قصيدة : انا بكتبلك الليله ... بقلم الشاعر عزيز محمد

انا بكتبلك الليله
عشان ما أعلنش إفلاسى
من الانسان
قصيده يعيبها بعض الضعف والكسره
وسوء تقدير
لما علمتنى إياه...
شايفنى الليله مش ابنك؟؟
انا موافق
شايفنى عجوز ومن سنك؟؟
انا موافق
شايفنى الليله نفسى أطير؟؟
انا موافق
بشرط ترجع الجناحات
لحضنك تانى أو ترجع
هنا جنبى
ومش ذنبى
تسيبنى ضعيف
ف عش النحل والدبابير
وفكرى ان العسل مسموح
اتارى الروح
بتنقص منى ف المشاوير
وخست منى ف الرحله
بموت والله كل دقيقه من غيرك
وساعة الضعف بتعانى
ساعات بيقدم العقرب
فاموت م الخوف
ساعات بتعانى م التأخير
فأموت م الشوف
وانا شايف
عيال من سنى بتحلق
ب حريه
وبتلاعب
نجوم الحظ كوتشينه
وانا اللى مصاحب الأشجار
بحس الجو مش ليه
شايفنى الليله ..آه عاجز
أنا موافق
شايفنى كسير..يئوس جايز؟؟
انا موافق
شايفنى الليله عبء كبير
انا موافق
بشرط ترجع النضاره لجرابها
وكسرة حلمى لدولابها
واوكرة نومى لصوابها
وفكرة بومى لغرابها
انا موافق
بكل شروطك المنصوصه ف السابق
وف اللاحق
بشرط انك
تشوفنى الليله ف احضانك
امانه عليك
بحق اللى
ف غيابك عمره ما خانك
تسيب العضم ف مكانك
وتبعت روحك المظبوطه بالميللى
بتوقيت الكفن والموت
تاخدنى إليك
ولو ساعه
ولو لحظه
امانه عليك ما تتأخر
ومستنيك........

قصيدة : برج الميزان ... بقلم الشاعر محمد السكندرى

إحنا اساساً مابنعرفش نعبر عن اوجاع جوانا
بنسمع لكن مابنقدرش نِشغل حد بحاجة معانا
بنحاول ليه مانتغيرش و الكُل إتغير ويانا !
بِنعَدي و نُسكت و نِداري و نطيب اوجاع الخلق
لكن لما بنحتاج حد بنحس إنه بيعمل فرق
و بيهمل مشاعرنا بجد مع إننا لما بيحكولنا
بنبقى معاهم وقت الجد ، بنداوي و بنخفف عنهم
بنشيل وياهم علشان بيهمونا فـ بنطمنهم
لكن مين فيهم بيحاول يفهم شئ جوانا و يطيب
بنقرب و فـ الأخر نزعل إن مافيش والا حد قريب

قصيدة : وحشتينى ... بقلم الشاعر أيمن قطب

هقول تاني بعلو الصوت
أنا المسحور تفاصيلك
أنا الناحت تماثيـــلك
وانا القلب اللي لو مجروح
بينسي الجرح ويجيلك
يطول ليلك فـ يشكيلك
عن اللي شافه فـ بعادك
عن لهفة شوقه لميعادك
عن الخوف ان يوم تنسيه
عن الفرح اللي خاف تكسيه
دموع الحزن وانتي بعيد
عن الطفل اللي مستني
علي جمره هدوم العيد
عن الشعر اللي كان رافض
يواسي القلب ف غيابك
عن القمره اللي وصيتها
تكون حارس علي بابك
كتبلك قلبي 100 مرسال
بدم ودمع عمره ما سال
إلا .. فـ يوم ما سيبتيني
ولا عمره ما كان يكتب
غير إنك .... وحشتيني

قصيدة : مصر أزاى؟ .... بقلم الشاعر على مصطفى

ومصر ازاى؟
.
وانا أول ما اقوم الصبح بلقى الهم فى الشارع
وبلقى وشوش ماليها العجز فى العشرين
وناس تنشر دموع الليل على احبال السطوح يمكن
ياخدها الصبح ويروّح
ويرجع فارد ابتسامات على الكفين
وحق اللى خلق فينا عقول وعينين
أنا شايف حكاوى زمان بتتبخر
ونور الشمس مش قادر يخلى عيون تشوف أوضح
فكل الخلق تتقدم
وبرضه بلدنا تتأخر
.
أنا عارف بإن الآن
كمان أرحم كتير م الجاى
وان عياط فقير يوجع
بدون دمج الوجع بالناى
يا كل اللى تعب صمته
وتقّل حبتين فى الشاى
صداع بلدى صبح مزمن
قولولى بجد إن أمكن
دى مصر إزاى؟؟؟؟؟؟؟؟؟؟؟؟؟؟؟؟

قصيدة : جوه الحدوتة ... بقلم الشاعر أحمد النجار

شعرا وماشيين
من غير اقلام
كاتبيين اشعارهم
فى النوته
ابطال رواياتهم
فى الافلام
اطفال مشاعرهم
مكبوته
راسمين فى خيالهم
كوم احلام
بتضلل على روحهم
توته
ومابين حكايات
او كان ياما كان
ملناش دور
جوه الحدوته

قصيدة : عصفور وقف ع السور ... بقلم الشاعر محمد مرعى

عصفور وقف ع السور .. كَسر رجليه
عصفور وقف ع المية .. شاف وشه
عصفور ضحك للنور .. فقعله عنيه
عصفور ضحك للغصن .. رمى عشه !

*****
الصقر ساب النسر في اﻷعلام
فرحان بصورته ف خِتم سجن حديد
أزرق في آخر ورقة اﻹعدام
أسود ف صورة إعفا م التجنيد !
*****
الشيش فتح درعاته حضن النور
حاشني القزاز وأنا كنت طيف شفاف
الأرض وقفت والبشر بتدور
والوقت عقرب والساعات بتخاف !
*****
غطوا القلل بالشال عشان ماشربش
لكن الدماء نشعت من الفخار
سألت شهيد في الجنة ليه ماهربش
قال الرصاص أهون كتير م العار !
*****
شفت الشجر بيخبي باﻷوراق
إبنه الثمر من بطش ناب الطوب
شفت الحجر فيه دود وله أرزاق
بات القمر غالب صبح مغلوب !
*****
باب القفص مقفول على السجان
وأنا كل قفل ف روحي كان مفتوح
قش العشوش أنشف من القضبان
لو كان في شجرة غريبة غير الدوح !
*****
ياشمس طالعة تنشف المناديل
لسه الدموع ناشعة ف كل جدار
البحر ضلمة ولا فيه قناديل
تقرصني بعد ما أموت وأخش النار !
******
بدروا الحبوب في اﻷرض طرحوا رصاص
حدفوا السنان للشمس طلعوا نياب
هل مات في يوم عصفور وطلبوا قصاص
من يوم ما مات مقتول ودفنوا غراب !
*****
يا شهوة الفلاح في بطن اﻷرض
سامع آهات نشوتها تحت الفاس
عرقه بينزف فيها تطرح ورد
يهديه الحبيب لحبيبته .. تِطرح ناس !
*****
عصفور ضحك للنار كلت جناحيه
إزاي بتغزل م اﻵهات غنوة ؟
الناس بتضحك وأنت زعلان ليه ؟
ما أعرفش أغني للملوك .. عنوة !

قصيدة : واقف على أعتاب السنين .... بقلم الشاعر محمد موسى

واقف على اعتاب السنين و الحيره غلابه
فات الكتير م العمر ولا اللي باقي اكتر
انا ابتليت بالضحك في عز معمعتي
و انا افتريت في الضحك مش اكتر
...
سَرق الكلام من عمري ما سرقه
الرعد طقطق في السحاب برَقه
سهاني عمري و غش في ورقه
ولاقيتني شايب و الجميع جوكرات
...
غطا البياض من شَعري ما غطاه
زاد الحنين من شِعري .. يا الله
صوبت سهمي ما اصاب مرماه
ده اكمني دوغري و الحياه حركات
...
و اكمنها زي التلت ورقات
فلست فى عشقها
و صاحبت مٌر الكاس
خالت عليا حيلها و لعبنا بالمعدن
كان النصيب باسكل
من خيبتي قولت ده راس