لحد هنا القصة عادية جدا ومتكررة ومفيهاش جديد، لكن المشكلة إن جامع ده فوق إنه كان ديكتاتور فهو كان شخص مجنون فعلا، نسخة طبق الأصل من القذافي حرفيا وبدون مبالغة، رقى نفسه من رتبة ملازم لعقيد، وكان بيوصف نفسه بـ "فخامة رئيس الجمهورية والقائد الأعلى للقوات المسلحة، الشيخ البروفيسور الحاج الدكتور، قاهر النهر، وناصر الدين يحيى عبد العزيز جيموس جونكونغ جامي"، اللقب كله كدة علي بعضه
:Dكان بيقول علي اللي بيعارضوه "طفيليات"، ومكنش عنده مشكلة انه يتوصف بالديكتاتور، ولما أي صحفي أجنبي كان بيقوله الناس بيتهموك بالديكتاتورية كان بيألش ألشة سخيفة كدة ويقوله :"أيوة أنا ديكتاتور تنمية" هاهاها، بل بلغت بيه الوقاحة إنه لما اتسأل عن موت المعارضين داخل السجن جاوب ببرود شديد نصا كدة : "أين هي المشكلة؟، الكثير من الناس يموتون في الحجز أو أثناء الاستجواب، هذا أمر شائع"
جامع كان برضه عايش أوي في دور القائد اللي بيعادي الاستعمار والامبريالية، وفي 2014 حظر استخدام اللغة الانجليزية كلغة رسمية لأنه بيعتبرها من "إرث الاستعمار"، وسحب عضوية غامبيا من المحكمة الجنائية الدولية، ولما منظمة العفو الدولية وبان كي مون اعترضوا علي اغتيال معارض في السجن، جامع قال لبان كي مون ببساطة "اذهب للجحيم".
عجايب جامع موقفتش عند السياسة، كان برده لابس وش التدين، أعلن إنه هيحول بلده لـ"دولة إسلامية"، ويُنقل عنه إنه قال إنه مش هيسلم السلطة لحد "أقل تدينا منه" ،وتقريبا لقب جامع ده كان واخده لزوم المشيخة برده، وهو كان بيعتبره نفسه أعظم أطباء عصره، فأعلن بفخر إنه اخترع علاج للربو والصرع، وشوية شوية فجر المفاجأة وأكد إنه قدم خدمة عظيمة للبشرية واخترع علاج للإيدز، وطلب المواطنين المصابين إنهم يروحو المستشفيات ياخدوا الدوا ده فعلا، وطبعا الناس راحت، ولقت الحوارات دي كلها فنكوش - شايفك ياللي بتلقح بالكلام
:D -.آخر مفاجآت يحيي جامع كانت في آخر السنة اللي فاتت، لإن كان فيه انتخابات رئاسية، وكان طبعا الكل متوقع إنه هيفوز بيها، مهو أصله مش بقاله 22 سنة بيحكم وهيسيبها دلوقت يعني، لكن المفاجأة إن لجنة الانتخابات أعلنت إن جامع خسر فعلا، وإن مرشح أحزاب المعارضة "آدام بارو" هو الفائز بمنصب الرئيس، والمفاجأة الأكبر إن جامع أعلن تقبله للنتيجة ساعتها فعلا، وكان فيه حالة من الذهول جوة وبرة من ازاي ديكتاتور دموي زي ده تبقي نهايته هادئة وهزلية وكاريكاتورية بهذا الشكل.
لكن جامع، وبشكل تقليدي تماما، قرر إنه ميخيبش ظن الجميع فيه، شوية وأعلن إنه مش متقبل الخروج بالشكل ده، وطعن ع النتيجة وقالك مش هسيب غير أما يفصلوا في الطعن، لعب عيال يعني.
طبعا الكلام ده جر عليه انتقاد الجميع، المعارضة تمسكت بفوز "آدم بارو"، والأفارقة مبيحبوش اللي يبين إنه واخد السلطة دراع وقفش كدة، يعني انت كرئيس ممكن تزور انتخابات، تحكم طول العمر، والناس هتعمل مش واخدة بالها، إنما تاخدها فتونة كدة الأفارقة بيتدخلوا علي طول، السنغال تحديدا جامع كان عامل مشاكل معاها، طبعا مفيش مقارنة أصلا بين القوة العسكرية والبشرية بين الدولتين، فضلا عن إن غامبيا محاطة بالسنغال من كل الجهات بشكل يخليها أشبه بمدينة سنغالية صغيرة لا أكثر، والسنغال أعلنت إن جامع لو مسابش الكرسي في الموعد المحدد بالذوق، هتخليه يمشي بمعرفتها
:Dجامع نشف دماغه، وقال عليا الطلاق منا ماشي، والمعارضة أعلنت إن هيتم تنصيب بارو في منصب الرئيس يوم 19 تحت اي ظرف، هيعملوها في السنغال لو معرفوش يعملوها جوة البلد، وجامع ركب دماغه، وخلي اللبرلمان يطلع قرار بمد فترته 3 شهور كمان.
القاضي اللي كان مفروض يحكم في الطعن بتاع الانتخابات هرب، جامع حاول يجيب قضاة من دول تانية يمشوا المصلحة بس الدنيا فشلت، السنغال ونيجيريا حطت قواتها ع الحدود، والتصريحات كانت واضحة ومكررة إن جامع لو ممشيش، هيتفشخ.
موريتانيا والمغرب حاولوا يلموا الدنيا دبلوماسيا كدة ويعقلوا الراجل، وواحدة واحدة أركان حكم جامع بدؤوا ينطوا من المركب، الوزراء بيخلعوا ويهربوا، وقائد الجيش قالك أنا مش هدخل جنودي في حوارات سياسية وملناش دعوة، وليلة الجمعة كانت قوات الجيش السنغالي اتدخلت فعلا، والدايرة كانت بتضيق علي جامع بسرعة البرق، لغاية ماضطر.
تحت الضغط والتوسل، الأفارقة قرروا يدوا جامع فرصة أخيرة لغاية النهاردة، وفي خلال ساعات، جامع يا هيكون اعتقل، يا اتقتل، يا هرب برة البلد.
جامع في 2011 كان ليه تصريح شهير جدا، لما أعلن إنه هيفضل يحكم بلده لمدة "مليار عام"، وبعدها بخمس سنين كان مطرود من السلطة شر طردة، نستفيد من ده إيه ؟
الدنيا دوارة، ويا ريت ما يبقوش يعرضوها أوي...
ليست هناك تعليقات:
إرسال تعليق