ف عالم خارج الأرحام .... بقلم عزيز محمد

زهقت الليله ف اتمشيت
ف عالم خارج الأرحام
انا وهى
مسكت ف حبلها السُّرى
ومسكت هى ف ايديّه
ركبنا المحور المنصوب
ما بين روحى وبين روحها
وبينا زحام
وحين غفله
لقيتنى بؤدى ف الصلوات
والخبط حبه ف النافله
وناس تُصدقنى ف النيه
وناس سافله
بتتيمم
بقطع الوصل والمقطوع
ووصل السم والممنوع
وناس تاكل هموم نَيه
وناس تتعشى بالسموات
وناس تتمشى جوايا
وانا جوايا مش ملكى
ولا ملكك
ولا ملك المقص ف حين
ما خلانا
نفتح عينا ع المكتوب
فنقرأ حظ
ومبدأ فظ
وقلب اكتظ
بالمخاليق
وناس بتليق على وجعى
وناس بتضيق
على هدومها
وناس بتسيئ لمأمومها
وناس بتؤم بالضالين
وانا ضليت
فرحت معاكى واتمشيت
ف عالم خارج الارحام
انا وانتى
لا سبت إيديك
ولا سبتك
تمديها
لغيرى ف لحظة الأهوال
لا شفت (زويل)
بيقدر يكسر الحاجز من الثانيه
عشان تجمعنا كام (فيمتو)
ولا (أشرف)
لحق يكتب
مع ال(هلباوى)كام مرسال
ولا (شبكه)
رضى يفصلى ويفسّر
(احمر يا شال)
فشفت الويل
فرحت معاكى واتمشيت
ف عالم خارج الارحام
انا وانتى
بنلعب بالبارود لعبه
امان لكن ساعات خطره
عريس وعروسه بالفطره
لكن بالروح
ومش مسموح
لطفل وطفله ف الجامعه
يلاقوا الحب ف الدواوين
ولا ف الزج ف الزنازين
ولا ف الفصل بين اتنين
ببين البين
فشفت ف عينك اللمعه
فرحت معاكى واتمشيت
ف عالم خارج الارحام
وشفت اصحابى بين صرعى
وبين موتى
وشفت بنات بتشبهلك
بتشرب م الوجع جرعه
فترجع تانى للنطفه
وانا وانتى
بنتخفى
ورا الدنيا
ف عالم قلبه كان شفاف
لا فيه ناظر
ولا منظور
كفيف لكن
لا فيه ها تخاف
ولا هتحس بالإسفاف
ف عالم عف عن محظور
وضحّى بروحه للعفّه