بعد مماتك ... بقلم أيمن قطب

#مشهد 1
فاكر إنك بعد ممـــــــــــاتك ..
كل الناس دي هتبكي عليك !
فاكــر إن الكون راح يحزن ..
علشان هيودّع معاليــــــك !
إصحى وفوق م النوم يا عبيـط
أخرك صُوره فــ برواز ع الحيط
وكام كومنت وشير ع الفيـــس
ودمعـة حــد وحشته بجـــــــــد
على ضحكه وحبة أحاسيــــس
شالهــــــم قلبـــك مـــره لحـــد
وهدومـك جنـــب التسريحــــه
مش هتسيب منك غير ريحـــه
وعقارب عمرك مصلـــــــوبه ..
مش راح تمشي خلاص النوبه
#مشهد 2
غمّض عينك ..
عِيش المشهد ..
وتخيل إنك فـ جنازتك ..
واتأمــــل فـ وشوش النــــاس
وانت هتعرف حجم غلاوتـك
مين راح يبكي عليك وبحُرقه
مين هتأثر فيــه الفُرقــــــــــه
مين فـ صحابك صان العشره
مين يوم حبك وبـ إخــلاص !!
مين كان أصل ومين كان قشره
ومين بيجامل كده وخـــلاص
مين هــ يوّد أبوك فـــ غيابـك
مين هيخبط يوم علي بابــــك
مين راح يفتكرك م النــــاس
#مشهد 3
بعد شوية بُكــى ونــــواح
الكل هيمشي وهيسيبـــك
لو عاوز روحك ترتــاح ..
لو عاوز تعرف بقا عيبك
دوّر فــ جيوبك ع الخيــر
مِد إيديك لـ إيدين الغــيـر
خُد لك دعوه تونّس قبرك
ربك يعلـــــم وحده الغيب
اكتب حسنة خير من حِبرك
علشان كفنك .. مالهوش جيب