عن الماضي الذي سيعود
لمّا أسمع بالسفينه ،
يخطر آببالي السفر .
أبصر آوجوه اصدقائي ،
أبصر البسمه البريئه .....
الجانت اطعم من خدر .
لمّا أسمع بالسفينه ،
يوكَف اكَبالي البحر ،
توكَف اكَبالي المواني .......
والحقائب والصور .
لمّا أسمع بالسفينه ،
اتصيرلي رغبه أصلي للمطر .
////////////////////////////////
كَبلما آيطيح الشراع .......
وتغمض اعيون البحر ،
جان سكان السفينه .......
ايسوي كل موجه وتر ،
وجانت الموجه حمامه ابلون كَلبي ،
وجانت ارموشي شجر .
جان قرص الشمس مقلة عين .......
والدمعه كَمر .
جان للكلمه طريق ،.........
وجان للخطوه أثر .
جانت الدنيا أمان ،.....
وجانوا اصحابي بشر .
يا حلاة الفات من عمري ابهدوء ......
ويا حلاة اللي انكسر .
/////////////////////////////////////
آنا من يوم البجيت ...........
اوودعت آخر سفينه ،
كَلبي يحلم بالسفر .
ويَّ كل صفنة تأمل ،......
ارسم ابدفتر الليل انهار بيض ،
أرسم اشكال السفن ..........
وآرسم جوازات وحقائب ،
وآرجع آشطب عالصور ،
لأن آنا والسفينه .............
انعيش في أزمة قدر .
آنا ماعندي جواز ولا حقيبه ،
ولا صديق ايغني موال البحر ،
وهيّه ماعدها ولا حتى نهر .
//////////////////////////////////
اصلي للمطر : اشارة الى حقيقة علمية تقول بنشوء البحار
نتيجة الامطار بعد انفصال الارض عن الشمس .
