عشان حنيت ... بقلم حسام أفندى

كان المكان خالي
يدوب كراكيب
ترابه قديمه في حضن أثاث
بدون ترتيب
دخلت مكانك ومكاني
هجرنا الناس
ضميتك وعيني بتغمض
كاني كنت متلخبط
يطول الحضن والتغميض
وبستعبط
بعمل نفسي يعني نسيت
يدوب حبيت
واضمك تاني ضمه كمان
عشان حنيت
وأشوف الدنيا وانا جمبك
وبرجع طفل زي زمان
احبك جدا وبتعلق
في حااجه بشوفها بر أمان
وأحب الفرحه وافرحها
تشبهلك
تشبه لورده في حضن الربيع ساكنه
لضحكه أمي لو فاكره !
واندهلك
تخاف الضلمه من نورك
وأهربلك
و اتفائل جدا بوجودك
عشان حبيت
فقربي وهااتي الدنيا وياكي
وهات من الفرح الوان
وهااتي بيانو وجيتار
وهاتي بكره بيغني
وهاتي الفرحه في كمان
وهااتي الحلم يسمعني
وهااتي البدر لو يطلع
وبيعي الحزن لمين يدفع
وشوفي الامل في مرايا
وخبي الصوره جوايا
بيهرب حزني وبكايا
بقربك وقرب انفاسك
باحاساسك
وترسي ، البحر يشتاقلك
تجيله ! البر يندهلك
كانك كنتي هيروينه
بيشرب روحه من كاسك
كانك كنتي ايامي
وكنتي قد احلامي
فكوني ضي لخطايا
واجبلك دنيا من ماسك
وكوني حضن يسكني
وكوني قلب يحضني
وكوني الجاي يطمني
واكونلك ابن او ناسك
وردي التوهه من قبلك
وزيدي الدنيا من نورك
وهااتي الدنياا من بعدك
ياقوته ساكنه في بحورك
بحبك زي ما بشوفك
و يحلم حلمي لو تبقي
أكون في العشق مجنونك
فلو ترضي اكون ممنون
واكون روحي لو هتكون
من روحك يبقي تكويني
وتفضل مني وف عيني
وسكه عمري وسنيني
قوليلي ازاي ؟!
شغلتي الروح وتفكيري !
شغلتيني

وأنا مالى .... بقلم محمد أنور

فروع النخل لو مالت
تبص لفوق
وقلب النجم لو عالي ..
وانا مالى
لو كان قصادى 100 مخلوق
هوصل لحلمى الغالى
وبكرة الدنيا معايا تروق
بعامل الناس بكل ذوق
وانا المرزوق
برزق الشعر والكلمات
بحكى ع الذكرى والاموات
وعن الخالق وعن المخلوق
اللى عاش وسط الشقوق
بيبكى بحرقة م الاشواك
من تعب الحوجه والحرمان
وانا تعبان
وعمرى يوم مااشكى لانسان
وراسى لفوق
كما النخلة
بعيش حياتى كما الرحلة
وبكرة تخلص
وناس تدعيلى بكل شوق

لما كنا....لمحمد إبراهيم

وياما بشوف من الدنيا
حاجات أغرب من السيما
وربك برضه ليه حكمة
وليه حسبة وتقسيمة
وانا اللي مشيت وانا مآمن
وسِبْت مشاعري واطمنت
نسيت إن البلاء وارد
وقد يأتي فـ هيئة  "بنت "
ما تعتذريش  
الشاعر محمد ابراهيم
ديوان : لما كنا

انتي عارفة الأزمة ايه ؟ ... بقلم عمرو البطل

كانت الأحلام ساعتها ..
وردة من إيدك ، و إيدك
كنت هقدر لو بعدنا ..
أنفلت م. الخوف و اعيدك
كنت أطيب من عيونك
كنتي أطيب من عيوني
كنت طفل بينكسف منك
و بيخاف من وعيدك
سبتي ليه الطفل يكبر
يصحبه الخوف في الطريق
سبتي ليه الندب يكتر
و البراح في الروح يضيق
انتي عارفة الأزمة ايه ؟
إن "انا" شئ مش لاقيه
لسه هندور عليه ؟!!!
لا خلاص ، قلبك برئ
الزمن له يد عليا
و البصير أياديه قصيرة
بشحت النور م. الحقايق
رغم أحلامي المنيرة
بانكسف _مازلت_ منك
بس طعم كسوفي غير
قلبك الوردة ف حرير ..
قلبي نحتاه الحصيرة

نَطيت لـ سابِع سَما ... بقلم صقر

نَطيت لـ سابِع سَما / فَـ لاقــيتــني تَحتاني..
جِريت لـ أوِل صَف / فَـ لاقـــيـتـني اخراني ..
ادخُل وُشوش الخَلق / أتاريها دَخلاني ..
هَلْ بَت ريحــــي العَكس ..
أم هِيّ عَكـــــساني ؟!
..
الصُبح مُعتِم رَغم غَزو الشَمس ..
الليل غبي مَفهِمش نوح الأمس ..
عاقِل أنا وَ لّا فيّا اِلمَس ..
رَاسي مَ رسياني ؟!
..
بَضرَب بـ سيفي اِلأرصِفهَ ..
تِرجَع حَكَايا قاصِفهَ ..
اوجاع وِ غيرها مؤلَفهَ ..
بـ سيناريو عُثماني ؟!
..
أرجَع مِطاطي بَـ شِد مِن التُراب / أنفاس
بايـع ضُلوعِي لـ ذا "عَجَز" نَخّاس ..
اتـغَر -تارهَ- وَ ارمي حُروف "سَوّفَ" ..
وَ -ارجَعني- مِن تاني !

حب جنان ... بقلم مصطفى طايع

ياللي حبك حب جنان
نفسي قلبك يكون ميال
واحس بالشوق والحنان
دا قلبي ليك ميال انت سكر وطعم ولذيذ
ياللي قلبي ليك تلميذ
طعم حبك طعم لذيذ
يريد ديما اكون ع البال

أنا آسف يا ابوتريكه ... بقلم ايمن قطب

أنا آسف يا ابوتريكه ✋
لكن يا خساره ما بيديش
عشان بلدك دي مابتديش
لأمثالك هنا قيمه ..
ما هو انت مش بتاع سيما
وبرضه مالكش ف التطبيل
لكنك جوه في عروقنا ..
هرم رابع وشمس ونيل
ف ما يهمكش لو قالوا ..
عليك .. ارهابي وبترهب
وهل ممكن سحاب ينضر
من كام كلب بيهبهب !!