يا خالق الراحة ... بقلم محمد الشيخ

يا خالق الراحة
إجعلها فى صدرى
وكلتك الأحمال
وأنا حملى زاد بدرى
الصبر طال وأهو طار
والهم فاق صبرى
وإحترت فى أمرى
ياخالق الراحه ...إرزقنى إياها
عجل لى بلقاها لو حتى فى قبرى
إرزقنى بسعاده ماتكونش كالعاده
بتروح فى لحظتها
ارزقنى بسعاده
تسكن حيطان القلب
فيكون مكان بيتها...
و إرزقنى حب الناس
والعفه والإخلاص
والسبحه والسجاده
زود محبتها
ياخالق الراحه
الراحه ليه بترتاح ....ديما فى غربتها؟؟
مش بعد عسرك يسر..
مش بعد كحل الليل..
ديما يشقشق فجر
مش بعد لما تضيق..
ديما بتفرجها.....
أنا شوفت عسر براح
وهموم بجملتها
لا عرفت أكون نواح
ولا قلبى مني إرتاح
ولا توهت وسط الناس
التايهة فى توهتها
صابر وراضى يارب
مهما يطول الأمر
لو حتى طول العمر
عبدك يادوب عشمان
فى سجده فى الكعبه
ترزقنى إياها
فأطمع كمان وكمان
فى سكنه فى الجنه
أو سجده تحت العرش
ولا بعدها أتمنى
ياخالق الأكوان شوف رحمتك بيا
جيت أطلب الراحه
لقيتها دمعه فى خلوتك بتفض ما فيا

لَو عَليّا .. بقلم صقر

لَو عَليّا ..
فَـ أنا نِفسي..
أكون اِلمَهدي وِ اِلمُهدى ..
لُكل يَتيم -بـيــبان- النور..
أكون دُستور ..
يراضي كُل وَاد -عَرقان-..
وَ اكون قُضبان..
تِكتِف -فِتنهَ- الكادرات..
وَ اكون سموَات ..
بـ تُحضن فِكرِة -النُكتهَ- ..
وَ اكون سِكهَ ..
تِجمّع جُوز كناري ضَحوك ..
وِ ادان ديوك ..
كما ترانيم بـ تُحضن فَجر -حُريّهَ- ..
وَ اكون الكون..
وِ كون فيّا..
بـ سِلميهَ ..
وِ رتم إيقاع يِرقص كُل جِزع قَديم ..
وَ اكون المُلهِم الدايم ..
لـ لُوحِة فَرح بـ التنسيم ..
وَ اكون -الميم-
فـ شِفِة بِنت حَلمّانهَ ..
بـ حُصان سابِق ..
لـ " وُندَر لاند "
وَ اكون الرَد ..
لـ إستفهام ..
..
"جاي بُكرهَ وِ شايل إيهْ ؟!! " ..
..

لعينيك فقط .... بقلم أحمد على

لعينيك فقط ،
زرعت حدائق الجمال
في أرض روحي
جعلت القلب حارسا عليها
يراها العابرون جنة وحريرا
ولا يشم ريحها غير قلبك
يا أنثاي وذاكراتي
يا حنيني
ربما يقرأ البحر تفاصيل الغياب
بينما روحي ماتزال معلقة
على أطراف البوح
هل نسيت يدي في يدك؟
المؤكد أنني مازلت أحتفظ برائحتك ،
نظرة عينيك في محطة القطار ،
عناقك قبل الغياب ،
هداياك
وقلبي
المؤكد يا حبيبتي
أنه لا حبيبة سواك

خدنى الحنين .... بقلم حسن محمد

خدني الحنين
ودخلت اقلب جوه صفحات اللي كان
نفس المكان ، نفس الصور ، نفس الديكور
نفس العيون الفاتنات / المليانين ضحك وهزار
نفس الحوار و خناقة الصبح العظيمه
بين رمش عينك والعفار
نفس السمار ساكن ملامحك شنطتك
لسه القمر ساكن سراديب طلتك
لسه النجوم متنكرين في هدوم نمش
وبيلعبوا نط الحبال علي حفَّ شفة حضرتك
نفس المكان ، نفس الصور ، نفس الديكور
لسه العيال العشمانيين ف ضحكتك
واقفين طابور
لسه الشجر واقف جَسُور / ولا بيتهز
من فعل زلزل خطوتك
لسه المايصه في مشيتك
وانا قلبي شاخ مابقش خلاص حمل الدلع
لسه الوجع موجود مابينا
ولسه دين البعد واقف بين جنابي وحضرتك
نفس الشوارع والشجر ع الضفتين
نفس الطرق والفاترينات
نفس القهاوي والتحف عند الحسين
مش كنا متوعدين هناك انا جيت اهو
طب هو ليه كل الحاجات فضلت هنا
وانتي البعيد
واهو عدا عيد ووراه سنه
وتلات شهور وست ايام بالتمام
واربع ساعات / وسنتين
وانا وانتي فين ؟
انا وانتي تاهين في السنين
طواحين هواء بتلف بينا
ومره واحده تسيب ايدينا
ندب واقعين ع البلاط / نتكسر
نفس الصدف مترتبه
لسه الأماكن مرعبه
لسه الشوارع حاسه خوف وبترتجف
لو عدا اي اتنين شبهنا مره صدفه / اتكلموا
نفس الوجع ساكن في جوفنا
نفس الحنين حاسس بخوفنا
ولسه روحنا شابطنين
في طرف جلابية العياط
وانا وانتي ايه " غير ريح و نار "
قابلوا بعض في حضن شارع / سلموا
* فاتلعموا .!
ان الشوارع و الصدف و الشتا و الحسين
كل دي اشياء كفليه تموتك أَوْفَر حزين

وبجملة العنْعَنة ... بقلم خليدة ابراهيم

وبجملة العنْعَنة ...
عن كل صوت تنهيد
قلتوا عليه مسْكَنَه
عن كل حد رخيص
كانلُه في يوم خاطر
عن الشاطر ..
في سرقة روحي
ابن اﻹيه !
عن اﻹفيه ..
عن الحلم اللي شالني زمان
عن الحمل اللي شايله الآن
عن الناب اللي بان ..من ضحكة الإنسان
عن كل أسرار الوجود
أو كل من خان العهود
عن صوت العود ..
انا أصلي ببكي من النشاز
عن بيتي .. كان مبني بإزاز
عن قلبه .. اجحد من فوﻻز
والشعر خايف من عنيه
وأرجع وأقول
عن الافيه ..
الضحك يصنع معجزات
في القلب ويطبطب عليه
عن الجامِع ..
ابن الجيران بيصلي فيه
بيبُصِّلي
ويداري إعجاب نظرته
بكفوف ايديه
عن (المعلش) ..
في دولة (معلِشاليا) الأم
قانون المعلَشَة واجب
عن الصاحِب
كمان مرة عن الصاحب
زعل؟!! معلش
ماتضربليش في بوزك وِش
كﻻمك كله هري ووَش
عن الافلام ..
وكل (الهيييح)
عن المجاريح
عن المراجيح ..
وعن كل الصُحاب الميح
صحاب تاني؟
عن الدُنيا اللي واخداني
عن الاخوات ولمّتهم
ياريت نتلم من تاني

يوشع ... بقلم أحمد السعيد

يوشع
إزحف بكُل رجال بنى اسرائيل للمجد
المعركه
مَهلَكه
و النُصره عِدّه و عَدّ
قاللى و نظر للجند
( مش بالعدد يابنى)
(لا يتّبعنى رجُل
جهّز عشان يِبنى
أو راعى من غير جاه
مستنّى خِلفة شاه
أو شابّ حبّ فتاه
و عَقَدْ ولم يَبنى)
(اللى انكَوُو بالقُرب
ضُعفا ف وقت الكَرب
لو خدتهم للحرب
ايه اللى هينوبنى؟)

انا مش يوسف ... بقلم أحمد النجار

انا مش يوسف
ولا كنت آمين
على خزنة أحلام ف قلوبكم
انا من توبكم
بخطئ وبتوب
انا مش ايوب
ولا كان للصبر فى قلبى مكان
دايما مستعجل ع الاحزان
وبروح للجرح برجليا
دمع عينيا على ناس ف الدنيا ماهيش هيه
دايما بيسيب لى فى قلبى جروح
الدنيا طوفان ومكنتش نوح
وغرقت ف اول شبر الام
انا عمرى ما فكرت اتعلم
مع إن قالولنا الدنيا علام
وانا كنت سلام
وسط حروبكم
زهر الاحلام جوه قلوبكم
انا عمرى ما فكرت افوتكم
سبتونى ف عرض البحر وحيد
طول عمرى بعيش ليلة الوقفه
لكن ولا مرة قابلت العيد
ملعونه الدنيا دى مابتديش افضل اشياء
الدنيا نفاق
وخداع ورياء
ومابينهم كدب وغش وخوف
الدنيا ظروف
دايما بتعاكس فى غلابه
الدنيا صحيح اكبر غابه مليانه ديابه وبنى ادمين
وما بين لتنين مش عارف اعيش
محسوب طول عمرى من الدراويش
الليل بيقصر ف ساعاتى
والخوف بيقصقص جناحاتى
وانا فارد ليكم دراعاتى القاكم خنجر بيمزع
احزان الكون لوتتوزع
ما هتلقى مكان غير شطى
مش قادر للفرح اخطى
او اروحله هناك
الدنيا هلاك مفيهاش منجى
وبتعزف دمعى على كمانجه من غير عازف
وانا مش عارف
وانا مش عارف
اخرتها معاكى يا دنيا لفين