دهنت الزيف .... بقلم خيرى على

دهنت الزيف
بزرع اخضر ونور وخيال
وصبيت الدهان ع الظن
رجعت كأنى طفل يتيم
بيلعب .. جنب اشواقه
لضمة حضن
طلع ممكن اكون واكون
حاجات غير بعض
أعض الارض والتوقيت
وانا بتعض
اتارى البحر ف الميه
بيغرق واحنا مش عارفين
اتارى الناى بيشجينا
ويبكينا
وهو حزين
ومين قال النهار مبسوط من الضى اللى عايش فيه ؟
سكاتك
نفسه يتكلم
وفرحك
نفسه يتألم
وامتى براحك اتعلم
ينام ف الطل
دهنت الزيف بالوان السما السبعه ومش مرتاح
ومش مرتاح

تفاصيل .... بقلم أحمد شبكة

دَخلِة بيتنا
و ريحة بيتنا
سندة ضهري علي كنبتنا
تزييقة الباب
اللي ياما ورّد أحباب
نشع الحيطة
اللي جاى من عند جارتنا
الدُّش اللي محتاج تصليح و مافيش سباك
و الكيكة البيتي الطازة قوي
و محروقة خفيف
و هوا العصرية من الشباك
مع طعم القهوة ف كنكتنا
صوت الخلاط و الغسالة
وهدوم الشتوي المتشالة
في دولاب عمر ما كان ليه أُكره
لكن يكره
إيد الأغراب
و يحب الإيد ال.. حبيبتنا
و قميص
صاحبي يستلفه عشان عنده خطوبة
تست الكبريت ع الأنبوبة
ف لسعة طوبة
فرحة قلبك لما السخان
بيهبّ عشان
هيدفي الميّاه ف عز البرد
و محل الورد
ف عيد الأم
و الهمّ
اللي دايما بيدوب مع لمّتنا
.
.
.
دي حاجات ما نقدّرهاش بتمن
تفاصيل تتجمّع
تتلمّع
تتسمّي "وطن"

خايفه ليه قطرِك يفوت .... بقلم علاء أحمد

خايفه ليه قطرِك يفوت
دا القطر لو هايدوس عليكى
دا قطر " موت "
سِيبيه يفوت
...
طريقه لو مش سكتك
لو مش هايوصل جنتك
فى القلب لو ماندهش "توت"
سِيبيه يفوت
...
اوعاكى تخشى من البوار
دا الميه لو عِكره انتحار
فـ " الصرف " مايعيش الياقوت
سِيبيه يفوت
...
ماتقوليش ولا " ضل حيطه "
تفنى عُمر بساعه .. زيطه
الضل عتمه فى البيوت
سيبيه يفوت

مش هنسهالك... بقلم محمد رمضان

انت فاكر لما تضحك يوم علييا
ها انسهالك....
وللا أشوف بعيوني غدرك.تفتكر
هاعديهالك.....
انت متصور هتقدر.. تنسى كل
ذكرياتك....
وأما تبعد يوم بقلبك.تفتكر ..
هتسيب.مكانك.....
ياريت.تفكر.قبل ما تعيش...في..
انهيار.......
حبي ليك..كان قبل مااكبر...
يوم ميلادك...
من قبل ما تحلم .. تفكر..
شوف.حياتك...
كنت حضنك..كنت ضهرك...
في انكسارك..
كنت قبل ما تلقى عمرك..
كنت دارك....
انت فاكر..وللا افكر..
انت من غيري
دمار...........
شد حيلك..كل حاجه مدين...
وداين.....
على اد ما نوعد ونوفي..بنلقى..
خاين....
ارمي عودنا..ماعدش لحن الوعد..
باين....
يوم دموع..ويوم..بيروي..فرحنا..
ورد الجناين...
ويوم ما نزرع حبنا..نجني.دمع...
..الانكسار....
مش هنسهالك...

أخفي الهوى بالقلب .... بقلم ماجد فياض

أخفي الهوى بالقلب ِ أُبقيه ِ
والعينُ تَفضحُ ما أداريه ِ
حاولتُ أمنعُ عنك ِ ما نطقتْ
نَشَرتْ وقالتْ ما أعانيه ِ
ما شئتُ أبدي بالهوى وجعي
قلتُ قلبي النارُ تكفيه ِ
الحُبُ أقدارٌ تُداهمنا
نَرضى ونقبَلُ كلَّ ما فيه ِ
حظّي بأنك ِ من غدا قدري
قلبي هوى ما باتَ يُشقيه ِ
أهواكِ أرضى الحبَ خاتمتي
لو فيه ِ مَوتي لستُ ساليه ِ
الذنبُ ذنبي لو طغى المي
لا ذنبَ منك ِ بدا أُشاكيه ِ
قلبي هوااك ِ ولم يسلْ أبداً
لو صارَ دمعُ العين ِ ساقيه ِ
قَدري أحبك ِ دونما كَلَم ٍ
عُذراً إذا ما العينُ تُبديه ِ

طول عمري ... بقلم محمد الحمامى

طول عمري مؤمن بالوصال
لكن حبك دين وجع
كان لازم غصب عني أحصله
كنتي في عيني نجم عالي
بحلم ليلاتي إني أوصله
فماتطلبيش
مني تاني أعشقك
لو قلبي ينبض بحبك
من بين ضلوعي أستأصله

سألها لما هذا الحزن صغيرتي !!! .... بقلم وسام القاضى

سألها لما هذا الحزن صغيرتي !!!
* نظرة استنكار منها كانت
تابعت بجراءة وبراءة معهودة
و يحك يا أنت توقف عقلك
لم تعد تفكر منذ غادرت
الصغيرة كبرت اليوم
لما يعد الصباح يلهو
كما أنت لا تدرك قيمة الأفعال
والصغيرة تتحمل مسؤولية البقاء .
* صمت وكأن أصابه وابل من رصاص
اخترق أعماق التغابي بداخله
ودون أي أحساس ...
أشاح بوجهه لممارسة عادته البلهاء
في افتراس ملامح وأحوال الناس
وتابع قائلا لا بأس ...
بفتور لا يرتقي لانسان .