وأحبك ليه !! .... بقلم أسلام الاسير

وأحبك ليه !!
يا ارض بتطرحى الزقوم
وطعم الماء كما العلقم
وشوكك غايته يدمينى
عشان ارضخ او استسلم
لسيدك ده اللى مش سيدى
انا عايش هنا مغصوب
لأن الأمر مش بيدى
لكن فكرة اطاطيلهم
متستنيش ..
شاويشك مش مخوفنى
ولا كل بيادات الجيش
لكنى يا ارض كارهانى
انا مرغم فى انى اعيش
واطير فى كل انحائك
وانا جناحى ضعيف جدا
ومنتوف الجناح مالريش
انا عايش كده بإعجاز
لأن إلهى كاتبلى
فى ارض الذل لقمة عيش
برغم القهر والتهديد
ومحكمتك وسجانك وزنازينك
هعيش عاصى لهذا السيد
لأنى حاولت مره اهرب
دفنتينى فى بحر رشيد
ورغم الحسره دى يا امى
ناديتى فى البلاد عاصى
ولد ناكر جميله امه
نمدله يعض الأيد...
ايديكى يا امى ممدوده
بلقمة من رغيف الذل
باكلها لو تكرمتى
تعايرنى فى وسط الناس
ولد عاقق حقوق امه
بيطفح بس بيقاوح
لذلك فاسمعوا الآتى :-
حكمنا يا جموع الشعب
لكل المارقين منكم
يموتوا فطيس
وليكم مهلة تختاروا
يا إما الموت او التعريص
فمن طاعنى فلن يأثم
ومن خالف قرار امه
عليه اللوم....
يدوق الحسره والمندم
قوليلى بس احبك ليه
يا ارض بتطرحى الزقوم
وطعم الماء كما العلقم ؟!