أعلم قلبي ازاي يصبر
وازاي يقدر
يخلي الصبر عنوانه
عشان لو ضاع
في يوم حلمه
يعيش بالصبر أيامه
كتير بتضيع أحلامنا
مابين غربه
وفراق او غدر
فعلمته ازاي يصبر
وازاي يقدر يملى كل أركانه
بملح الصبر
ويحلم تاني حلم جديد
تكون فيه ليلة قدر
تحقق كل أحلامه
وبلاش من اليأس
وبلاش م الحزن لو تقدر
ادام علمته يدوق الصبر راح يصبر
فلما جيت أدوق الصبر
نسيت في الزحمه عنوانه
لقيت روحي بتتقطع
لقيتني بموت ميت موته
في كام لحظة
مشهد صعب يتكرر
نسيت كل اللي تعلمته
ونسيت في لحظة طعم الصبر
وأنا اللي طول عمري
أقول الصبر عنواني
واحفظ نفسي ازاي أصبر
وازاي اقدر أكون صبار وأتحمل
فمقدرتش وماعرفتش
وازاي في غيابك
أكدب نفسي وأقول أصبر
لاني أكيد
هكون بكدب ومش هقدر
ازاي أصبر وازاي أنساك
وتبقى بعيد عن عيني
يغور الصبر
ويغور كل اللي تعلمته
سامحني لاني
مش هقدر أقول أنساك
يغور الصبر مش هقدر
ليست هناك تعليقات:
إرسال تعليق