انتحر مات ..
والخلايق
الصبح طالعه..
والحزن لابس فى العيون..
توب الخفا ..
والمظاهره فى الجامعه والعه..
وكل ولعه ..
مهما قادت تنطفا ..
وخلق ترغى..
وخلق سامعه ..
وخلق مالهاش فى الكلام والسفسطه ..
واحد:إنتحر .. واحد تانى:إنقتل ..
واحد تالت:دا كان مجنون ..
واحد رابع:دا مات بطل ..
واحد خامس ماقالش حاجه بس سجل ملحوظات..
وسليمان خاطر ..
إنتحر مات ..
والمعارضه صالت وجالت ..
والحكومه ردت وقالت ..
الطبيب الشرعى أكد ..
والدموع..
فى القريه سالت..
والصريخ فالصويت فالعياط ..
فالسكون فالسكوت فالسكات ..
وسليمان
إنقتل إنتحر مات ..
واللى فاضل بعد موته ..
سؤال ..
سأله واد مقرف معافر ..
سليمان مات شهيد ..
ولا كافر ؟! ..
وآخر كلام ..
وان كان ..
وإن كان حيوجعكو ..
آخر كلام ..
سليمان مات ..
لأجلن يعيش آفيش السلام
ليست هناك تعليقات:
إرسال تعليق