اربع حيطان ... بقلم محمد خميس

اربع حيطان ..
واربع شنط ومرتبه ولحاف
ساكن ف ليل خواف
بيذل ف العاشق وف الهربان
اربع حيطان قضبان
ليلهم غبي وطويل
تفضل تقول مواويل
للغربه والعيشه
افتح بقا الكيسه طلع عشاك واطفح
ومفيش هنا مطرح للجاي واحلامه
ف الغربه ناس ياما بيحاولو يتحامو
ف الحيطه والقضبان ويبصو ع العالم
من شاشه وهميه
خايفين يواجهو القدر ويعزمو النيه
لمواجهه الاشياء ومواجهه الواقع
خايفين يواجهو الحلم
برصيف هواه ساقع
اربع حيطان واربع شنط ومرتبه ولحاف
ف الغربه لو هتعيش طاطي وكون خواف
اربع شنط فيهم كفن فيهم هموم فايحه
اكتب عليهم اسمك ثلاثي واملا باقي اللايحه
دون حروف حبيبتك فوق سوسته الشنطه
ارسم قلوب بالنظر وتبت اوي البنطه
طلع سجايرك احرق الباقي ف مشاعرك
حط حلمك تحت رجلك واعرض كمان سعرك
تايه ومتغرب ف بلاد رصيفها وسيع
ماشي ف طريق الصبر لكن تملي بضيع
اربع حيطان واربع شنط ومرتبه ولحاف
لملم همومك جوا روحك واياك تكون متشاف
مرتبه ولحاف فوق سطرين بلاط
متكسرين من دق رجلين البشر
عايش وبتعايش علي شكل نومه الخطر
بحكي لسقف الاوضه عن نفسي
وبحكي عن الايام
عيل وشعره إبيض مابين لقا وسلام
ملهوش مكان يأويه
ولا ايد تشد ايديه
ولا صحبه تسمعله
كل اللي يشفعله ..
بنوته حلوه وأهل يدعوله
ماشي ف كون وطريق
عرضه شبه طوله
اربع حيطان واربع شنط ومرتبه ولحاف
اجمع رصيد حلمك ..( عفن )
لو ( ع ) بدالها الكاف