حكاية اوردر ............. بقلم الكاتب الساخر وجيه صبرى

-

أؤمر يا فندم
= لو سمحت انا جعان جدا فكنت محتاج اتنين بيج ماك ،باكيت بطاطس اكبر حاجة ، وسلطة كول سلو
- حاجة تانية يا فندم ؟
= اه ، لو سمحت انا جعان جدا ، ما اكلتش من يومين تقريبا ، حوار طويل كدا يعني ، ومش هستحمل حاجة تقرفني وافضل يومين زيهم جعان تاني ، فياريت لو الشيف بيمضغ لبانة يا ريت بلاش يتفها في الأكل ويتفها ف اي باسكت او يبلعها عادي
ولو تفها ف الاكل ممكن لو شوفتها ترميها ؟ معلش .. واي صراصير او نمل او حشرات عامة يعني وقفت علي الأكل ف المطبخ يا ريت تزيحها بايدك .. زيحها بس ما تموتهاش .. اهم حاجة انا ما اشوفهاش وهاكل عادي
اي حد بيستعمل كريم فاتيكا بالله عليك يبعد عن الاكل خمسة بس ، الشعر بفاتيكا لما بيقع في الأكل بيخلي طعمه قذر وريحته صبار
- تمام يا فندم ، بس بالنسبة لحجات تانية صغيرة؟ مفيش مشكلة؟ زي مثلا لو لقيت شعره من معصم ايد حاتم .. حاتم شعره غزير جداا وطويل كدا
= لأ عادي هتجاهلها
- اوكيه ، وبرضه لو لقيت كام نقطة لبن كدا علي السلطة ما تقلقش سالي بس لسه مخلفة جديد وبترضع بين الشيفتات فممكن حاجة تتنطور علي الأطباق
= مفيش مشكلة خالص ، اللبن مفيد للصحة ، ونعمة ربنا يعني مش هنقرف منها
- تمام هحاول احققلك طلباتك بس بشرط .. يا ريت بلاش وساخة بقي وشغل تصوير الأكل لو لقيت فيه حاجة مقرفه وتشير ع النت وشغل المراهقين والبنات التافهة ده
= اوكيه ، هات بس الأكل وبعد ما اشبع ان شاء الله من غير قرف زي كل مرة هروح اجيب المقروطة واهبأ علي مياتين ابوكو
- هاهاهاهاهاها ، يا عالِم يا فندم ، ما تقاطعش بس ، ممكن بعد ما تاكل يجيلك تسمم بسبب ضوافر الشيف هشام الملوثة وكلها طينة اللي بتسقط منه في الأكل وتموت قبل ما توصل الباب .. دقايق ويكون الأوردر عند حضرتك