من وحي عزلة .... بقلم كريم عبدالرسول

من وحي عزلة وانفراد بالنفس
بمراجعة الماضي من عمرنا الفاني
يؤسفني أقول لكنه شئ فعلي
إن احنا فعلآ كنا دور تاني
بنطُل لكن من بعيد لبعيد
ونكون خساير معركة
مجهولة الطرفين
وحياتنا صبحت هالة م التجاعيد
والجرح لو دائري
ميكونش ليه قطرين
اسأل هناك عن خلق تعبت م القعاد ع الرف
وقت اما مروا أبتسموا للشارع
كان كل دورهم ف الحياة شفاف
بيخافوا كل ما حد بيقرب
ويقولوا عيب منكم
ليه خليتونا نخاف ؟
وِقف الضعيف غني
الدمع مش صنعة ، والحزن مش صنعة ، واللي أختشوا ضحكوا ، والضحكة مصطنعة !
وقبلت أكون سلعة عرض ف مزاد مفتوح
ممدود بلا نهاية
وآمنت إني عبيط
وإن الفراق غاية
وإن الطريق لو ضل
لابد من أخر
وإني هكون وحدي بسرح علي الطرقات
وبغني للعصافير
عصفور ملُهش جناح
لو شاف بكايا يطير
لكن
كل يوم من فوق سطوح قلبي
رافع عينا للسما وأيديا ممدودة
تشحت لقا وغياب
مين اللي ردوا الباب ؟
مشيوا بدون أعذار
سابوا القلوب دافية
مش كان ضروري نشوف أسباب رحيل كافية ؟
كان الفراق قد حان
كان البكا ألحان
والقلب كان سرحان مع جرح فات بالوقت
وقالولي مش ماشيين
لكنهم مشيوا
وعشان عبيط صدقت !
ألوان بتبهت ع اللي جاي قدام
كان دور وجودك ف الحياة مجهول
كومبارس صامت أو يجوز خدام
قدم ما يملك من آمان وحلول
في غيابكوا نعدل كل شئ بايظ
ووجودكوا بوظ ، كل شئ معدول
باب المدينة أشتكي
من كتر مابيترد
والقلب لو كان بكي
كان عمره يوم ما اترد
لو كنتوا مصطلحات
سايق عليكوا الهوي تشيلونا م التعريف
جينا الحياة فترات
سبتونا دور تاني فاخرجنا م التصنيف
كل اللي فات تخريف
لا أنا عُمري كُنت جدار
ولا كُنتوا يوم البيت
أنا الحزين المُهرج
بوعدكوا بالضحكة
وأبكي إذا بالوعد ده وفيت !