريب
غريب عني وعن ارضي اللي دايساني وما نسيتهاش
غريب في بلاد ندوس اراضيها ما تدوسناش

إنّي بريءٌ ... بقلم هيثم جبل

إنّي بريءٌ من ضَناكَ وَدَائِهِ !!
كَبراءَةِ الأنيابِ من دمِ يُوسُفِ
إنِّي بريءٌ ، مَا هَجَرتُكِ طائِعًا !!
لَكِنَّهَا الأَقدارَ قالَتْ ؛ إكتَفِ !!
باللّهِ يا أَهلَ الهَوَى مَن منكُمُ
ذاقَ المَرارَ ؟؟ ، فدَمعَتي لا تَنْطَفِي
هَيَّا صِفُوا لِي ما يُداوِي أنَّتِي
أوَكُلَّمَا داوَيتُ قلبي ، التَاعَ فِيّْ ؟؟!!
إنِّي عَبُوسٌ قَمطَريرٌ لا أرَى
وبنورِ وَجهِكَ ، ذا عليلٌ قَد شُفِي