قصيدة : زوربيح زهق ..... بقلم الشاعر هانى ادم

زورييح .... زهق
قطع هدومه و ساب همومه تتحرق
زوربيح .... زهق
سب لجنابه فى حضرته
سبل عيونه فى بصته
كره المسموح
عاش فوق سطوح
و ف شبر غرق
زوربيح .... زهق
ودع حبايبه بكلمه واحده
يا دوب فى سكتهم عرق
زوربيح .... زهق
كسر القله على سنين راحت
و سنين فاحت
عمر إتسرق
و نده على الموت مرحبا
ما راح الصبا
و صبره مرق
زوربيح .... زهق
دخل اﻹنعاش مركب حلمه
سلم همه
فى ركن اﻷمانات
زوربيح لو مات
هتلاقوا مين تاكلوا فى أعراضهم
تاخدوا مكانهم
تقتلوا حتى فراغ أحلامهم
زوربيح فجأه
إقتحم الفجوه
و خد أحلى قرار
هيعيش غصب عن إستعبادكم
هيعيش فوقكم
مش تحت الذل
زوربيح كان مخلوق زى الفل
لا هو عبد رخيص
و لا ماله لازمه
كل اﻷزمه
رضاه بهوانه
زوربيح قرر يملا مكانه
و يملا الورق

قصيدة : انا تايه فى مكان وزمان .... بقلم الشاعر عبدالوهاب عوض

انا تايه في مكان و زمان ..
و طباع و مقاصد و ملامح
النُـص الظاهر انسان
و النُـص التاني ماهوش واضح
انا بُـكره و جاي ، ولا انا دلوقت ؟
و لاّ انا وليّت زي امبارح؟
حبيتها محبتنيش خبيت ..
حبتني فخوفت لـَ كون جارح
قاسي و بنسىٰ الناس لو قسيِّـت
وبصالح لكن ما بسامح
تايه و ساعات ببقىٰ مـركز ..
بتـعكِز عـَ خيالي السارح
أهدىٰ من النيل وقت المغرب .
وأغضب . أتحوِّل ليل كالح
و غزال لما تروقلي غزالتي .
و إن دب الغدر انا ديب نابِح
كسبان .. و أتعلم لمّـا أخسر ..
يعني الحالتين فيهم رابح
انا بغرق حتىٰ إمّا اجي اكتب
بين شعر بحور عذب ومالح
انا نفس و قلب بيتعاركوا
و نـتـوه و بنـهدا و نتـصالح
يا طريق يا محاوط خطاويا
معرفش انا جاي ولا انا رايح
و انا تايه في مكان و زمان ...

قصيدة : وبغض النظر .... بقلم الشاعر محمود الدندراوى

وبغض النظر إنك
ببقى ساعات بموت فيكي
وبعشق كل ألاعيبك
عشان أفضل كتير جنبك
وتتحايلي عشان تظهر
حاجات فيا مابفهمهاش
وحدك بس فاهماها
كإنك أم
مش واحده ما بنا سنين
تلاته يدوب مش أكتر
لكنك حاجة زي الورد
رقيقة تجنني جدا
واغرب حاجة ف عنيكي
تدفي الدنيا لما تكون ف عز البرد
وزايغة عنيكي وهربانه
كإنك بتدوري على حد
وأول بس ما تشوفي
ملامح وشي قدامك
كإن شوفتي باب جنه
وطليتي عليها بجد
ومش عارف أرد عليكي
رد ب رد
لانك حتى مش سايبه
حاجة لحد
فمن اول مافتَّح عيني على يومي الاقيكي بتتسبقي مع نفسك
على راحتي
وتتخصمي مع روحك
عشان سابقاكي ف رعايتي
كإني النونو اللي لسه يدوب
عمره ماجبش غير تلاتين
ولسه بحس صوت همسك
بترقيني
وكف إديكي بيعدي على جبيني
ولسه بتصحي وانا نايم
عشان تتطمني إني
مانيش بردان
ولسه خدودي حاسه برقة البوستين
ف مش عارف عشقتك بس من طبتك ولّا انا جوايا عشقك من زمان!؟

قصيدة : بحبك ليه ... بقلم الشاعر محمد الحمامى

مراكب ضحكك المالح
سراب جامح
في بحر التيه
وأنا بنزف عصير رمان
وأتباهي بكام إفيه

وأتغني وأقول الشعر
عشان شاعر بلاد الهئ
وبعصر قلبك المعصور
وبتمني ف لحظة يرق
وصانع من عضامي الناي
وناسج من جلودي الرق
وأتوجع ف ليل كسلان
وأستغرب
بحبك ليه ؟!

قصيدة : حدث فى مثل هذا الحظ .... بقلم الشاعر محمد ثابت

حدث في مثل هذا الحظ
حبيت أكون الفعل بس انكويت باللفظ
لو كنتي غيرتي الحروف يمكن مكنتش هتقتل
أو هتسأل ستين سؤال ..
متعاقبنيش
الدنيا مركب نوح من كل جوز حَبه ..
من كل صنف اتنين /
لو خلوا بينهم خطوتين يمكن نموت ..
أو نتحرم حظ اللقا
أو نتحسب مجاريح
السقف لسه صَفيح صوت المطر مزعج ..
30 سنة وأكتر وانا بتحايلك نسكن الشجرة
الفَرع لسة براح / وإن كان على التفاح ..
مش هقطفه المرة ..
وارجع لـ قبل الحظ / بـ التلاتين ..
وانشد بصوت المشتاقين
المُلك لك لك والشقا للناس ..
عصفور إشتكى لك من كترة الإحساس ..
الحظ فاس والأرض كـ المخاليق ..
عازق بــ عفوة الألم والحظ فاتلة صديق ..
تمثال تعيس الحظ / روحه حجر صوان
وإنتي اديكي الناعمات لا تستطيع النحت
هتسيبي روحك في الحجر تنحت !!
ولا انتي هتملي / وهتهمليني زي بيت بلا باب
يعدوا فيه أحباب ما يعرفوا يعَدوا ..
حظي بلاد هاجرت واما لمحت الرَكب
شاورولي وفاتوني ..
مفضلش غيرنا سوا مع إني مش شايفك
هنزل من الجنة يمكن أشوف الأرض
واركب فـ رَكب الراحلين منها
فرحان ومن غير سبب مع إني مش من هنا
وإنتي كمان مش هنا
هرسمنا من الأول ..
هفضل على لوني ودا وعد / مش ليكي
يمكن ما بتغيرش بس هتحول /
لـ صَحيح فرفت معاني الوصف بالأشياء ..
فَك إرتباط الفرحة بالـ زيطة ..
فَك إرتباط الحلم بالـ جايين /
مش كل مبسوطلك واقف وبيصقف ..
ولا كل حلم لازم نفوته سنين ..
فَك إرتباط الحزن بالتكشير ..
فك إرتباط الرؤية بالتفسير ..
فَك إرتباطنا لو بقينا إتنين ..
أَطلق جناحك فوق / تطيري واطير ..

قصيدة : مضطر أنام .... بقلم الشاعر عزيز محمد

#مضطر_أنام
الليله كالعاده بحاجات
زى إنى ما الحقش الدعا
للناس بمستقبل يليق
بيهم.. وللأسف اللى جاى... مبهم غميق ما أحلكه!!
مضطر أنام
واستسلم الليله لحاجات
زى إنى ما املكش الدهب
لكن زمام نفسى وروحى ف ايدى حتما بملكه
مضطر أنام
وألحق وماألحقشى حاجات
زى ان نومى على الوضوء
لكن ساعات بسلك طريق ابليس وعمرى ما أسلكه
مضطر أنام
وافرح وازقطط من حاجات
زى ان فيه دايما بشر
ف اللحظه دى زيى كده
صاحيه عشان تدعى الدعا
لغيرها بحاجات بيحبها..والدعوه ممكن تدركه

قصيدة : بقولك أيه ... بقلم الشاعر محمد كحيله

بقولك ايه
بتعزف ليه خيوط معزوفة من همسك
فيصرخ لحن من أمسك
يصحى فيك وجع مدفون مهوش حاسك
ملامح حسك المئنون بيوصل لحنه جوايا
وانا والله ويايا وريد بيئن بيك ويزيد
بحبك وانت عنى بعيد
لكنى تعبت م التجديد وم الألحان
فتحت فقلبي ١٠٠دكان
حاولت كمان ابيع احزان
لقيت الحزن مخزونه ما بيقلش
داويت اوجاعى بالحرمان يزيد الجرح ما يخفش
بتعزف ليه
وليه بتحن لغنايا وانا مملكش اوَصَل صوتى بالمغنى
واغنى لمين ومين تانى هيسمعنا
بتعزف ليه وليه بتزيد فى اوجاعنا
زمان انا كنت بستغنى بحسك لما كان موجود
زمان انا كنت بعزف عود وامتى تعود
ومن امتى ما بينا حدود
بتعزف ليه على جرحى وتفرد عزفك المعهود
يمين بالله انا منك وياما قلبي حن إلّك يقولك عود
ف ليه بتهون ما بينا وعود
نقضت بإيدك انت حبيبي اي عهود
بتعزف ليه وليه تبكى
وايه هيفيد وليه نرجع نعيد ونزيد
مُحال نرجع ولحنى رغم اوجاعه ومن باعوا
لكنه سعيد
بتعزف ليه ووجعك لسه برضوا عنيد
بلاش تعزف على الاوجاع
وبيع يا ابنى ده كله باع
مسيرك للوجع تتباع
بلاش تعزف عشان كل البشر خداع