قصيدة : عصفور وقف ع السور ... بقلم الشاعر محمد مرعى

عصفور وقف ع السور .. كَسر رجليه
عصفور وقف ع المية .. شاف وشه
عصفور ضحك للنور .. فقعله عنيه
عصفور ضحك للغصن .. رمى عشه !

*****
الصقر ساب النسر في اﻷعلام
فرحان بصورته ف خِتم سجن حديد
أزرق في آخر ورقة اﻹعدام
أسود ف صورة إعفا م التجنيد !
*****
الشيش فتح درعاته حضن النور
حاشني القزاز وأنا كنت طيف شفاف
الأرض وقفت والبشر بتدور
والوقت عقرب والساعات بتخاف !
*****
غطوا القلل بالشال عشان ماشربش
لكن الدماء نشعت من الفخار
سألت شهيد في الجنة ليه ماهربش
قال الرصاص أهون كتير م العار !
*****
شفت الشجر بيخبي باﻷوراق
إبنه الثمر من بطش ناب الطوب
شفت الحجر فيه دود وله أرزاق
بات القمر غالب صبح مغلوب !
*****
باب القفص مقفول على السجان
وأنا كل قفل ف روحي كان مفتوح
قش العشوش أنشف من القضبان
لو كان في شجرة غريبة غير الدوح !
*****
ياشمس طالعة تنشف المناديل
لسه الدموع ناشعة ف كل جدار
البحر ضلمة ولا فيه قناديل
تقرصني بعد ما أموت وأخش النار !
******
بدروا الحبوب في اﻷرض طرحوا رصاص
حدفوا السنان للشمس طلعوا نياب
هل مات في يوم عصفور وطلبوا قصاص
من يوم ما مات مقتول ودفنوا غراب !
*****
يا شهوة الفلاح في بطن اﻷرض
سامع آهات نشوتها تحت الفاس
عرقه بينزف فيها تطرح ورد
يهديه الحبيب لحبيبته .. تِطرح ناس !
*****
عصفور ضحك للنار كلت جناحيه
إزاي بتغزل م اﻵهات غنوة ؟
الناس بتضحك وأنت زعلان ليه ؟
ما أعرفش أغني للملوك .. عنوة !

قصيدة : واقف على أعتاب السنين .... بقلم الشاعر محمد موسى

واقف على اعتاب السنين و الحيره غلابه
فات الكتير م العمر ولا اللي باقي اكتر
انا ابتليت بالضحك في عز معمعتي
و انا افتريت في الضحك مش اكتر
...
سَرق الكلام من عمري ما سرقه
الرعد طقطق في السحاب برَقه
سهاني عمري و غش في ورقه
ولاقيتني شايب و الجميع جوكرات
...
غطا البياض من شَعري ما غطاه
زاد الحنين من شِعري .. يا الله
صوبت سهمي ما اصاب مرماه
ده اكمني دوغري و الحياه حركات
...
و اكمنها زي التلت ورقات
فلست فى عشقها
و صاحبت مٌر الكاس
خالت عليا حيلها و لعبنا بالمعدن
كان النصيب باسكل
من خيبتي قولت ده راس

قصيدة : قالوا ثورة ... بقلم الشاعر محمد حسنى

قالوا ثورة/قلنا ثورة
قالوا غوروا قمنا غورنا
ثم خيرها كان لغيرنا
تعرفى لو كنا غيرنا!
نقلب الأسياد عبيد

قالوا ثورة/قلنا ثورة
قالوا غوروا غورنا تانى
خيرها عمره ف يوم ما جانى
ركبوها لكل جانى
ثم فين حق الشهيد!!

قصيدة : بعدك يتيم ... بقلم الشاعر مصطفى شاهين

بَعدِك يَتيِم
دَاير بَوزَع وِحدَه عَلى كُل البَارَات
وَاشرَب سَواد الليل وَاعاتبِك " وِانتِي غَايبَه "
وِعيونِي خَايبَه مَبطلِتش عَليكِي نَوح
لمَّا انتِي سَايبَه الرَوح " وِلمَّا مَعَادش رَجعَه"
وِخَلاص صَلاتِك فِيَّا تَمِت رَكعَه رَكعَه
لَيه لِسَّا غَاويَه تِظهرِي لِي فِ وَقت نَومِي
لَيه لِسَّا رِيحتِك بَين هِدومِي " مَا خَدتِيهَاش "
بِالله عَليكِي يَا شَيخَه رُوحِي
لحَال سَبيلِك
خَلينِي اَشيلِك مِن حَياتِي " مَا عِيشتهَاش "
لازِم فِرَاش اليُتم قَلبِي " بَعد مِنِّك "
أَقنعتُه إِنك مِن عِدَاد المَرحومِين
وِبيجِي طَيفَك كُل لَيلَه " يِحس كِدبِي "
وِعليَِّا يِدعِي وِكُل ضِلع يِقول آميِن
مَلعون حَنيِن هَيشِدنِي لِشيِطَانَه تَانِي
تِكسَرنِي بِيهَا وِتتهِمنِي بِإنِي جَانِي
وِبإِن حُضنِي مَكَانش لِيهَا وِكَان سَبيِل
وِدَه أَمر عَادِي
هِو مِن أَمتي اللِي بَاع
بَعد الوَدَاع " يِذكُر حَبيبُه " بِأي خَير .. 💔

قصيدة : متلازمة هى ... بقلم الشاعر عمرو حسن

ساعات الحضن بيغيّر لاسوأ
ساعات القرب مابيبقاش مزايا
غلطت ازاي وانا كان قصدي اقولك
بانك وهب رباني وهوايه
واني لقيت ف اول خطوة بيننا
مساحة بيت وطفل وبونبونايه
وشوفتك يشهد الله اني شوفتك
نزيلة قلب مفتوحلك بنايه
اقولك ايه وانا والله ردي
لاينفع حكي ولا ينفع قرايه
لكني فهمت
وكنت فهمت فجأة
بإن الكل كان فاهمك عَدايا
رموكي بظن شيلت الرمي عنك
وجيتي عليا جربتي الرمايه !
ابص عليا وانا كان ضهري ليكي
عملتي جريمة ماعملهاش عِدايا
لكنني سكتّ وكتمتك بسيرتك
خسرتك وقت مابدأتي الوشايه
عزيز النفس من عيّط ما بيّن
قليل الأصل من فضح الكنايه
يُثاب بالضعف من أمسى حنيّن
يُجازى ف قلبه من رد الهدايا
اديكي معاكي زي ماكنتي عايزة
ياريتني ارجعلي وده املي وعزايا
بان اللي انتهي جوايا منك
يسيبني اتأكد
انك مش معايا.

قصيدة : كل شىء له حكمة ... بقلم الشاعر محمد عادل

كل شئ له حكمة - باين -
مطرة تنزل وقت مانتي تودعيني
تبل عيني لاجل ماتشوفينيش بعيط !!
ورقة فيها قصيدة ليكي تجري مني في إيد رياح
وأنتي بالصدفة البسيطة واقفة ع الكورنيش معاه
رافعة إيدك للسما بتدعي إنه يفضل
فالرياح ترمي القصيدة عليكي رمي
تقري فيها كإن عينك طول حياتك كانوا عُمْي
ف تسيبيه وتجيلي تاني !!
قصة دارت مرة بينا - علمتنا الحزن صح -
كلمة ربطت روحي فيكي - قومتي واخداها وهربتي -
من ساعتها انا بعرف أكتب !!
ضحكة طلعت وقت غيرة - موتت حبك في قلبي -
إهتمام خلاكي فاكرة بإني - عيل سهل جداً -
ف الطبيعي تهمشيني !!
توحشيني أكتب قصيدة وأنسى بيها
أقرا منها ف توحشيني !!
كل شئ له حكمة - باين -
زي إني هموت وأشوفك وأما أشوفك مابتسمش
ف أعرف إن " الحب كدبة " !!
زي مرة حلمت بيكي ( ديب ) وقاعد ع الرصيف
كات ساعتها الدنيا ساقعة وأنتي دابب فيكي رعشة
شديدة جداً
وقتها خدتك في حضني وأما دفيتك بروحي
روحي سقعت
وإتتاكلت من البرودة
بس أول مانتي جوعتي - كلتي كل الباقي مني -
كل شئ له حكمة - باين -
بس ايه الحكمة إني أسيبك - نصل سيف - بيشق قلبي !!
بس ايه الحكمة إن أنا أكتب ( نص مؤلم ) زي ده ..

قصيدة : مصدقتش كلام الحب ... بقلم الشاعر محمود الطنوبى

مصدقتش كلام الحُب في الاول.
ولا عنيها.
ولا الرعشه اللي في اديها.
في وقت سلامنا لو بالإيد.
مصدقتش .
كلام الشِعر ع الصُدفه و ع المواعيد.
وعن بنوته تخطفني.
فأصبح بالزمن عاشق.
واشوف الدُنيا من عنيها.
وعن انسيّه لو تمشي.
تلاقي ملايكه حوالينها.
مصدقتش كلام الناس.
عشان فيه ناس خلاص الكدب لوّنها.
مكدبتش في يوم عيني.
تشوفلي الجاي ومخافشي.
بقابل كل يوم مخلايق.
و اودعهم.
و افارقهم.
ورايح جاي ماتعبشي.
صحيح بيأس يومين ف العام.
لكن برجع .
وبضحك للجاي هناك.
لقيتك جايه علشاني.
مفيش ولا شئ في امكاني.!
غير اني اضحك .
واقول حبيت.
فتحت دراعي ک الجناحات.
وطيرت اتخبي بين حضنك.
بقيت ک الطير.
بنيت العِش علي غُصنك.
وطيرت اطوف في ملكوتك.
وشوفتك كٙعبه ومشاعري.
ک فوج حُجاج.
بتدعي ربها و تطير.
وشوفت الدُنيا في عيونك.
ولد راسم مشاعر ليكي بالطباشير.
بيضحك لما تبتسمي.
ويرقص رقصه الدراويش.
يهز دماغه في الرايحه.
وفي الجايه يموت بشويش.
ميتضررش من صمتك.
وقابل فكره انك فيكي مِ العُزله.
وقابل السكوت بالشهر.
وكلمه في ليل طويل وممل.
يعيش ليها بقيت الدهر.
بيسهر بالوجع في الضهر.
لكن فرحان عشان فرحك
ومينامشي و يموت م الخوف.
علي جرحك.
مالوش غيرك.
وكان عارف بإن اخرها مش "هو".
ماهوش شاعر ولا فتوّه .
ولا دنچوان فاضي.
يلاحق في البنات في الليل.
ولا في جماله كان يوسف.
وخاف لو ينكروا التأويل.
ماهوش خارج عن المألوف.
ماهوش داخل مع التفاصيل.
في صُحوبيه.
لكن والله كان قلبه .
برغم الحُزن و التجريح.
يساع مِيّه.
وروحه الهٙشّه كات غِيّه .
هجرها حمامها من فتره.
سكنها سِرب بوم ابيض.
ومن خوفه لقصاص الله.
ما موّتهُمش.
ورغم الكدب كان واضح في عين الناس.
في اول مره يقابلهم .
مكدبهُمش..
ف ليه انتي اللي بتهاجري.؟!
انا قلبي بيرفض اي حد دخيل.
بقول للناس وأصحابي.
اكيد جايه.
جايز أن الطريق زحمه.
جايز تليفونها كان عطلان.
وعجزت انها تجيلي.
ماليش غيرها.
مفيش غيرها.
بيكشف حٙبك تمثيلي.
دي هي المُخرجه للعرض.
تغيب ازاي ولسه ستارتي مستوره.
ومش هفتحها للجمهور.
بدون ما تعدي علي روحي .
وتمضي حضور.
ماجتش ازاي.؟!
ده لسه امبارح قبل ما انام.
مكلمها وكله تمام.
قالتلي جايه في معادي.
كما كنت علي معادك في كل مكان.
قالتلي خاف علي نفسك.
وخِف الشُرب و الدُخان.
مجاتش ازاي ولسه رُوچها علي خدي.
اكاد اجزم بإن مفيش واحد قادر.
يحب البنت دي قدّي.
ماليش غيِرٙك.
قالتهالي
طلع ليها.
ماليش غيرها.
ماليش فيا قد ما ليها.
ماجتش ازاي؟!
ولسه ريحتها في هدومي.
فلشت بإني امحيها....