تفاصيل .... بقلم أحمد شبكة

دَخلِة بيتنا
و ريحة بيتنا
سندة ضهري علي كنبتنا
تزييقة الباب
اللي ياما ورّد أحباب
نشع الحيطة
اللي جاى من عند جارتنا
الدُّش اللي محتاج تصليح و مافيش سباك
و الكيكة البيتي الطازة قوي
و محروقة خفيف
و هوا العصرية من الشباك
مع طعم القهوة ف كنكتنا
صوت الخلاط و الغسالة
وهدوم الشتوي المتشالة
في دولاب عمر ما كان ليه أُكره
لكن يكره
إيد الأغراب
و يحب الإيد ال.. حبيبتنا
و قميص
صاحبي يستلفه عشان عنده خطوبة
تست الكبريت ع الأنبوبة
ف لسعة طوبة
فرحة قلبك لما السخان
بيهبّ عشان
هيدفي الميّاه ف عز البرد
و محل الورد
ف عيد الأم
و الهمّ
اللي دايما بيدوب مع لمّتنا
.
.
.
دي حاجات ما نقدّرهاش بتمن
تفاصيل تتجمّع
تتلمّع
تتسمّي "وطن"