قصيدة : بحبك ليه ... بقلم الشاعر محمد الحمامى

مراكب ضحكك المالح
سراب جامح
في بحر التيه
وأنا بنزف عصير رمان
وأتباهي بكام إفيه

وأتغني وأقول الشعر
عشان شاعر بلاد الهئ
وبعصر قلبك المعصور
وبتمني ف لحظة يرق
وصانع من عضامي الناي
وناسج من جلودي الرق
وأتوجع ف ليل كسلان
وأستغرب
بحبك ليه ؟!

قصيدة : حدث فى مثل هذا الحظ .... بقلم الشاعر محمد ثابت

حدث في مثل هذا الحظ
حبيت أكون الفعل بس انكويت باللفظ
لو كنتي غيرتي الحروف يمكن مكنتش هتقتل
أو هتسأل ستين سؤال ..
متعاقبنيش
الدنيا مركب نوح من كل جوز حَبه ..
من كل صنف اتنين /
لو خلوا بينهم خطوتين يمكن نموت ..
أو نتحرم حظ اللقا
أو نتحسب مجاريح
السقف لسه صَفيح صوت المطر مزعج ..
30 سنة وأكتر وانا بتحايلك نسكن الشجرة
الفَرع لسة براح / وإن كان على التفاح ..
مش هقطفه المرة ..
وارجع لـ قبل الحظ / بـ التلاتين ..
وانشد بصوت المشتاقين
المُلك لك لك والشقا للناس ..
عصفور إشتكى لك من كترة الإحساس ..
الحظ فاس والأرض كـ المخاليق ..
عازق بــ عفوة الألم والحظ فاتلة صديق ..
تمثال تعيس الحظ / روحه حجر صوان
وإنتي اديكي الناعمات لا تستطيع النحت
هتسيبي روحك في الحجر تنحت !!
ولا انتي هتملي / وهتهمليني زي بيت بلا باب
يعدوا فيه أحباب ما يعرفوا يعَدوا ..
حظي بلاد هاجرت واما لمحت الرَكب
شاورولي وفاتوني ..
مفضلش غيرنا سوا مع إني مش شايفك
هنزل من الجنة يمكن أشوف الأرض
واركب فـ رَكب الراحلين منها
فرحان ومن غير سبب مع إني مش من هنا
وإنتي كمان مش هنا
هرسمنا من الأول ..
هفضل على لوني ودا وعد / مش ليكي
يمكن ما بتغيرش بس هتحول /
لـ صَحيح فرفت معاني الوصف بالأشياء ..
فَك إرتباط الفرحة بالـ زيطة ..
فَك إرتباط الحلم بالـ جايين /
مش كل مبسوطلك واقف وبيصقف ..
ولا كل حلم لازم نفوته سنين ..
فَك إرتباط الحزن بالتكشير ..
فك إرتباط الرؤية بالتفسير ..
فَك إرتباطنا لو بقينا إتنين ..
أَطلق جناحك فوق / تطيري واطير ..

قصيدة : مضطر أنام .... بقلم الشاعر عزيز محمد

#مضطر_أنام
الليله كالعاده بحاجات
زى إنى ما الحقش الدعا
للناس بمستقبل يليق
بيهم.. وللأسف اللى جاى... مبهم غميق ما أحلكه!!
مضطر أنام
واستسلم الليله لحاجات
زى إنى ما املكش الدهب
لكن زمام نفسى وروحى ف ايدى حتما بملكه
مضطر أنام
وألحق وماألحقشى حاجات
زى ان نومى على الوضوء
لكن ساعات بسلك طريق ابليس وعمرى ما أسلكه
مضطر أنام
وافرح وازقطط من حاجات
زى ان فيه دايما بشر
ف اللحظه دى زيى كده
صاحيه عشان تدعى الدعا
لغيرها بحاجات بيحبها..والدعوه ممكن تدركه

قصيدة : بقولك أيه ... بقلم الشاعر محمد كحيله

بقولك ايه
بتعزف ليه خيوط معزوفة من همسك
فيصرخ لحن من أمسك
يصحى فيك وجع مدفون مهوش حاسك
ملامح حسك المئنون بيوصل لحنه جوايا
وانا والله ويايا وريد بيئن بيك ويزيد
بحبك وانت عنى بعيد
لكنى تعبت م التجديد وم الألحان
فتحت فقلبي ١٠٠دكان
حاولت كمان ابيع احزان
لقيت الحزن مخزونه ما بيقلش
داويت اوجاعى بالحرمان يزيد الجرح ما يخفش
بتعزف ليه
وليه بتحن لغنايا وانا مملكش اوَصَل صوتى بالمغنى
واغنى لمين ومين تانى هيسمعنا
بتعزف ليه وليه بتزيد فى اوجاعنا
زمان انا كنت بستغنى بحسك لما كان موجود
زمان انا كنت بعزف عود وامتى تعود
ومن امتى ما بينا حدود
بتعزف ليه على جرحى وتفرد عزفك المعهود
يمين بالله انا منك وياما قلبي حن إلّك يقولك عود
ف ليه بتهون ما بينا وعود
نقضت بإيدك انت حبيبي اي عهود
بتعزف ليه وليه تبكى
وايه هيفيد وليه نرجع نعيد ونزيد
مُحال نرجع ولحنى رغم اوجاعه ومن باعوا
لكنه سعيد
بتعزف ليه ووجعك لسه برضوا عنيد
بلاش تعزف على الاوجاع
وبيع يا ابنى ده كله باع
مسيرك للوجع تتباع
بلاش تعزف عشان كل البشر خداع

قصيدة : عشقت عينيك .... بقلم الشاعر أسامة حسنى

عَشقتُ عينيكِ
كأسًا يداعبُ ساكريهْ
وأدمنتُ البقاءَ على شاطئكِ
فكل الذى أهواه فيهْ
ويهدأ قلبى على راحتيك
ويطردُ حلمى زمان كريهْ
وينسجُ أملى ثوبًا جميلا ً
فى شتاءٍ من اليأس ِكى ترتديهْ
وتغزو عُيونك جيشاً بقلبى
فأصبح انساناً لاتبغضيهْ
تمنيتك ُوطناً جميلَ التراثِ
تَنزه بالحُلمِ عن حاقديهْ
فمالكُ تهَجرى دار الحيارى
وتنسينَ أنى من ساكنيهْ
وترضى الحياه َبغير حُبى
أيزهوا الجمالَ بلا عاشقيهْ
إن كانت حياتى بدنياك كالأسر
فأنا سجين صرتى قاضيه
إن شئت قتلته فلا قبر سيقبله
وإن تحررى أسره فمن سيأويه
تُضمد الأيامُ بالصمتِ الجراحَ
وَيصرخُ قلبى ألا تسمعيه
سَننشد ُيوما ًلحنا ًحزينا ً
والموتُ يسمع ما يشتهيهْ

قصيدة : شوفت .... بقلم الشاعر أحمد العراقى

شوفت انشقاق السما
في بُخل حِنيِتك
ورميت على معاد الُلقا صبري
رابط على حزني صخرتين مِ الأمل
بداوي سحاب البكا
من مطرة في صدري
على شَفا جُرف البُعاد
نصبت خيمة انتظار (هَشَّة )
بحر الأماني اتحكم
بموج المستحيل في القرب
مين اللي قال بحرك .. بتنجي فيه (قشة)
شراعي طاح في سما عُزلتي ونوحي
صمت الطيور بالليل مع انهم صاحيين
كان يشبهه سكوتك .
يطلع الفجر بغناهم -- بُكَى
والوَحشة في لَحنهم تِنْدب على صُوتك
وبنفس ذات الكَبَدْ
يعودوا للأعشاش
(الكلمة منك دوا .. والنظرة قطن وشاش)
شادد على شمس الوصال
حزام من الأسباب
غِيرة ف نفور قلبك مع سِنِك المُكتئب
وضحكة محبوسة في حزننا المشترك
لساكِ بتحاولي أكون غفير الدَرَك
والدَرْك أسفل من خُطى الأعتاب
كان بوحي لحن حزين .
تبكيله أحداقهم .
عدُّوا على جرحي مستغربين مني
متغربين يمكن !
وكأن جرح الهوى ولا مرة يوم داقهم
والعادة من طبعي وقلمي غشيم
حالف ليكتب كل شئ عنك
حالف يوصفك للناس
أو يرسمك لوحة .
في متحف اللوفر
(مين اللي قال حضنك .. هيعوضه بلوفر )
النص ده مبتور مهما زاد أو قل
لو فرصته فيكي أو شهوة في الكلمات !
أو ربة الأشعار صبت عليه زيفها
النص لا يكتمل الا برضاكي عليه
أو ييجي على كيفها
النص ده مُهترئ مهما زاد أو قل
والوحي فيه عازف عن المقصود
النص ذاده من مخيلتي ..
ان كنتي ملهمتي .هتكون عينيكي الحل
وهيكتمل نوعااا
وهيوفي بالمطلوب
لكن هيفضل
نص لم يكتمل
والشعر لا يحتمل
كونه المكتوب
وبنفس ذات الكَبَدْ
(النص ده معطوب )

قصيدة : انا بكتبلك الليله ... بقلم الشاعر عزيز محمد

انا بكتبلك الليله
عشان ما أعلنش إفلاسى
من الانسان
قصيده يعيبها بعض الضعف والكسره
وسوء تقدير
لما علمتنى إياه...
شايفنى الليله مش ابنك؟؟
انا موافق
شايفنى عجوز ومن سنك؟؟
انا موافق
شايفنى الليله نفسى أطير؟؟
انا موافق
بشرط ترجع الجناحات
لحضنك تانى أو ترجع
هنا جنبى
ومش ذنبى
تسيبنى ضعيف
ف عش النحل والدبابير
وفكرى ان العسل مسموح
اتارى الروح
بتنقص منى ف المشاوير
وخست منى ف الرحله
بموت والله كل دقيقه من غيرك
وساعة الضعف بتعانى
ساعات بيقدم العقرب
فاموت م الخوف
ساعات بتعانى م التأخير
فأموت م الشوف
وانا شايف
عيال من سنى بتحلق
ب حريه
وبتلاعب
نجوم الحظ كوتشينه
وانا اللى مصاحب الأشجار
بحس الجو مش ليه
شايفنى الليله ..آه عاجز
أنا موافق
شايفنى كسير..يئوس جايز؟؟
انا موافق
شايفنى الليله عبء كبير
انا موافق
بشرط ترجع النضاره لجرابها
وكسرة حلمى لدولابها
واوكرة نومى لصوابها
وفكرة بومى لغرابها
انا موافق
بكل شروطك المنصوصه ف السابق
وف اللاحق
بشرط انك
تشوفنى الليله ف احضانك
امانه عليك
بحق اللى
ف غيابك عمره ما خانك
تسيب العضم ف مكانك
وتبعت روحك المظبوطه بالميللى
بتوقيت الكفن والموت
تاخدنى إليك
ولو ساعه
ولو لحظه
امانه عليك ما تتأخر
ومستنيك........