اسكتوا مش طلعت مصرية.... بقلم د/محمد غانم

اسكتوا مش طلعت مصرية..
طلعت مصرية يا مصريين..
وكأن ماكناش عارفين..
انها مصرية ومصرية ومصرية كمان..
وإن الخاينين..
أولاد الناس الخاينين..
جالهم خبلان..
اتفاجئوا أن الناس التانيين..
الناس الوحشين التانيين..
المصريين الوطنيين..
مافيهومش جبان..
ولا واحد باع ولا واحد خان..
ولا واحد طاطى عشان فكة وحبة ريالات..
ولا واحد فرط في ترابه لحبة رجالة بدون شنبات..
لابسين عقالات فوق الطرحة..
الواحد ح يموت م الفرحة..
اكمن الأرض المصرية.
طلعت مصرية ومصرية ومصرية كمان..
اصل الموضوع مش حتة ارض وحبة طين..
ولا ساحل بحر ولا جزيرتين..
ده شرف ملايين المصريين..
وكفاح الجيش المصري سنين..
من ايام سبعة وستين..
علشان كده يبقى خلاص خالصين..
رجعت لصحابها وزي زمان..
من غير حواديت ولا كان ياما كان..
طلعت مصريه ومصرية ومصرية كمان..
طلعت مصرية ولو مش عاجبك مليون طظ..
يا بتاع الرز..
كل اللي يهمك انك تلهط وتربرب وتعيش وتلظ..
لو فاكر ان المصريين بيبيعوا العرض..
واننا ممكن نتنازل يوم عن حفنة رمل وشبر ف أرض..
واننا مستنيين منك نفحة احسان..
يبقى انت نسيت ان المصري عايش علشان..
يحرس أرضه وارضك وأراضي جيرانه ف كل مكان..
وشعار المصري ف كل زمان..
الارض امان..
الارض كيان..
طلعت مصرية ومصرية ومصرية كمان..