الناس مانيكان .... بقلم مصطفى يوسف

الناس مانيكان
مليان الوان
بيشدك بالسلعة اللامعة
بتزغلل عينك ف الاول
بعدين تلاقيك زي الشمعة
بتنور ليهم ايامهم
وبتسهر تزرع احلامهم
تجنيهم
تطلع ف الاخر بقى مجني عليك
فطبيعي الحزن يكون زاير
وطبيعي ان انت تكون حاير
وتطلع همك ف سجاير "وبتشرب فيك"

كان فيه ياولاد حكاية ... بقلم امنية عارف

كان فيه ياولاد حكاية
عن مصر ام الدنيا
قام فيها ثورة كبيرة
كسرت كرسي ف ثانية
كرسي دام ٣٠ سنة
كان م الدهب والفضّة
بس داب قوام وصدّا
م البرد اللي ف يناير
من شاب نام واتغطا
ف شارع من غير سراير
في خيمة زي الورقة
مافيهاش حتي الستاير
كان بيرسم جوا خيمته
صورته وصبره وعزيمته
كان بيحلم بالحرية
تترسم وسط الميدان
وايه كمان ؟
الفلول اخدوا براءة
ورجعوا اقوي من زمان
والشهيد ابو دم غالي
مسحوا صورته م الميدان

خُلخال ياهانم ... بقلم محمد جاد

زحمة شوارع جوه خان اسمه الخليلى ،
وعيون بنات متكحلين برموش وروود ..
أصوات حنين دايره المكان رافضه الغروب ..
وشروق بيسرد 100 قصيدة شعر حُر ..
خُلخال ياهانم
او غوايش تشترى ،
مع شغل يدوى
صنع مصرى وبجداره ..
خاتم وساعه
وسلسله الماظها حر ،
مع تمثالين مفتاح حياه رمز الحضاره ..
شكل الاماكن والتراث تشييد قديم ،
وفـ نبض روحك يلمسك فن العماره ..

من كتر سكوتنا بقينا .... بقلم محمد سراج

من كتر سكوتنا بقينا
أصنام و الصبر عبَدْنا
وعليكي كتير صلِّينا
راضيين نارك تِصلِينا
بلبانة الحد الأدنى
قولنا دي هتحن علينا
- أُمنا مننا وعلينا -
حكِّمتي الـ "حد الأدنى"
فصبرنا لحد ما خدنا
ورمانا معاكي في مالطة
يا بلادي يا أجمل غلطة
هننادي إزاي علي زادنا !
ـــــــــــــــــــــــــــــــــ
والعسكر "فشخوا" المدنة !!؟

حزين وبمثل اني سعيد ... بقلم تامر عفت

حزين وبمثل اني سعيد
فرحني ياربي بيك
عمر مديد يارب بعيد
ومش بفكر فيك
كنت زي الحصان الجامح
ع الفلوس ومش بهدي
لكن انت كبير وبتسامح
وانا عبد صغير وعلى قدي
ياحبيبي انا مش واعي
من غيبوبه الطمع بعاني
يا احن اب وراعي
ارحمني من عالم فاني
انظر لي بعينيك.. والمسني بيديك
توبني توبه حقيقيه ورجعني ليك

سأظل اناديك حبيبي وان هجرتني .... بقلم نهى النجار

سأظل اناديك حبيبي وان هجرتني
سأظل اردد حروفك في معبدي وان خذلتني
سيظل شعاع عيناك يهديني اليك وان ابعدتني
سأظل انا --انا وان كرهتني
آآه من تقل الدقابق
أه من بعد الطريق
من توه خطوه
بعد ما كنت كل الطريق
============
من بسمه خجلانه تترسم
من ورده مشتاقة ندي
من دمعة بتروي ندم
بعد ما كنت كل المطر
==========
من حرف ما تكتبش في ألم
من برد شتا يهز كيان البشر
يفكرهم بالغايب واللي اتنسي
بعد ما كنت كل البشر
============
بعد ما كنت كل الطربق
بعد ما كنت كل المطر
بعد ما كنت كل البشر
بعد ما كنت الحبيب
بسألك ازاي تقدر تغيب ؟؟

بيدعيلكوا .... بقلم مصطفى ابراهيم

يا شايلينكوا على الاكتاف
بننعى دمكم بهتاف
و ندعيلكوا
غموس الناس و عيشها الحاف
بيدعيلكوا
و درس العربى ف الأرياف
بيدعيلكوا
و كل جنية زيادة ف جيب
موظف هيئة الإنتاج
و ابنى اللى ف علم الغيب
و أمى اللى حتلقى علاج
و أرض المعتقل لما
حتفضى.. أكيد حتدعيلكوا
و كل ظلومة ما اتظلمتش
و كلمة حق ما اتكتمتش
و كل قلم نِقِص ف القسم
و كل علامة مش ف الجسم
بتدعى لكل وش و إسم
من اللى عندكم ...منا
يجوز حيكونوا من جيلنا
يجوز حيكونوا أولادنا
يجوز حيكونوا م الاتنين
لكن ندرن عليا و دين
لا تيجى عيالنا تشبهكوا
تبوس على رجل أصغر شاب
و ترفع رايته زى ما حب
و تحفظ صم أساميكوا
و من آخر نفر فيكوا
لأولكوا
حتدعيلكوا