حَبيبتي النهاردة صحيت جَمبي ساعة
لاقيتها تلاته بـ وقت السودان
خَرجت لـ صالتنا لاقيت فيه تلاته
عينيهم بتوحي انهم مـِ اليابان
رَعبني اللي حاصل جريت عند بابنا
نِزلت و بصرخ يا عالم يا هو
لاقيت واحد اشقر بـ عين تركوازي
مِسكني و قالي " Can i help you ! "
خَبطه فـِ حيط السلالم و سيبتُه
جريت خوفي زايد بردد " يارب "
خرجت لشارعنا لاقيت حاجة اغرب
رجال لابسة جيبه .. و بنات لابسه cup
مشيت حَبه شوفت اللي خوفت اني اشوفه
بقالة المحبّه صاحِبها ماليزي
و قهوة حدوقّه بيافطة جديدة " 咖啡馆 "
و ماتش بـِ معلق و صوته انجليزي
فـَ ادركت اني فـِ حالة غريبه
و عارف عِلاجها لكن كنت ناسي
فـَ طلعت صورتك و بصيت ثواني
لاقيت كله راجع لوضعه الاساسي
..
خِتاما حَبيبتي اكيد انتي عارفة
دة كِدبي الطبيعي فـِ شعري و دة عادي
جوابي دة غَرضه الحقيقي اني اقولك
غيابك اصابني بـِ غُربه فـِ بلادي !
