مَلحَمَةٌ إغريقِيَّه ..

سَأعتَنِقُ مَذهَبَ الحَوّافّ ..عِندَ مُنتَهى المَسافَة... ...يَنضَحُني وُجدانِي.. بفِِطرَتي... لأرتَسِم َعلى قِبابِ لَوعَتي ..نَهَماً ...أُطالِعُ بِهِ سُفوحَ الجِيد ..لُجَيناً خالِصاً ....عِندَ مُلتَقى الرُّمَان ...فَأتَطَيَّرُ بِالجَوى ..وَأشُّدُّ رِحالَ الشِّغافِ ...إلى بِقاعِ الوَرد في خَدَّينِ ...تَفَتَّحا مَيسَمَين .. ..وَلا نَحلَ يَرتَشِفُ الجَنى ....قِفارٌ وَمفازاتٌ ...دُونَها .....وَنَبضي بِلا وَجَل... راهِبٌ يِتَوَكَّأُ ...وَعَصاهُ ... نَجواي ...وَشَبَقي المُعَتَّقِ في غَياهِبِ الجَديلَتيَنِ ....قارورَةّ نبَيذ ....والأهدابُ ...مَلحَمَةٌ إغريقِيَّه .. ..مَيدانُها العُيون .....وأسوارُها الفُتون ...يَستَبِدُّ بي ظَمَأي عَلى قارِعَةِ الوَقت ...عِندَ مُنتَصَف الذُّبول ...فَتَنهَمِرُ في أوصالي....هالةٌ مِنَ الغَيبِ ... عَجفاء ... أُطفئُها ..بِأُقحُوانَه ....وأنسَلُّ مِن قَبضَةِ حِرماني ...كَماردٍٍ.. .أو..شُعاعٍِ نور ..فَلَقَد إحتَرَفتُ طَرائِقَ لُقمان ....وَناصِيَتي نَسجٌ مِن حِكمَةِ السَّماء..... .وَفَزعي ...إرادَتي ...فَلا أريدُ يا قَمَري في حَضرَةِ السُّكَّرِ أن أريد .....وَلا شيمَةِ لي كَشِيَمِ العَبيد .....وَلكِنَّني أستَبِدُّ حينَ الحُسنِ.... لأرمُقَهُ عِشقاً وَأستَزيد ...فَأنا المَوسومُ بِجمالِ ثَغرِِكِ... عُنقوداً .......حارَت فيهِ العَناقيد ...أعدو بِصَبابتَي في بَيداءِ ذاتي ... عَدوَ ظَبيةٍ مَذعورَه ....أُبَدِّدُ عَنَّي غَزْلَ الأمنِياتِ ..عَلى هَديِ أسطورَةَ الهَديل .....فَالصَّبُ ....يا خاصِرَةَ العُمرِ ِ..::::...نََسرٌ بِلا مَخالِب ..... وَنَمِرٌ مُرَوَّضٌ مَنزوعُ النُّيوب ...وَهُوَ ريحٌ داجِنَةٌ .........وَهُوَ الظِّلُّ بِلا جَسَد ....وَمَلاكٌ في غَمامٍٍ مِن حَسَد .وهو الساهرُ على سَكينةِ المَعشوقِ...وَفي مُقلتيه ثِقَلُ الوَسَن ....رَصَد.... ...فَلا تُوغِلي في الغِياب .....يا جَذعَ الحُلم ِ ....وَديباجَةَ غَدي .....وَشهدَ الأمسِ ......فإنّي مَسَّني.....مِن فَرطِ سحركِ.... اللُّغوب .....فآرتِقي نَفَسي المُمَّزَّقِ وَجداً..... وَكوني سِدرَة مُنتَهاي ...قابَ ضَمَتَينِ...أو ... حَبَتَيّ نَبَق.....

أسطورة رأس البقرة

وبتعتبر أحد أكبر الأساطير المرعبة في اليابان ( بتدور حوالين قصة ملعونة ) .
بدأت القصة تنال اهتمام الناس، ويكتبوا عنها بداية من القرن ال17 ، والقصة دي محدش يعرف مين اللي كتبها ، وأمتى وأيه سرها ..
مصدرها الأول غامض جدا ، والشائعات بتقول إن اللي كان بيسمعها كانت بتصيبه حالة رهيبة من الرعب والهلع، ويفضل يرتجف من الخوف لحد ما يموت .
في وقتها اعتبرت السلطات إن القصة دي مصدر خطر كبير، وبالتالي جمعوا وأحرقوا معظم نسخها اللي قدروا يوصلولها.
وكالعادة كان فيه نسخ مقدروش يوصلولها، وما اتحرقتش، وأختفت، وفيه منها اتقطعت بس، واتوزعت في أنحاء اليابان، ولحد دلوقت فيه ناس كتير مؤمنة إن أجزاء من القصة المرعبة دي لسة موجودة لحد وقتنا هذا .
معظم تفاصيل القصة الأصلية لحد دلوقت مش معروفة، لأن التعساء اللي سمعوها كاملة، محدش كان بيعيش كفاية عشان يحكيها..
- وبيحكوا إن كان فيه مدرس في مدرسة ابتدائية، كان بيمتلك جزء حقيقي من الأجزاء اللي نجت من الحرق، والمدرس ده في يوم من الأيام، طلع مع أطفال مدرسته في رحلة مدرسية من الرحلات الطويلة، وكان من المعتاد إنهم يحكوا قصص مخيفة معظمها عن الأشباح عشان يسلوا الأطفال خلال المسافة الطويلة دي، ومع مرور الوقت القصص مبقتش تثير حماسة الأطفال ، فقرر المدرس في لحظة ملل يحكيلهم الجزء اللي يعرفه من الحكاية الأسطورية المخيفة دي.
حكاية رأس البقرة .
وقبل ما ينتهي من الجملة الأولى الأطفال كلهم اتفزعوا، وكأنهم شايفين ملك الموت قدامهم، وصرخوا فيه :
- متكملش ..متحكلناش حاجة .
لكن المعلم رفض واستمر يحكي الجزء اللي يعرفه من القصة ..
ومش كده وبس، دا كمان سواد عينيه اختفى، وأتحولت لبياض مخيف، وكأنه إتمس أو سيطرت عليه قوة مجهولة ..
فضل الأطفال يصرخوا، والمدرس يحكي بشكل مرعب ..
وبعد ساعة فاق المعلم وهو مذهول ومرعوب .. لقى الأتوبيس، مقلوب في قلب حفرة، وكل إزازه متكسر، والمقدمة منتهية، وكل الأطفال مغمى عليهم ، والسواق راسه على الدريكسيون، وبيسيل من شفايفه زبد ابيض وكأنه كان عنده حالة صرع. وكان عرقان وبيترعش ..
اللي حصل بعد كده محدش عرفه، والأطفال مصيرهم فضل مجهول ، لأن السلطات عتمت على الموضوع..
لكن الأكيد إن المدرس محكاش الحكاية دي لحد تاني ..
- وكمان بيحكوا عن قرية مهجورة، في مكان مجهول، وصل ليها علماء الحفريات، وكانوا كلهم مندهشين، إن مباني القرية كلها موجودة، بيوت ومحلات، وغيرها، وكلها صالحة للسكن والمعيشة، ومفيش حد عايش فيها نهائي، على غير العادة.
ومع بحثهم لقيوا هيكل عظمي غريب، ومعاه رأس بقرة، وجثة رجل، وبدراستهم، وتقدير عمرهم اكتشفوا إنهم بيرجعوا لزمن قبل زمن المجاعة الشهيرة اللي اجتاحت البلاد في الفترة دي ..
المجاعة اللي أجبرت سكان القرية إنهم ياكلوا كل أنواع الحيوانات الحية الموجودة فيها، مهما كان نوعها..
بقر، خيول، كلاب، قطط ، ضالة، وأليفة .
مسابوش حاجة ماكلهوش وبعدها بدأوا يموتوا من الجوع ونقص التغذية.
وبالنسبة للقصة الأصلية :
كان فيه شخص اتفتن بالقصة دي ، وبحث عنها بحث مستميت، وبالفعل ملقاش أي أثر ليها في الإنجليزية، كل الموجود كان حكايات عن القصة الأصلية، ولما بحث باليابانية بحث عميق، وصل لمعرفة جزء من القصة الأصلية، اللي حصلت في أيام المجاعة اللي أتكلم عنها علماء الحفريات، وليها علاقة بالهيكل العظمي وجثة الرجل، ورأس البقرة ، والقصة كانت بتحكي عن:
إن في يوم من أيام المجاعة الرهيبة دي، ظهر راجل غريب بيتجول في شوارع القرية، وهو شايل رأس البقرة أو جوزو زي ما اطلق عليه، ومعاه جثة راجل.
القرويين أول ما شافوه هجموا عليه وقتلوه بوحشية ، وكانوا بيقطعوه بأسنانهم جزء جزء وهو حي وبياكلوه.
ومن وقتها القرية اتلعنت، وانهار كل شيء فيها ..
وده كان الجزء الوحيد اللي هو وصله ..
وده يخلينا نسأل، لو دي بداية القصة المفزعة، فنهايتها هتكون إزاي، وأيه سر رأس البقرة، والجثة .
ويا ترى لو إحنا حكيناها بصوت عالي هيحصل أيه !.

عشان عارف .. بقلم مصطفى محمود

هكون كداب يا خلق الله
ده لو أفتيَت
بإنّي حقيقي كنت اعرف
لماذا العِشرة بين روحنا مبدُّمشي ؟
وليه طعم "الفراق" أسهل على لسانّا
مَنيش أعقل عباد اللهِ يا اخوانّا
عشان بزعل ..
وببقى ساعات كما العيل وبتلكك
وباخد جمب من اقرب حبيب ليا
لكنِّ بسيب صِمام القلب متوارب
عشان عارف ..
بإن الدنيا مش باقية
ومش مستاهلة تعقيدنا
وإن خصامنا مش لزماً
يسوقُه العند بمراكبه
لموج الفرقة وغريقها
فليه نمسح "انا اسف" من المُعجم ونعزلها
ونفضل فيها بنأوّل
بإني الكلمة معناها بيوحي "بضعف" مش أكتر
وليه "الصفع ع الأوجُه" بقى مبدأ بيستكتر
نلم الشمل من تاني
ويبقى القُرب منهجنا
ياريت نرخي العناد حبّة
بلاش نقفلها بالضبة
عشان كلمة "ياريت" قدام
هتفضل فينا بتأنِّب
يا أهل الله كفاكوا بعاد
بيوجع فينا ويعذِّب

بشاشة وشي لو تنطق .... بقلم محمد عبدالقادر

راوي الحديث قلبه خراب بين
وعارف بإن الكلام فـ الماضي مش هين
وأحداث القصه مش صدفه
البنت كانت غاويه تسمعني
رغم ان حبي صابها من غير ما توزنها
ازاي بتتحمل تمسح دموعي وهي مش منها
البنت عارفه بإني قلبي انتهي
من واحده باعت ومصممه تشتري
ازاي بتقدر تحبس وجعها فـ صمت
وازاي يجيلي قلب اكون مفتري
احكيلها عن بنت الـ... اللي سبقتها
وهي كإنها واخده حقنة بنج
بتبان قصادي بشوشه لا تُقهر
مع ان قلبها هش زي سفنج
مش زي سابقه قلبها جبروت
طب ليه بتبقي فـ وشي حجر صوان
ومن ورايا بتتمني قُرب الموت
بصي
انا كنت قبلك شيء ملوش لازمه
مخنوق ساعات وتكشيرتي عـ السحنه
وانتي اللي جيتي غيرتي هذا العبث
ووقوف سواعدك جنبي فـ المحنه
كانت جميله عقلي شالهالك
هطْلق لساني بكام جمله اقولهالك
قربت منك مش عشان محتاج
علشان كملت بيكي عـ العموم نقصي
فـ حبيت احبك طلع الوجع عكسي
بغض النظر عن الماضي ولعبكته
فإن لكل شيء وقته
وانتي صبرتي وشديتي ترحالك
ورميتي من حالك بدعوه علي مصَلْيه
ومازلتي مصممه برضه
واخده قرار الاعتكاف ليا
واخده فـ ايديكي كل قصايدي فـ ايد
وفـ التانيه شايله همومي فوق كتفك
وكإني طفل فـ مرحلة تسنين
لفيت أراضي الدنيا ست سنين
ملقتش شخص بيشبهك غيرك
بشاشة وشي لو تنطق
هتدين بفضلك والضحكه من خيرك
ديرك ياراهبه برغم ضيقه مريح
وصريح يعاتب قلبي لو غلطان
براكي ببقي فـ عز سيطي غريب
ومعاكي ببقي برغم الوجع سلطان
فـ القلب تلقي خُطايا عـ الشريان
وفـ عنيكي سكني لو تزيد مُتسع
حضنك براحي فـ عز ضيق الهوا
ضاق البراح وفضلتي وحدك وسع
القُرب مني زاد فـ قلبك ضعف
فـ امشي بغصب وجبر لو ناويه
انا عارف ان القُرب دبح لشخص لسه غريق
والبعد آخر حل لشخص عـ الهاويه
الحب موت لو من طرف واحد
وبيبقي حلو لو الكفه متساويه

لو كنت اقدر ابقى .... بقلم على دياب

كل طيف لو كان اوانه ف الانسجام
ويا الشعاع المنعكس ع رمش عينك كان هيكره
كونه طيف من سراب او من كلام
وانا مش امام
رافع ايديه لحظة صلاه وانتوا تلبوا تكبروا
ممكن اكون
انتيكه مركونه ف تراب التلبيه وسط الركام
لو كنت طيف
كان ممكن انسج م السما ..لحظة شروق شمس الغرام
كام سحابه تضللك... او عقد ابيض يحرسك قبل المنام
لو كنت طيف
كان ممكن اتلبس ايديكي وحسها
وهو برضو ابقى ملكتهم.... حركتهم...كام محاوله ف الحرام
لو كنت اقدر ابقى
حاجه تقربيها ...وتحضنيها.... تكلميها....
ولو هعيش من بعدهم شادد حزام
ع فقري بيكي...... مش مهم..
اهو عيشه تشبه رمله حاضنه كام وتد بين الخيام
انا حبي يشبه حب مبهم
فاقد الطعم وحلاوته ولذته لما يكونلك بهجته
و. فـ نفس وقته أما يلمح خطوتك..... لما يحس برقتك
يفرح اوام

سبحان من بالإشراق حيااااها ... بقلم خالد العطار

كأني بين الحروف أُمَازجها .
أعانق خباياها
أضم الورد ..فلا شوك
يعكر صفو محياها
وذا العطر ان فاح شذاه
فمن أعماق وجد .. تغشَّاها
وذا النور ان طلت من سُرادقها
سبحان من بالإشراق حيااااها
أيا حرف نبض تملكني
فأسر الفؤاد بِمُقلاها
أنا الشريد ان جُنَّ ليل
وليلي شريد سواها
وأنا الوليد ان طل فجر
وفجري أنا عيد ...برؤياها

معاش مرحوم .... بقلم مروة كامل

يدوب قرشين وكام مليم
وفاتهوملي بإسم معاش
وكام سبحه علي قنديل
بنور بيهم الماضي اللي راح ولا جاش
وبنتين سرقت الدنيا معاد نومهم
وام بتغسل الوحده مع هدومهم
ووحله وتوهه ف متاهه / وحبة حزن
وكام حيطه بيتحسدوا عشان حاضنانا جواها
وفيه كام دين وحق علاج وكام دمعه ساعة ما احتاج افضفض م الوجع والهم
وناس تتلم وناس تمشي وناس بتموت متنطقشي
وصوت مكبوت وضربة سوط علي ضلوع البكا لو حن
وكام ذكري بدون بكره تعاقب ف القليب لو أن
وانا والخوف وامراضنا وكيس مليان بأوجاعي
بجمع تمنه م الاحباب وواشمه الاسم ف دراعي
وانا وبنتين بتفاصيلهم وكدب وزيف بدون داعي
وام بتقسم اللقمه مابينها وبين امل ف الشوق
يامرسال الفراق ماتفوق
وهاتلي حببيبي م الجنه املّي عنيا بملامحه
واقوله ان البنات سامحوه واني كمان انا مسامحه
وان الدنيا ليه طارحه ف قلبي بنات فيهم منه
واني دبلت مع انه
موصيني اكون فرحه لكل الدنيا بعد ماراح
وحيده ف دنيا معيوبه
بتبني فيا كام طوبه وتهدمهم
وتاخد مني كل عزيز / مفيش دخان بيبقي لذيذ
مفيش ظالم ف ظلمه وجيز
ولا قضبان يكون اوجاع يدوس عالعمر اللي اتباع
ولا احلام تسلفني سعاده تساع وجع قلبي
صبيه بهمي عشت احبي
واطبطب ع الجراح فيا
يابنت الهم ياغبيه مفيش دنيا بدون غيامات
مفيش اخره بدون علامات
مراكب سايره بدموعي تقوي الناس علي الوقعات
ونار تتمشي ف ضلوعي بتعمل للحياه مقامات
وناس تغدر وناس تصدق وناس عايشه الحياه بالزق
وكام مليم يدوب قرشين وكيس محتاج لحق علاج وكام دمعه بنزلها ساعة ما احتاج افضفض م الوجع والهم ..
" ياخلق النص جرحه اصم "..