قصيدة : قَلبني ما حيلتى ... بقلم الشاعر العامى محمد الشيخ

قَلبني ما حيلتى
غير همى وجفايا
خَدوا مني ما إدوني
غير كرُهَ جوايا
بلدى تساع الكون بجلالته
إلايا
علشان بقول الحق
وأصحح الأوضاع
شقولى فيك 100 شق
ينتج مابينا صراع
إدينى حضن يساع
قلبى الملان أوجاع
مش بحكى عن حالى
ده انا الف شاب وضاع
اول ماحب اتباع
قرر يخون روحه
ويحبك انتى فصاع
و إن كان لحبك تمن
ف أنا أغنى واحد جاع ..
انا شاب شاااب بدرى
شب اتملى بالشيب
كل اللى ليك حقك
كل اللى حقى أنا عيب
يرضيك ياعم شبيب
شعرة شبابي تشيب
ويقولوا كله نصيب ..
أرجوك ياعم شبيب
وظفني في الدولة
إخضعني للتدريب
أنا إبنها وأولى .....

قصيدة : هى .... بقلم الشاعر المبدع حسن محمد

الدنيا مش غيه
ولا قلبي سرب حمام
علشان اطير فوق فالسما
والف علي كل البنات
اغزل جدائل شعرهم
فلنفترض ان اللي فات ده لو يكن
فلابد حتماً ان اكن .. مخلصلها
واعقد ضفاير شعرها .. جوه الوريد
فلنفترض ان انا شاعر كبير
والمعجبات كترم كتير
بقي عندي حفنه من البنات
بين هااااح وهيييح :-D
ده لو صحيح .. ولا يفرقوا عندي بشي
راح اقولهم
ان انتي ست الدنيا دي
وست قلبي / وستهم
والغيره تقتل قلبهم
هيموتوا شهداء نظرتي
ويخشوا طبعاً جنتك
وهتفضلي وحدك هنا
دي النظرة منك كلهم
يا مجمعه كل البنات فوق ضحكتك <3
فلنفترض ان انا هبقي الرئيس
مستغربه ايوه الرئيس
هجمع جميع الافئده
وهقولهم علي فكرة "مايصحش كده" :-\
بتغيروا ليه مش ذنبها
اكمنها اجمل كتير من وردكم
طب م النهارده قرار رئيسي
تفرض ضرائب ع اللي غاوي يبصلك
اعدام لكل العشامنين في محبتك
سجن انفردي للي يقطف وردتك
نلغي النشيد ونجيب مكانه ضحكتك
اه لو بايدي اسرق الليل والنجوم
واحطهم بين حجرها
اكمنها غاويه السهر
واحط صورتك ع القمر
اسرق من الناس ضيها
علشان محدش يلمحك غيري انا
هي الهنا .. ريحة الحواري
والبيوت الضيقه والامكنه
الغيه و النيه و العمر و البرهان
في الاوبر لحن كمان / يعزف فاغنيلها
كل البنات لو "مصر" / فالبنات دي نيلها

قصيدة : امتى نصحى يا عرب ... بقلم الشاعر كرم محمد

امتى ح نصحى يا عرب
امتى امتى امتى
امتى حيبقى لينا صوت
امتى الخوف فينا يموت
امتى امتى امتى
امتى حنصحى يا عرب
امتى امتى امتى
ضيعتوا امجاد حطين
و خدوا منا فلسطين
ردوا و قولوا باقى ايه
من العز نبكى عليه
ردوا و قولوا يا عرب
امتى امتى امتى
عايشين جوا الذكريات
و العز فينا مااات
حتى عرض البنات
داسته الدبابات
اصحوا و فوقوا يا عرب
اصحوا اصحوا اصحوا
كل يوم بتضييع بلد
و نفضل نبكى على الولد
اصحوا و فوقوا يا عرب
ضيعنا زمان بغداد
و سبنا عقولنا للموساد
عمالة تلعب بينا
و في الوحل تودينا
اصحوا وفوقوا يا عرب
اصحوا اصحوا اصحوا
اخر نصحية حقولها لكم
قبل ما الفرقه تضيعكم
أنسوا كل خلافاتكم
و إلحقوا يمنكم
و أوعوا تنسوا سوريا
رمز العزة القوية
حرروها من الطغيان
و من الفرس الرومان
اصحوا و فوقوا يا عرب
اصحوا اصحوا اصحوا

قصيدة : تلات فساتين ... بقلم الشاعر أحمد ابو العنين

طربوش متعلق فـ الفتارين
و تلات فساتين
بتحاول تغري عيون بدلة
ببيون مقموص من روج متساب
على خد الياقه المنتوشه من ايد واحدة
بتحب فـ واحد عاشق واحدة تحب فـ واحد مش فارق بيحب فـ مين.
و تلات فساتين
بتحاول ترقص لـ الدنيا
هاخد من وقتك كام ثانية....
اول فستان ..
كان يشبه فساتين السهرة
سواريه من فوق
عقد و حلقين / مش فاكر كانوا ألماظ أو فالصو
يمكن عيني مكنتش مركزه غير دلوقت
لكن اللي شاددني فـ هذا الوقت
انها مع مين ؟!
ليه حاضنه فـ ناس / كات حضنه أساساً ناس تانيين
الكل بيرقص مش فاهمين كلمات التون
روحها معايا بتبهت فـ اللون
و انا قلبي عجيب / فـ العشق النبض يكون هايج
- نزلت الطلبات فـ هدوء ساذج و تركت النيل حاضن عينها -
ايه يعجب اصلاً بنت الليل
غير واحد بـ فلوسه فَتنها
فـ المشهد ده / كنت الجرسون
و مكنتش أملك في تمنها ..
فستان اتنين :
كان يشبه فساتين الكارتون فـ حكاوى الجد الأزليه
مجنون بيثور ع الدخلية
علشان ملقاش أوضتين بمنافع تكفيهم و تدفيهم من شط النيل
من غير تفاصيل / سارح فـ ميدان التحرير
بنشارك ليلنا ف كام مانديل علشان بيدمع على شهداء طلعت قنديل
- بحبك
* مش قولتلك روح
خرطوش و قنابل / سيل ف جروح
الليل بيعيط ناي مبحوح
- بحبك " كان فارقها الروح "
الدمع بينزف ع الفستان.
- مشهد لـ كلاب الدخلية بتخش ميدان و بيضربوا نار على خلق الله -
و ايديا فـ ايدها و بنغني - الليل و سماه / و نجومه و قمره -
و فضلت انا بعشق بوح سهره
كان فاضل يعني يدوب سنتين
و نخلف بنت و يجي ولدين
لكن الدخلية محبتناش_
تركت فـ رصاصها بيحضن نبض عيون الحور
ملحقتش اقول :
لو كنتي فضلتي يدوب سنتين
يمكن هنغير ف الفساتين و انا هلبس بدلة عم امين
علشان معيش تمن التأجير
لو كنتي بخير / كنت ابدا اضحك لـ الدنيا
لكن الدخلية محبتنيش..
كسرت بزعيقها ازاز النيش و رمتني فـ أوضة بمنافعها
فـ فضلت انا حاضن في التلفون
مستني مكالمة روح كارتون
فستان مجنون / اتمنى يكون لـ ملاك غيرها
قبل اما يجس فـ مفاتنها
النبض بيهتف للأحرار
انا كنت ساعتها من الثوار
بهتف فـ كلاب الدخلية ..
- ليه رصاصكم مش راضي يفوت فيا
تالت فستان مبهج بجنان :
عمدان الصالة بترقص على احزان أنغام
زغاريط و هياص / على رقصة سلو
- عينِك حلوة
* دقنك احلي
" بيوطوا عليه اتنين م العيلة و عينهم بتعيط سهوه "
- جدك تعبان
الكادر فـ لحظة يكون بهتان
بيسيب المسرح للحكام
بتطمن ايده بـ كله تمام
ف بيجرى اوام علشان ما يفوتش فـ روح جده اخر جولة
و محاولة بتقتل ف محاولة.
- اوعاك تمشي
* انا قاعد على قلبك يا عبيط
- مين تاني هيحكي فـ قصص العيد
و انك جرسون و الثورة يموت فيها كام مليون
فساتين كارتون / عيل مجنون
بيحب فـ واحدة بتعشق واحد حاضن واحدة بتحضن اصلاً ناس تانيين
- هتسيبني لـ مين
-..............؛
انا واقف ع الناصية التانية وسط المجانين
و عيوني بتحضن فـ الفتارين و تطمن ايدي فـ فساتينها
ببيون بيدمع روج مشنوق
و صراخ مخنوق خارج من بدلة عم امين
بضحك و بعيط بني آدمين.
و الخلق بتصرخ مش فاهمين
ان الفساتين كات خلق أساساً مش عايشين ..
ان الفساتين كات خلق أساساً مش عاشقين.

قصيدة : عيناكِ .... بقلم الشاعر هيثم جبل

عيناكِ
أَصدَقُ ما حَوَتهُ بِشارةٌ
نادى بها - يا حُلوَتيْ - عَرَّافُ
عَينَاكِ
ضحكَةُ طفلةٍ شَامِيَّةٍ
وردٌ نَدِيٌّ - والسنينُ عِجافُ -
عيناكِ
لؤلؤة النجومِ بزهوِهَا
وَحَفيفُ زهرٍ - بالمَهَا طَوَّافُ -
عيناكِ
آخرُ دَمعتَينِ تَزُفُّهَا
أرضُ الشآمِ وطيرُهَا الرَّفرافُ
عيناكِ
سِحرٌ لا أعوذُ إذا أتَى
-لا القلبُ لا هذا المُحِبُّ يَخَافُ-
عيناكِ
سَكرَةُ عابدٍ عرفَ الهَوى
فتَكَشّفتْ من نورِها الأطيَافُ
عيناكِ
قشَّةُ غارقٍ ، أأَرُدُّهَا؟؟!!
أوَهَل تُرَدُّ مَراكِبٌ وَضِفَافُ ؟؟!!!
يا چَنَّةَ
الدُّنيا ووحيَ نُبُوءَةٍ
فوقَ الأَكُفِّ تَخُطُّها الأَصدَافُ
يا آخرَ
الأشعارِ - هَذِيْ قَصِيدَتِيْ -
مِن نُورِ عينكِ رُصِّعَتْ أَوصَافُ
بَدرٌ
تَجَلَّى في غَيَاهِبِ وَحشَتي
فَأُضيءَ كونٌ واستَوَتْ أحقَافُ
يَا شامُ
يا نَبضَ المواجِعِ والأسى
عُذرًا فأرضُ الأكرمينَ عِجافُ
يَمَنٌ جريحٌ ،
قدسُ يُقطَفُ زَهرُها
وابنٌ لها حَولَ العِدَا طَوَّافُ

قصيدة : أليها .... بقلم الشاعر المبدع محمد حسنى

إليها
يجوز يوصلها منى كلام
يجوز افرش طريق الحلم ناحيتها فنتقابل
من ابن عرق السنين/إلى بنت الأكابر
لسايا رغم البعد صابر
و بخبى دمعى ف جيب قميص المضحكات
مش ناسى انا كل اللى فات/لكنى رغما بتناساه
النص دا مكتوب ب آه
أو مزج بين دمع العيون مع قلب مل "الإندرال"
الصحة رغم الكسر عال
و ساعات بعكز ع اللى باقى من الحنين
صوت الأنين
يشبه أوى صوت العساكر ف الميدان
يشبه ل مس الجان او لبس توب الكرب
يشبه ضفاير سوريا بعد الحرب
يشبه ملامحى لما قررتى البعاد
أنا كنت واد
و كنت ليكى رغم قصر اليد زاد
زادت سنين العمر بس مافتكيش
قلبى اللى فات على كل أصناف النسا لساه عفيف
إليها/جايز تبات الليلة ف أحضان الرصيف
الليل كان مشهد مخيف/فاطمنت بيا
جايز يغازل حسنها المنيكان
فتفتكر "هى"
و تفتكرنى/قبل الرحيل ما يهل/قبل القدم ما يزل
قبل البعاد ما يعاند الفكرة
الذكرى ذكرى/و الدموع مقامات
و القلب عيل بشتهى الجايات
كل الحاجات موطنها ف عيونك
كل اللى فات كان من هوا كونك
جنونك/أو كبرياء الليل و هوا بيعاند وش النهار
البعد عمره ما كان مسار
وادى اللى صار
زار الخريف شجر الهوا فبكيت
الذنب كان "حبيت"
و البعد كان فرض الهوا ف الخلق
كل الغصص ف الحلق/إلاها فرشت ف القليب ملكوت
إليها/جايز يهز جمودها نبح الصوت
فرض السكوت يحرم فى حضرة العاشقين
سنين/بحايل وصلها فيا
و بمد روحى ف روحها أغنية
أقطع وصالى بنفسى فاتقطع/و اغزل ضفاير وصلها هى
و هى/ساحبة البساط من تحت اقدام الغرام
و ازاى يكون فيه انفصام!!
و انا روحى رهن تشبيكة صوابعك ف الشتا
النظرة دى مش ملفتة؟!
النبرة دى مش ملفتة؟!
روحى اللى لسا بوعدها متكلفتة مس ملفتة؟!
لساكى برضو متبتة ف الهجر!
لساكى مش سامعة صلاة الفجر!
لساكى مش سامعة الدعا ف الليل!!
"أنا صبرى كان عيل جميل"
مسه ف عرف العاشقين الهوا
لما انتى مش مالكة الدوا
قطعتى ليه من أصل روحك غصن!!
و رميتى ليه من حسن عينك حسن!!
يا متبتة ف الحزن/يا زاهدة ف العناوين
هذا الخطاب من نسل عين البكا
مكتوب بدمع العين
إليها
لكن إليها إزاى و فين؟؟!!

قصيدة : خمس صلوات .... بقلم الشاعر السيد عبدالله

خمس صلوات وبدعيلهاا
وكل الكون بيسمعنى
ورافض قلبها يفتح
ف عينى الباكيه توجعنى
بكلم ربنا عنها
ودايما ببكى قدامه
ودايما صوتها بيجينى
يبكى القلب ف منامه
انا عشقك ومكتوبلى
اكون مجروح وانا راضى
انا عشقك وهثبتلك
ب ان الحب مش ماضى
وحته الغيبه لو باقيه
وبنا حدود سبع سموات
هيفضل حبى بيعشلك
وحتى ان كنت م الاموات
وحتى ان كنتى مش راضيه
ف دا قدرى ومش قدرك
ولو قدرك تحبينى
ف حبى بسرعه من فضلك
وبتأسف عشان حبيت
ولو عارف ما كنت رضيت
مانا ناسى ب ان الكون
مبيسعشى لغير حاجتين
ف هرجع تانى للكشكول
وهكتب تانى بين سطرين
"ب ان الدعوه مرفوضه
وحبك ليا كان موته
ولسه هدعى من قلبى
تدوقى الفرحه مظبوطه"